ಆದಿ 29

ಯಾಕೊಬ ಲಾಬಾನನಾ ಘರೆ ಆಯಲ

1ತೆಳಾಮಾ ಯಾಕೊಬ ತಿನು ಪ್ರಯಾಣ ಅಗೊ ಬಡಾಯೊ ತೆ ಪುರ್ವ ದಿಕ್ಮಾ ರ‍್ಹಯಲ ಸಿಮೆಯೆ ಗಯೊ. 2ಯಾಕೊಬ ದೆಕ್ತಾಮಾ ಖೆತರಮಾ ಯಕ್ಕ ಇರ ದಿಕ್ಹಿ ಇರನಾ ನಜಿಕ ತನ್ನ ಬಕ್ರಾವೊನು ಗುಂಪ ಕ್ಹುರಾಯಾತಾ ಬಕ್ರಾವೊನೆ ತೆಜ಼ ಇರನು ಪಾನಿ ಪಿಲಾತಾತಾ ಇರನೆ ಮ್ಹೊಟೊ ದಗ್ಡೊ ಝಾಕಲ ವ್ಹತು. 3ಬಕ್ರಾ ಕ್ಹಾರಾ ಮಳಲಪರ ಕುರಬುರ‍್ಯಾ ಇರಪರ ರ‍್ಹಯಲ ದಗ್ಡೊ ಕಾಡತಾತಾ. ತೆಳಾಮಾ ಬಕ್ರಾ ಕ್ಹಾರಾ ಪಾನಿ ಪಿತಾತಾ. ಬಕ್ರಾ ಪಾನಿ ಪಿದಲ್ಪರ ವರಿ ತೆ ದಗ್ಡೊ ಝಾಕ್ತಾತಾ. 4ಯಾಕೊಬನೆ ತ್ಯಾ ರ‍್ಹಯಲ ಕುರಬುರ‍್ಯಾವೊನೆ 'ಭಾಯೊ ತುಮೆ ಕಿಜಾ಼ನಾ ವ್ಹೈ? ಪುಚ್ಯಾ ತ್ಯುನೆ ಹಮೆ ಹಾರಾನಾವಾಲಾ ವ್ಹೈ” ಕೈನ ಕದ್ಯಾ. 5ಪಾಚಾ಼ತೊ ಯಾಕೊಬ ತ್ಯುನೊನೆ ನಾಹೊರನಾ ನಾತ್ನೊ ಥಯಲ ಲಾಬಾನ ತುಮೊನೆ ಗ್ವತ್ತ ಛೆಸು? ಕೈನ ಪುಚ್ಚಲಹುತಿ ತೆ ಹಮೊನೆ ಗ್ವತ್ತ ಛೆ ಕದ್ಯಾ. 6ಯಾಕೊಬ ತ್ಯುನೊನೆ ತೆ ಅರಾಮ ಛೆ ಸು? ಕೈನ ಪುಚ್ಯೊ. ತ್ಯುನೆ ತಿನೆ ತೆ ಅರಾಮ ಛೆ ಕದ್ಯಾ. ದೆಕ ಬಕ್ರಾವೊನಾ ಕ್ಹಾತೆ ಆವಾಲಿಜ಼ ತಿನಿ ದಿಕ್ರಿ ರಾಹೆಳ ವ್ಹೈ. ಕೈನ ಕದ್ಯಾ. 7ಯಾಕೊಬ ತ್ಯುನೊನೆ ಹಜು಼ ಘನ್ನೊ ವಕ್ಹತ ಛೆ, ಬಕ್ರಾವೊನೆ ಪಾನಿ ಪಿಲೈನ ವರಿ ಚ಼ರೈನ ಆವೊ ಕತಾಮಾ ತ್ಯುನೆ 8ತೆ ಕುರಬುರ‍್ಯಾ ಬಕ್ರಾವೊನಾ ಗುಂಪನೆ ಕ್ಹಾರಾ ಬಕ್ರಾ ಮಳೆಲಕ್ಕಾ ತ್ಯುನೊನೆ ಹಮೆ ಇರಪರ ರ‍್ಹಯೆಲ ದಗ್ಡಾನೆ ಕಾಡಿ ಬಕ್ರಾವೊನೆ ಪಿಲಾ ಸಕತ್ಆ ನೈ. ತ್ಯುನೆ ಕ್ಹಾರಾ ಮಳಲ್ಪರ ಪಾನಿ ಪಿಲೈಯೆಸ. 9ತೆ ತ್ಯುನಾ ಕ್ಹಾತೆ ಬೊಲ್ತಾಮಾ ರಾಹೆಳ ತಿನಾ ಬಾನಾ ಬಕ್ರಾವೊನಾ ಕ್ಹಾತೆ ಐ ತೆ ತ್ಯುನೊನೆ ಚ಼ರಾತಿತಿ. 10ರಾಹೆಳ ಲಾಬಾನನಿ ದಿಕ್ರಿ ವ್ಹೈ ಲಾಬಾನ ಯಕಾಬೊನಿ ಯಾ ಥಯಲ ರೆಬಕ್ಕನೊ ಮ್ಹೊಟೊ ಭೈ ವ್ಹೈ.ಯಾಕೊಬ ರಾಹೆಲನೆ ದೆಕ್ತಾಮಾ ಇರಪರ ರ‍್ಹಯೆಲ ದಗ್ಡೊ ಸರಕಾಯಾ ತಿನಿ ಮಾ ನೊ ಭೈ ಥಯಲ ಲಾಬಾನನಾ ಬಕ್ರಾವೊನೆ ಪಾನಿ ದಿದ್ಯಾ. 11ಯಾಕೊಬ ರಾಹೆಲನೆ ಮಟ್ಟಿಲಿನ ಘನ್ನೊ ಜೊ಼ರ ರೊತೊ ತಿನೆ. 12ಮಿ ತಾರಾ ಬಾನೊ ಭತ್ರಿಜೊ಼ ರೆಬೆಕ್ಕಳನೊ ದಿಕ್ರೊ ವ್ಹೈ ಕೈನ ತಿಳಸಾಯೊ ತೆಳಾಮಾ ರಾಹೆಲ ನ್ಹಾಟಿನ ಗೈನ ತೆ ವಾತ ತಿನಾ ಬಾನೆ ಕದಿ. 13ಲಾಬಾನ ತಿನಿ ಭ್ಹೆನ್ನೊ ದಿಕ್ರೊ ಥಯಲ ಯಾಕೊಬ ಆಯೆಲ ಪೈಲಾಜ಼ ಆಯೆಲ ಐಕಿನ ತಿನೆ ದೆಕಾನಾ ಹುತಿ ನ್ಹಾಟಿನ ಐನ ತಿನೆ ಮಟ್ಟಿಲಿನ ತಿನಾ ಘರೆ ಬಲೈಲಾಯೊ. 14ಯಾಕೊಬ ಲಾಬಾನನೆ ಕ್ಹಾರಾ ಸಂಗತಿಯೊ ತಿಳಸಾತಾಮಾ ಲಾಬಾನ ತಿನೆ ಕ್ಹರಿಮಾಜ಼ ತು ಮಾರಾ ರಗತನೊ ಸಂಭಂಧಿ ಥಯೊಸ ಕೈನ ಕದ್ಯೊ. 15ತೆ ಯಕ್ಕ ಮಹಿನಾ ಲಕ್ಕಾ ಲಾಬಾನಕನಜ಼ ವ್ಹತ್ತೊ. ತೆ ಥಯಲ್ಪರ ಲಾಬಾನ ಯಾಕೊಬನೆ ತು ಮಾರೊ ಸಂಬಂದಿ ವ್ಹೈ ಕೈನ ಸುಕನೊಜ಼ ಸೆವಾ ಕರಾನು ನ್ಯಾಯ ವೈಸು? ತಾರಾ ಕಾಮನಾ ಹುತಿ ಮಿ ತುನೆ ಸು ದ್ಯು? ಕೈನ ಪುಚ್ಯೊ. 16ಲಾಬಾನನೆ ಬೆ ಛೊಕ್ರಿಯೊ ವ್ಹತಿಯೊ ಮ್ಹೊಟಿನು ನಾಮ ಲೆಯಾ ನ್ಹಾನಿನು ನಾಮ ರಾಹೆಲ. 17ಲೆಯಾ ಕವಾಲಿನಾ ಡೊಳಾ ಶಿದಾ ದಿಕ್ಹತಾ ನ್ಹೊತಾ ತೆನೈಸೊ ರಾಹೆಲ ಘನ್ನಿ ಚೊ಼ಕಿ ಸುಂದರ ವ್ಹತ್ತಿ. 18ಯಾಕೊಬ ರಾಹೆಲನೆ ಪ್ಯಾರ ಕರಿನ ತಾರಿ ನ್ಹಾನಿ ದಿಕ್ರಿ ಥಯಲ ರಾಹೆಲನಾ ಹುತಿ ಕ್ಹಾತ ವರಕ್ಹ ಸೆವಾ ಕರುಸ ಕೈನ ಕತಾಮಾ, 19ಲಾಬಾನ ತಿನೆ ಬಿಜ಼ಾನೆ ದಿವಾತಿ ತುನೆಜ಼ ದಿವಾನು ಚೊ಼ಕು ವ್ಹೈ ತಿನಾ ಹುತಿ ತು ಮಾರಾ ಕ್ಹಾತೆ ಜಿವನಾ ಕರತೊ ರ‍್ಹೆ ಕದ್ಯೊ. 20ಇನಾ ನಿಂಗತ ಯಾಕೊಬ ರಾಹೆಲನಾ ಹುತಿ ಕ್ಹಾತ ವರಕ್ಹ ಸೆವಾ ಕರ‍್ಯೊ ತೆ ತಿನೆ ಘನ್ನೊ ಮಯಾ ಕರಲ ಹುತಿ ತೆ ತಿನೆ ದಕ್ಹಾಜ಼ ದಿನ ವ್ಹೈ ಕೈನ ದಿಕ್ಹ್ಯು. 21ಪಾಚ಼ಲ್ತೊ ಯಾಕೊಬ ಲಾಬಾನನೆ ಮನೆ ದಿದಲ ಟೈಮ ಪುರಾ ಥಯು ರಾಹೆಲನಾ ಕ್ಹಾತೆ ಮನೆ ಹಿವಾ ಕರಿನ ಮಾರಾ ಹತಮಾ ದೆ ಕೈನ ಪುಚ್ಯೊ. 22ತೆಳಾಮಾ ಲಾಬಾನ ತೆ ಜ಼ಗಾನಾ ಕ್ಹಾರಾ ಜ಼ನಾವೊನೆ ಬಲೈನ ಕ್ಹಾವಾನು ಕರಾಯೊ. 23ಕ್ಹಾಂಜ಼ನಾ ವಕ್ಹತಮಾ ತಿನಿ ಮ್ಹೊಟಿ ದಿಕ್ರಿ ಥಯಲ ಲೆಯಳನೆ ಯಾಕೊಬನೆ ಒಪಸಿನ ದಿದ್ಯೊ. ತೆ ತಿನಾ ಕ್ಹಾತೆ ರ‍್ಹಯೊ. 24ಲಾಬಾನ ತಿನಿ ದಿಕ್ರಿ ಥಯಲ ಲೆಯಳನೆ ಜಿಲ್ಪಾ ಕವಾಲಿ ಯಕ್ಕ ದಾಸಿನೆ ದಿದ್ಯೊ. 25ಪಾಟೆ ತೆ ಲೆಯಲ ವ್ಹೈ ಕೈನ ಯಾಕೊಬನೆ ಗ್ವತ್ತ ಥಾತಾಮಾ ತೆ ಲಾಬಾನನೆ ಆ ಸು ವೈ ತು ಮಾರಾ ಕ್ಹಾತೆ ಕರಲ? ರಾಹೆಲನಾ ಹುತಿ ತುನೆ ಸೆವಾ ಕರ‍್ಯೊಸ್ತೊ ಕಾ ಮನೆ ಮೊಸ ಕರ‍್ಯೊ ಕೈನ ಪುಚ಼ಲಕ್ಹು. 26ಲಾಬಾನ ಮ್ಹೊಟಿ ದಿಕ್ರಿತಿ ಪೈಲಾ ನ್ಹಾನಿ ದಿಕ್ರಿನೆ ಹಿವಾ ಕರಿನ ದಿವಾನು ಹಮಾರಾ ದೆಶನಿ ಪದ್ದತ ನ್ಹವೈ. 27ತಿನಾ ಹಿವಾನು ಯಕ್ಕ ಹಫತೊ ಪುರಾ ಕರತೆ ಥಯಲ್ಪರ ಮಾರಿ ನ್ಹಾನಿ ದಿಕ್ರಿನೆ ತುನೆ ದ್ಯುಸ. ಅನಾ ಹುತಿ ತು ಹಜುನ ಕ್ಹಾತ ವರಕ್ಹ ಸೆವಾ ಕರ ಕದ್ಯೊ. 28ಯಾಕೊಬ ತೆ ವಾತೆ ಒಪ್ಪಿನ ಮ್ಹೊಟಿನಾ ಹಿವಾನೊ ಯಕ್ಕ ಹಪ್ತಾಪರ. ತೆಳಾಮಾ ಲಾಬಾನ ತಿನಿ ದಿಕ್ರಿ ಥಯಲ ರಾಹೆಲನೆ ಯಾಕೊಬನೆ ಹಿವಾ ಕರಿನ ದಿದ್ಯೊ. 29ಲಾಬಾನ ತಿನಿ ದಿಕ್ರಿ ಥಯಲ ರಾಹೆಲನೆ ಬಿಲ್ಹಾ ಕವಾಲಿ ದಾಸಿನೆಬಿ ದಿದ್ಯೊ. 30ಯಾಕೊಬ ರಾಹೆಲನಾ ಕ್ಹತೆ ಕುಡ್ಯೊ ತಿನೆ ಲೆಯಳತಿಬಿ ಘನ್ನೊ ಪ್ಯಾರ ಕರ‍್ಯೊ. ತಿನಾ ಹುತಿ ಲಾಬಾನ ಕನ್ನ ವರಿ ಕ್ಹಾತ ವರಕ್ಹ ಸೆವೆ ಕರ‍್ಯೊ.

ಯಾಕೊಬನೆ ಹುಟ್ಟಲ ಬಚ್ಚಾ಼

31ಲೆಯಳ ಯಾಕೊಬನೆ ಶೆಂ ನತ್ತಿ ಆವಾಡಿ ಕೈನ ಯಹೊವಾನೆ ದೆಕಿನ ತೆ ಪೆಟೆ ರ‍್ಹಯನಿಂಗತ ತಿನೆ ಆಶಿರ್ವಾದ ಕರ‍್ಯೊ. ತೆನೈಸೊ ರಾಹೆಲ ಗ್ವಡ್ಡ ವ್ಹತ್ತಿ. 32ಲೆಯಳ ಪೆಟೆ ರ‍್ಹೈನ ಪಟ್ಟೊ ಜ಼ನ್ನಿನ ಯಹೊವಾ ಮಾರು ದುಖ ದೆಕ್ಯೊಸ, ಇತ್ತಿ ಉಪ್ಪರ ಮಾರೊ ಮಾಟಿ ಮಯಾ ಕರಸ ಕೈನ ತಿನು ನಾಮ ರುಬೆನ ಕೈನ ನಾಮ ಮ್ಹೆಲಿ. 33ತೆ ವರಿ ಪೆಟೆ ರ‍್ಹೈನ ಬಿಜೆ಼ಕ ಪಟ್ಟಾನೆ ಜ಼ನ್ನಿಮಿ ಮಾಟಿಕ್ಹೊ ಅಲಕ್ಷಾನೆ ಗುರಿ ಥೈಸ ಕೈನ ಯಹೊವಾನೆ ಗ್ವತ್ತ ಥಯುಸ ಕೈನ ಎ ದಿಕ್ರಾನೆ ದಿದ್ಯೊಸ ಕೈನ ತಿನೆ ಸಿಮೆಯೊನ ಕೈನ ನಾಮ ಮ್ಹೆಲಿ. 34ವರಿ ತೆ ಪೆಟೆ ರ‍್ಹೈನ ಪಟ್ಟಾನೆ ಜ಼ನ್ನಿ ಹಮ್ನಾತೊಬಿ ಹಮೆ ಮಾಟಿ ಬೈಕೊ ಯಕ್ಕ ಥೈಯೆಸ ಕೈನ . ತಿನಿ ಮಿ ತನ್ನ ಪಟ್ಟಾ ಜ಼ನ್ನಿತೊ ಕೈನ ತಿನೆ ಲೆವಿ ಕೈನ ನಾಮ ಮ್ಹೆಲಿ. 35ವರಿ ತೆ ಪೆಟೆ ರ‍್ಹೈನ ಪಟ್ಟಾನೆ ಜ಼ನ್ನಿ ಹಮ್ನಾ ಯೆಹೊವನೆ ಉಪಕಾರ ಸ್ತುತಿ ಕರುಸ ಕೈನ ತಿನೆ ಯೆಹುದಾ ಕೈನ ನಾಮ ಮ್ಹೆಲಿ ತೆ ಥಯಲ್ಪರ ತಿನೆ ಬಚ್ಚಾ಼ ಥಾವಾನು ಹುಬ್ರಯು.