Skip to content
BibleKenya

Sikkiligar Bible

ಆದಿ 32

ಯಾಕೊಬ ಎಸಾವನೆ ಮಳಾನಿ ತಯ್ಯಾರಿ

ಯಾಕೊಬ ಪ್ರಯಾಣ ಕರತಾಮಾ ದೆವದುತೊ ತಿನಾ ಕ್ಹಾಮಾ ಆಯಾ. ಯಾಕೊಬ ತ್ಯುನೊನೆ ದೆಕ್ತಾಮಾ ಎ ಕ್ಹುದಾನು ಝುಪ್ಡು ವ್ಹೈ ಕೈನ ತೆ ಜ಼ಗಾನೆ 'ಮಹನಯಿಮ” ಕೈನ ನಾಮ ಮ್ಹೆಲ್ಯಾ. ತೆ ಥಯಲ್ಪರ ಯಾಕೊಬ ತಿತ್ತಿಬಿ ಪೈಲಾ ಎದ್ಯೊಮವಾಲಾವೊನು ಪ್ರದೆಶ ರ‍್ಹಯಲ ಸೆಯಿರ ಗಾಮೆ ತಿನೊ ಮ್ಹೊಟೊ ಭೈ ಥಯಲ ಯೆಸಾವಕನ ತಿನಾ ಸೆವಕೊನೆ ಮೊಕಲ್ಯೊ. ಮೊಕಲ್ತಾಮಾ ತ್ಯುನೊನೆ ಅಮ್ಮ ಕೆ ಕದ್ಯೊ ತುಮೆ ಮಾರೊ ಪ್ರಭು ಥಯಲ ಎಸಾವಕನ ಗೈನ ತಿನೆ ತಾರೊ ಸೆವಕ ಥಯಲ ಯಾಕೊಬ ಯಕ್ಲಾ ದಿನ್ನ ಲಾಬಾನಕನ ವ್ಹತೊ. ಮನೆ ಘನ್ನಾ ಢೊರೊ ಗದ್ಡಾ ಬಕ್ರಿಯೊ ಬಕ್ರಾ ವರಿ ಸೆವಕೊಬಿ ಛೆ ಸ್ವಾಮಿ ತುಮೆ ಮಾರಾ ಉಪ್ಪರ ಕೃಪಾ ಕರೊ ಕೈನ ಮಾಂಗಿಲಿವಾಡ್ಯೊಸ. ಸಂದೆಶ ಕವಾಲಾ ಯಾಕೊಬಕನ ಪ್ಹರಿನ ಐನ ಹಮೆ ತಾರಾ ಭೈ ಥಯಲ ಎಸಾವಕನ ಗೈನ ಆಯಾಸ, ತೆ 400 ಮನಕ್ಹೊನಾ ಕ್ಹಾತೆ ತುಕನ ಆವಾಡೊಸ. ಕೈನ ಕತಾಮಾ. ಎ ಕ್ಹಾರು ಐಕಿನ ಯಾಕೊಬನೆ ಘನ್ನು ಭೆ ವಾಟ್ಯು ವರಿ ಚಿಂತಾ ಕರಾಡೊತೊ. ತೆ ತಿಕನ ರ‍್ಹಯಲ ಮನಕ್ಹೊನೆ ವರಿ ಜಾನವರೊನೆ ಬೆ ಭಾಗ ಕರ‍್ಯೊ. ವರಿ ತೆ ವಿಚಾರ ಕರ‍್ಯೊ ಎಸಾವ ಐನ ಗುಂಪಪರ ಯುದ್ದ ಕರ‍್ಯೊಮ ಬಿಜೆಕ ಗುಂಪ ಚು಼ಕೈಲಿನ ಜಾ಼ವಸ ಕೈಲಿದ್ಯೊ. ತೆನೈಸೊ ಯಾಕೊಬ ಕ್ಹುದಾನೆ ಪ್ರಾಥನಾ ಕರಿನ ಯಹೊವಾ ಮಾರಾ ಬುಡೊ ಥಯಲ ಅಬ್ರಹಾಮನಾ ಕ್ಹುದಾ, ಮಾರೊ ಬಾ ಥಯಲ ಎಸಾಕನಾ ಕ್ಹುದಾ ಮಾರಾ ಸ್ವಂತ ದೆಶೆ ಮಾರಾ ಬಂದುವೊಕನ ಜಾ಼ವಾನೆ ಮನೆ ಅಪ್ಪಣೆದಿನ ತುನೆ ಚೊ಼ಕುಜ಼ ಕರುಸ ಕೈನ ಮನೆ ವಾತ ದಿದಲ ಯಹೊವಾ, ತು ತಾರೊ ದಾಸ ಥಯಲ ಮಪರ ಕೆಕ್ಲೊ ಬರೊಕ್ಹೊ ಮ್ಹೆಲಿನ ತಾರಿ ವಾತ ಪುರಾ ಕರ‍್ಯೊಸ್ತೊ. ಮಿ ತಿನೆ ಕ್ಹಾಲಿ ಅಯೊಗ್ಯ ವ್ಹೈ. ಮಿ ಪೈಲಾ ಎ ಯೊರ್ದನ ನದಿ ದಾಟತಾಮಾ ಮಕನ ಯಕ್ಕ ಲಾಕ್ಡಿಜ಼ ವ್ಹತಿ. ಹಮ್ನಾ ಮಿ ಬೆ ಗುಂಪನೊ ಮಾಲಕ ಥಯೊಸ. ತುನೆ ಮಿ ಪ್ರಾಥನಾ ಕರುಸ ಮಾರೊ ಭೈ ಥಯಲ ಎಸಾವ ಐನ ಮನೆ ವರಿ ಮಾರಾ ಬಚ್ಚಾ಼ವೊನೆ ತ್ಯುನಿಯೊ ಮಾವೊನೆ ಖಲಾಸ ಕರಸ ಕೈನ ಮನೆ ಭೆ ಛೆ. ತಿನಾ ಹತ್ಮಾ ಕ್ಹಾಪಡೆ ನೈಸೊ ಕರ ಕೈನ ತುಕನ ಮಾಂಗಿಲ್ಯುಸ. ಖರಿಮಾಜ಼ ತುನೆ ಚೊ಼ಕು ಕರಿನ ತಾರಿ ಸಂತತಿನೆ ಸಮುದ್ರನಾ ಉಸುಕನಿಂಗತ ಲೆಕ್ಕೊವಾಚಿ ಅಭಿವೃದ್ದಿ ಕರುಸ ಕೈನ ತು ಮನೆ ಕದ್ಯೊತೊ ತೊ’" ಕದ್ಯೊ. ಯಾಕೊಬ ತೆ ರಾತೆ ತ್ಯಾಜ಼ ವ್ಹತೊ. ತೆ ಲಾಯಲ ತೆಕ್ಲಾಮಾನು ದಕ್ಹು ತಿನಾ ಭೈನೆ ಎಸಾವನೆ ಕಾಣಿಕೆ ಕರಿನ ಲಿದ್ಯೊ. 200 ಬಕ್ರಿಯೊ 20 ಬಕ್ರಾ 20 ಟಗರೊನಾ ಕ್ಹಾತೆ ದುದ್ದ ಪಿವಾಲಾ, 30 ಹೆಣ್ಣ ಹುಂಟೊ ವರಿ ತ್ಯುನಾ ಬಚ್ಚಾ 40 ಬೈಲೊ 10 ಹೊರಿಯೊ 20 ಹೆಣ್ಣ ಗದ್ಡಾ 10 ಗಂಡ ಗದ್ಡಾ ಎ ಕ್ಹಾರು ಲಿದ್ಯೊ. ಇವ್ಯನೊನೆ ಯಕ್ಕ ಯಕ್ಕ ಗುಂಪ ಕರಿನ ಯಕ್ಕ ಯಕ್ಕ ಗುಂಪ ತಿನಾ ಸೆವಕೊಕನ ವಪ್ಸಿನ ತುಮೆ ಮುತ್ತಿ ಅಗಾ ಜಾ಼ವೊ ವರಿ ಹರಿಯಕ್ಕ ಹಿಂಡ ತಾ ನಕ್ಕರ ದುರ ದುರ ರ‍್ಹವೊ ಕದ್ಯೊ. ಪೈಲಾನಾ ಹಿಂಡನಾ ಉಪ್ಪರ ರ‍್ಹಯಲವಾಲಾನೆ ಮಾರೊ ಭೈ ಎಸಾವನೆ ತಾರಾ ಕ್ಹಾಮೊ ಐನ ತು ಕಿನೊ ಸೆವಕ ವ್ಹೈ? ಕಿಜ್ಗಾ಼ ಚಾ಼ಲ್ಯೊಸ? ತಾರಾ ಕ್ಹಾಮು ರ‍್ಹಯಲ ಎ ಕ್ಹಾರು ಕಿನು ವ್ಹೈ? ಕೈನ ಪುಚ್ಯೊಮ. ತೆಳಾಮ ತು ತೆ ಕ್ಹಾರು ತುಮಾರೊ ಸೆವಕ ಥಯಲ ಯಾಕೊಬನು ವ್ಹೈ ತಿನೊ ಪ್ರಭು ಥಯಲ ಕ್ಹಾರು ಕಾಣಿಕೆ ವ್ಹೈ ಕೈನ ಮೊಕಲ್ಯೊಸ. ತೆ ಹಮಾರಾ ಪಾಚೊ಼ ಆವಾಡೊಸ. ಕೈನ ಉತ್ತರ ದ್ಯು ಕೈನ ಕವಾನು ಅಪ್ಪಣೆ ದಿದ್ಯೊ. ತಿಮ್ಮಜ಼ ಬೆವಾ ವಾಲಾನಾ ತನ್ವಾ ವಾಲಾನಾ ಗುಂಪನಾ ಪಾಚೊ಼ ಗಯಲ ಕ್ಹಾರಾವೊನೆ ತುಮೆ ಎಸಾವನೆ ದೆಕ್ತಾಮಾ ಇನಾನಿಂಗತಜ಼಼ ಕೌ. ತಾರೊ ಸೆವಕ ಥಯಲ ಯಾಕೊಬ ಹಮಾರಾ ಪಾಚೊ಼ ಆವಾಡೊಸ. ಕವೊ ಕೈನ ಅಪ್ಪಣೆ ದಿದ್ಯೊ. ಯಾಕೊಬ ತಿನಾಮಜ಼ ಮಾರಾ ಕ್ಹಾಮೊ ಜ಼ಾವಾನು ಎ ಕಾಣಿಕೆಕ್ಹು ಎಸಾವನೆ ಸಮಾಧಾನ ಕರುಸ ತಿಪರ ತಿನೆ ಮಳತಾಮಾ ಮನೆ ಮಯಾಕ್ಹು ಮಳಸ? ಕೈಲಿದ್ಯೊ. ತಿಮ್ಮ ತೆ ಕಾಣಿಕೆ ತಿನಾ ಕ್ಹಾಮಾತಿ ಗೈ. ತೆ ತೆ ರಾತೆ ತಿನಾ ಝುಪ್ಡಾಮಾ ರ‍್ಹಯೊ.

ಯಾಕೊಬನಿ ಕ್ಹುದಾನಾ ಕ್ಹಾತೆ ಕುಸ್ತಿ

ತೆ ರಾತೆ ತೆ ತಿನಾ ಭಂಬಿ ಬೈಕೊವೊನೆ, ಭಂಬಿ ದಾಸಿಯೊನೆ ವರಿ ತಿನಾ ಗ್ಯಾರಾ ಬಚ್ಚಾವೊನೆಬಿ ಬಲೈಲಿನ ಯಬ್ಬೊಕ ನದಿ ದಾಟ್ಯೊ. ತ್ಯುನೊನೆ, ವರಿ ತಿನಿ ಆಸ್ತಿ ಪುರಾ ದಟಾಯಲ್ಪರ ಯಾಕೊಬ ಯಕ್ಲೊ ಥೈನ ಪಾಚೊ಼ ಹುಬ್ರಲಕ್ಹು ಕಯೊ ಯಕ್ಕ ದಾಣಗೊ ಐನ ತಿನಾ ಕ್ಹಾತೆ ಯುದ್ದ ಕರಾಡೊತೊ ತೆ ದಾಣಗೊ ಪಾಟ ಥಯಲಕ್ಕಾ ತಿನಾ ಕ್ಹಾತೆ ಯುದ್ದ ಕರ‍್ಯೊ. ತೆ ದಾಣಗೊ ನೈ ಜಿತ್ತಾನು ತೆ ದೆಕಿನ ಯಾಕೊಬನಾ ಮಾಂಡಿನಿ ನರ್ರ ಮುಟ್ಟಲಕ್ಹು ಯಾಕೊಬ ತಿನಾ ಕ್ಹಾತೆ ಲಡತಾಮಾ ತಿನಾ ಪಗನಿ ನರ‍್ರ ಸರ‍್ಕಿ. ತೆ ದಾಣಗೊ, 'ಮನೆ ಚೊಡ, ಪಾಟ ಥಾವಾಡಿಸ” ಕತಾಮಾ, ಯಾಕೊಬ, 'ತು ಮನೆ ಆಶಿರ್ವಾದ ಕರೆಲಕ್ಕುನ ಮಿ ತುನೆ ಚೊಡತೊ ನೈ” ಕದ್ಯೊ. ತೆ ದಾಣಗೊ, 'ತಾರು ನಾಮ ಸು ವ್ಹೈ?” ಕೈನ ಪುಚಲ ಕ್ಹು ತೆ, 'ಯಾಕೊಬ” ಕತಾಮಾ, ತೆ ಯಾಕೊಬನೆ, 'ಇನಾ ಉಪ್ಪರ ತು ಯಾಕೊಬ ಕೈನ ಕವೈಲೆತೊ ನೈ; ತು ಕ್ಹುದಾನಾ ಕ್ಹಾತೆ ಬಿ, ಮನಕ್ಹೊನಾ ಕ್ಹಾತೆಬಿ ಯುದ್ದ ಕರಿನ ಜಿತ್ತಲವಾಲೊ ಥಯಲಕ್ಹು ತುನೆ ‘ಇಸ್ರಾಯೆಲ’ ಕೈನ ನಾಮ ಥಾವಸ” ಕೈನ ಕದ್ಯೊ. ಯಾಕೊಬ, 'ತು ತಾರು ನಾಮ ಮನೆ ಕೌ” ಕೈನ ತಿನೆ ಪುಚ಼ಲಕ್ಹು ತೆ, 'ಮಾರು ನಾಮ ಕಾ ಪುಚ್ಚಶಿ?” ಕೈನ ತಿನೆ ತ್ಯಜ಼ ಆಶಿರ್ವಾದ ಕರ‍್ಯೊ. ತೆಳಾಮಾ ಯಾಕೊಬ, 'ಮಿ ಕ್ಹುದಾನೆ ಪ್ರತ್ಯಕ್ಷ ಥಯಲ ದೆಕ್ಯೊಸ್ತೊ; ರ‍್ಹೈತಬಿ ಮಾರು ಜ್ಯು ವಾಚ್ಯುಸ್ತೊ” ಕರಿನ ಕೈನ ತೆ ಜ಼ಗಾನೆ ಪೆನಿಯೆಲ ಕೈನ ನಾಮ ಮ್ಹೆಲ್ಯೊ, ತೆ, ಪೆನುವೆಲನೆ ದಾಟತಾಮಾ ಸುರ್ಯೊ ಹುಟ್ಯೊ. ತೆನೈಸೊ ಯಾಕೊಬ ಮಾಂಡಿನಾ ದುಕ್ಕ ಕ್ಹು ಲಂಗಡ್ತೊ ಚಾಲ್ಯೊ. ತಿನಾಹುತಿ ತೆ ದಾಣಗೊ ಯಾಕೊಬನಿ ಮಾಂಡಿನಿ ನರ್ರ ಮುಟ್ಟಲಕ್ಹು ಇಸ್ರಾಯೆಲೊ ಹಜುನಬಿ ಮಾಂಡಿನಿ ನರ್ರ ನೈ ಖಾತಾ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.