Skip to content
BibleKenya

Sikkiligar Bible

ಯಜಕೆಲಾ 47

ದೆವಸ್ಥಾನತು ಆವಾನು ವಕಳೊ

ಪಾಚ಼ಲ್ತೊ ತೆ ಮನೆ ದೆವಸ್ಥಾನನಾ ಬಾಕಲಕನ ವರಿ ಬಲೈಲಿನ ಆಯೊ; ಆಹಾ, ದೆವಸ್ಥಾನನು ಹೊಚ್ಚಲ ಹೆಟಾತೊ ಪಾನಿ ಗೈನ ಪುರ್ವನೆ ಹರದಾಡಾಡುತು ದೆವಸ್ಥಾನ ಪುರ್ವ ಅಭಿಮುಖ ತೆಕ್ಲುಜ಼; ತೆ ಪಾನಿ ದೆವಸ್ಥಾನನಾ ಬಲಗಡೆ ಹೆಟಾತು ಗಯಲ ಯಜ್ಞವೆದಿನಾ ದಕ್ಷಿಣಮಾ ಹರದಾಡಾಡುತು. ತೆಳಾಮಾ ತೆ ಮನೆ ಉತ್ತರ ದಿಕ್ಕ ಹೆಬ್ಬಾಗಿಲತೊ ದೆವಾಲಯನಾ ಭಾರಲ್ಯಾ ವಾಟತು ಸುತ್ತಿಲಿನ ಪುರ್ವ ಹೆಬ್ಬಾಗಿಲನೆ ಬಲೈಲಿನ ಆಯೊ; ತ್ಯಾ ದೆಕಾನೆ ತಿನಾ ಢಾವಾ ಬನಿ ಹಲ್ಲು ಹಲ್ಲು ಹರದಾನು ಪಾನಿ ದಿಕ್ಹ್ಯು. ತೆ ಮನಕ್ಹ ಹತ್ತಮಾ ಹುರಿ ಧರಿಲಿನ ಪುರ್ವನೆ ಪಾಂಚ಼ಕ್ಹೊ ಹತೊ ಅಳತಿ ಕರಿನ ಮನೆ ಪಾನಿನಾ ಹಿಂಗೆನಾ ಬನಿ ದಟಾಡ್ಯೊ; ತ್ಯಾ ಪಾನಿ ಹೆಜ್ಜಿ ಡುಬಾವರ್ಕ್ಹು ವ್ಹತ್ತು. ತೆ ವರಿ ಪಾಂಚ಼ಕ್ಹೊ ಹತೊ ಅಳತಿ ಕರಿನ ಮನೆ ಪಾನಿನಾ ಹಿಂಗೆ ದಟಾಡತಾಮಾ ತೆ ಪಾನಿ ಕುಡ್ಗಾ ಲಕ್ಕಾ ವ್ಹತ್ತು. ತೆ ವರಿ ಪಾಂಚ಼ಕ್ಹೊ ಹತೊ ಅಳತಿ ಕರಿನ ಮನೆ ಪಾನಿನಾ ಹಿಂಗೆ ದಟಾಡತಾಮಾ ಪಾನಿ ಕಂಬರ ಲಕ್ಕಾ ವ್ಹತ್ತು. ತೆ ವರಿ ಪಾಂಚ಼ಕ್ಹೊ ಹತೊ ಅಳತಿ ಕರ‍್ಯೊ;ತೆ ಮಕ್ಹು ದಾಟಾನೆ ನೈ ಥಾವಾನು ತೊರೆ ವ್ಹತ್ತು; ಪಾನಿ ಉಚ್ಚು ಥೈನ ಇಶಾಡಾ ಅಕ್ಲು ಪ್ರವಾಹ ವ್ಹತ್ತು; ದಾಟಾನೆ ನೈ ಥಾವಾನು ತೊರೆ ಥಯುತು. ತೆಳಾಮಾ ತೆ ಮನೆ- ನರನಾ ದಿಕ್ರಾ ಎ ದೆಕ್ಯೊಸ ಸು? ಕೈನ ಪುಚ್ಚಿನ ಮನೆ ತೊರೆನಾ ದಂಡಿಯೆ ಛಡೈನ ಪಾಚೊ಼ ಫರಾಯೊ. ಮಿ ಇಮ್ಮ ರ‍್ಹತಾಮಾ ಆಹಾ, ತೊರೆನಾ ಭಂಬಿ ದಂಡಿಯೊಮಾ ಘನ್ನಾ ಘನ್ನಾ ಝಾಡೊ ದಿಕ್ಹ್ಯಾ. ತೆಳಾಮಾ ತೆ ಮನೆ ಅಮ್ಮ ಕದ್ಯೊ ಎ ಪ್ರವಾಹ ಪುರ್ವ ಗಾಮೆ ಗೈನ ಅರಾಬ ಕವಾನಾ ತಗ್ಗೆ ಉಟ್ರಿನ ಲವಣ ಸಮುಂದರನಾ ಬನಿ ಹರದಸ; ದೆವಸ್ಥಾನತು ಗಯಲ ಪ್ರವಾಹ ಲವಣ ಸಮುಂದರನೆ ಮಳಾಕ್ಹು ತಿನು ಪಾನಿ ಚೊ಼ಕು ಥಾವಸ. ಎ ಪಾನಿ ಕಿಜಾ಼-ಕಿಜಾ಼ ಹರದಸ ತ್ಯಾ ತ್ಯಾ ಗುಂಪ ಗುಂಪ ಥೈನ ಜಾ಼ವಾನಾ ಘನ್ನಾ ತರಾನಾ ಜಲಜಂತೊ ಜಿವ್ತಾ ರ‍್ಹವಸ; ಮಚ್ಲಿಯೊ ಗುಂಪ ಗುಂಪ ರ‍್ಹವಸ. ಎ ಪಾನಿ ಸಮುಂದರನೆ ಪಡ್ತಾಮಾ (ತೆ ಪಾನಿ) ಚೊ಼ಕು ಥಾವಸ; ತೆ ತೊರೆ ಕಿಜಾ಼-ಕಿಜಾ಼ ಹರದಸ ತ್ಯಾ ತ್ಯಾ ಜಿವ ಉಂಟ ಥಾವಸ. ತೆಳಾಮಾ ತೆ ಲವಣ ಸಮುಂದನಾ ದಂಡಿಮಾ ಬೆಸ್ತರೊ ಹುಬ್ರಯಲ ರ‍್ಹವಸ; ಎನಗೆದತೊ ಎನೆಗ್ಲಯಿಮ ಲಕ್ಕಾ ಕ್ಹಾರಿ ದಂಡಿ ಬಲಿ ವಚ್ಚಾವಾನಿ ಜ಼ಗಾ ಥಾವಸ; ಬಿಜಾ಼ ಬಿಜಾ಼ ಮಚ್ಲಿಯೊ ಮಹಾಸಾಗರನಾ ಮಚ್ಲಿಯೊ ನಿಂಗತ ತ್ಯುನೊನೆ ರಾಶಿ-ರಾಶಿ ಥೈನ ಮಳಸ. ತೆನೈಸೊ ತಿನಾ ಸುತ್ತೆ ಜಿಮಿನ ಸೌಳ ತಳಾ ಗಳಾ ನೈ ಥಾತಾ, ತೆ ಮಿಟ್ಟಾನಾ ಗಣಿಯೊ ಥಾವಸ. ಪಾನಿನಾ ಭಂಬಿ ದಂಡಿಯೊಮಾ ಕ್ಹಾರಾ ಫಲನಾ ಝಾಡೊಬೆಳದಸ; ತ್ಯುನಾ ಪಾಲೊ ವರಾತಾ ನೈ, ಫಲ್ಲೊ ಕ್ಹರತಾ ನೈ; ತೊರೆನು ಪಾನಿ ಪವಿತ್ರಾಯಲಮಾತು ಆವಾಕ್ಹು ತೆ ಮ್ಹೈನಾ ಮ್ಹೈನಾಮಾ ನವಾ ನವಾ ಫಲ್ಲೊ ದೆತು ರ‍್ಹವಸ; ತ್ಯುನು ಫಲ ಆಹಾರನೆ ಭಾಜಿಪಾಲೊ ವಕ್ಹಡನೆ ಅನುಕುಲ ಕರಸ.

ಇಸ್ರಾಯೆಲನಾ ಗಡಿ

ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ತುಮೆ ಇಸ್ರಾಯೆಲನಾ ಬಾರಾ ಕುಲನೆ ದೆಶ ಬಾಧ್ಯ ಥೈನ ವಾಟತಾಮಾ ಮೆರೆನೆ ಅನುಸರಿಸು. ಯೊಸೆಫನೆ ಬೆ ಪಾಲ ಮಳಾದೆ. ಮಿ ತುಮಾರಾ ಪಿತೃವೊನೆ ಪ್ರಮಾಣ ಥೈನ ವಾಗ್ದಾನ ಕರಲ ಎ ದೆಶನೆ ತುಮೆ ಕ್ಹಾರಾ ಸರಿಸಮಾನ ಅನುಭವಿಸೊಶಿ; ಎ ತುಮೊನೆ ಸ್ವಾಸ್ತ್ಯ ಥಯನಜ಼ ರ‍್ಹವಸ. ತುಮಾರು ದೆಶ ಮೆರೆ ಅಮ್ಮ ರ‍್ಹೌ ಉತ್ತರ ಮೆರೆ ಮ್ಹೊಟಾ ಸಮುಂದರತು ಶುರು ಥೈನ ಚೆದಾದನಾ ವಾಟಮಾನಾ ಹೆತ್ಲೊನಾ ವಾಟತಾ ಐನ. ಹಮಾತ, ಬೆರೊತ, ದಮಸ್ಕನಾ ಎಲ್ಲೆನೆ ಹಮಾತನಾ ಎಲ್ಲೆನೆ ವಚ್ಮಾನು ಸಿಬ್ರಯಿಮ ಕವಾನಾ ಗಾಮೊಪರ ಹರ್ವಾನನಾ ಸರಹತ್ತನೆ ನಜಿಕ ರ‍್ಹಯಲ ಹಾಚೆರ ಹತ್ತಿಕೊನಿ ಕನ ಕ್ಹರು. ಇಮ್ಮ ಉತ್ತರ ಮೆರೆ ಸಮುಂದರತು ದಮಸ್ಕನಾ ಸರಹದ್ದಮಾ ರ‍್ಹವಾನಾ ಹಚರ ಐನೊನ ಲಕ್ಕಾ ಹಬ್ಬಸ; ತಿನಾ ಉತ್ತರಮಾ ಹಮಾತನು ಗಾಮ ರ‍್ಹವಸ. ಎ ಉತ್ತರ ದಿಕ್ಕ ಗಡಿ ವ್ಹೈ. ಪುರ್ವಮಾ ಹವ್ರಾನ, ದಮಸ್ಕ, ಗಿಲ್ಯಾದ ಎಕ್ಹಾರಾನೆ ಇಸ್ರಾಯೆಲ ದೆಶನಾ ವಚ್ಮಾ ಯೊರ್ದನ ಹೊಳಿ ಎಲ್ಲೆ ಥೈನ ರ‍್ಹವಸ; (ಉತ್ತರ ದಿಕ್ಕ) ಮೆರೆತಾ ಪುರ್ವ ಸಮುಂದರ ಲಕ್ಕಾ ತುಮೆ ಗುರುತ ಘಾಲು. ಎ ಪುರ್ವ ಮೆರೆ ವ್ಹೈ. ಪಶ್ಚಿಮ ಮೆರೆ ತಾಮಾರತೊ ಗೈನ ಮೆರಿಬೊತ ಕಾದೆಶನಾ ತಳಾನಾ ಉಪ್ಪರ (ಐಗುಪ್ತನಾ ಕ್ಹಾಮು ರ‍್ಹವಾನು) ತೊರೆನಾ ವಾಟತಾ ಮ್ಹೊಟಾ ಸಮುಂದರನೆ ಮಟ್ಟು. ಎ ಪಶ್ಚಿಮ ಗಡಿ ವ್ಹೈ. ಪಡುವಲಮಾ (ಪಶ್ಚಿಮ) ಮೆರೆತಾ ಹಮಾತನಾ ವಾಟನೆ ಕ್ಹಾಮಲ್ಯಾ (ಕರಾವಳಿ) ಲಕ್ಕಾ ಮ್ಹೊಟಾ ಸಮುಂದರ ಎಲ್ಲೆ ಥೈನ ರ‍್ಹವಸ. ಎ ಪಡುವಣನು ಮೆರೆ ವ್ಹೈ. ಎ ದೆಶನೆ ತುಮೆ ಇಸ್ರಾಯೆಲನಾ ಕುಲ ಕುಲನೆ ವಾಟು. ತುಮೊನೆಬಿ ತುಮಾರಾ ವಚ್ಮಾ ಪ್ರವಾಸ ಕರ್ತಾ ಬಚ್ಚಾವೊನೆ ಪಡದ್ಯಲ ವಿದೆಶಿಯೊನೆ ದೆಶನೆ ಬಾಧ್ಯ ಥೈನ ವಾಟು; ತ್ಯುನೆ ಇಸ್ರಾಯೆಲನಾ ವಚ್ಮಾ ತುಮೊನೆ ಸ್ವದೆಶಿ ನಿಂಗತಜ಼ ರ‍್ಹೌ; ಇಸ್ರಾಯೆಲನಾ ಕುಲಮಾ ತುಮಾರಾ ಕ್ಹಾತೆ ತ್ಯುನೊನೆ ಸ್ವಾಸ್ತ್ಯ ಥಾವಾದೆ. ಕಯಾಜ಼ ಕುಲಮಾ ವಿದೆಶಿ ಪ್ರವಾಸ ಥೈನ ರ‍್ಹವಸ ತ್ಯಾ ತಿನೆ ಸ್ವಾಸ್ತ್ಯನೆ ದ್ಯು; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.