Skip to content
BibleKenya

Sikkiligar Bible

ಯಜಕೆಲಾ 26

ತುರನಾ ಗಾಮನಾ ವಿರುದ್ದ ಪ್ರವಾದನೆ

ಯೆಹುಯಾಕಿಮನೆ ಜೈಲಮಾ ಘಾಲಿನ ಗ್ಯಾರಾವಾ ವರಕ್ಹನಾ ಕಯಾ ಯಕ್ಕ ಮ್ಹೈನಾನಾ ಪಸ್ಟ ದಿನ್ನಮಾ ಯಹೊವಾ ಎ ವಾಕ್ಯಾ ಮನೆ ದಿದ್ಯೊ. ಮನಕ್ಹನಾ ದಿಕ್ರಾ, ತುರ ಯೆರುಸಲೆಮನಾ ವಿಷಯಮಾ, ಜನಾಂಗೊನೆ ಅಡ್ಡಿ ಥಯಲ ಬಾಕಲ ತುಟಿ ಗಯುಸ! ಮಕನ ಕ್ಹುಲಿ ಗಯುಸ; ಯೆರುಸಲೆಮ ಹಾಳ ಥಯಲಕ್ಹು ಮಿ ಭರಿಲ್ಯುಸ ಕೈನ ಕೈಲಿದಲಕ್ಹು ಕರ್ತಾ ಥಯಲ ಯಹೊವಾ ಅಮ್ಮ ಕವಸ ದೆಕ, ತುರ, ತುನೆ ವಿರುದ್ದ ಥಯೊಸ; ಸಮುಂದರನಾ ಅಲೆಯೊ ಉಟಾಡಲ ನಿಂಗತ ಮಿ ಘನ್ನಾ ಜನಾಂಗೊನೆ ತಾರಾ ಉಪ್ಪರ ಉಟಾಡುಸ. ತೆ ತುರನಾ ಗೊಡಿಯೊನೆ ಪಡಿನ ತಿನಾ ಗೊಪುರೊನೆ ನಾಶ ಕರಿಪಡಸ; ಮಿ ತಿನಿ ಮಾತಿ ಕೆರದಿನ ತೆ ಝಾಡಿನ ಸುಜ಼಼ನೈಸೊ ಕರುಸ; ತೆ ಸಮುಂದರನಾ ವಚ್ಮಾ ಬಲಿಯೊನೆ ಕ್ಹುಕ್ಹಿ ಜ಼ಗಾ ಥಾವಸ; ಮಿಜ಼ ತೆ ದೆಕ್ಯೊಸ ಕೈನ ಕರ್ತಾ ಥಯಲ ಯಹೊವಾ ಕವಸ; ತೆ ಜನಾಂಗೊನೆ ಛತ್ತ ಥಾವಸ; ಬೈಲಭುಮಿನಾ ತಿನಿಯೊ ದಿಕ್ರಿಯೊ ತಲ್ವಾರಕ್ಹು ಕ್ಹಲಾಸ ಥಾವಸ; ಮಿಜ಼ ಯಹೊವಾ ವ್ಹೈ ಕೈನ ಕ್ಹಾರಾವೊನೆ ಗ್ವತ್ತ ಥಾವಸ; ಕರ್ತಾ ಥಯಲ ಯಹೊವಾ ಅಮ್ಮ ಕವಸ ದೆಕ, ರಾಜಾಧಿರಾಜ ಬಾಬೆಲನೊ ರಾಜೊ಼ ಥಯಲ ನೆಬುಕದ್ನೆಚ್ಚರನೆ ಘೊಡಾ, ರಥಾ, ಘೊಡಾ ಚ಼ಲಾವಾಲಾ ಘನ್ನಾ ಮನಕ್ಹೊನು ಪರಿವಾರ ಎ ಕ್ಹಾರಾವೊಕ್ಹು ರ‍್ಹಯಲ ಮಿ ಪುರ್ವ ದಿಕ್ತೊ ತುರನಾ ಉಪ್ಪರ ಆವಾಲಗಾಡುಸ. ತೆ ಬೈಲಭುಮಿಪರ ರ‍್ಹಯಲ ತಾರಿಯೊ ದಿಕ್ರಿಯೊನೆ ತಲ್ವಾರಕ್ಹು ಕ್ಹಲಾಸ ಕರಿನ ತುನೆ ವಿರುದ್ದ ಥೈನ ಒಡ್ಡುಕಟ್ಟ ದಿಬ್ಬಿ ಘಾಲಿನ ಗುರಾಣಿ ಉಚಾವಾಲಾವೊನೆ ವಳೈನ ತಿನಾ ಭಾವ ಕರಾನಾ ಸಾಮನೊಕ್ಹು ತಾರಿ ಪೌಳಿಗೊಡಿನೆ ಮಾರಾಲಗಾಡಿನ ತಿನಾ ಹತಿಯಾರೊಕ್ಹು ತಾರಾ ಗೊಡಿಯೊ ಪಾಡಿಪಡಸ. ತೆ ಹಿಸಾಬ ನೈ ರ್xಯಲ ಘೊಡಾವೊಕ್ಹು ಉಟಲ ಧುಳ ತುನೆ ಝಾಕಸ; ಚಿರೈಗಯಲ ಕೊಟೆಮಾ ದುಶ್ಮನ ವ್ಹಕ್ಕೆ ನಿಂಗತ ತೆ ತಾರಾ ಬಾಕಲೊಮಾ ವ್ಹಕ್ತಾಮಾ ಘೊಡಾ ನ್ಹಾಟಾಕ್ಹು, ಗಾಡಿ, ರಥಾ ಇವ್ನಾ ಅವಾಜ಼ನೆ ತಾರಿಯೊ ಗೊಡಿಯೊ ಹಲ್ಲಸ. ತಿನಾ ಘೊಡಾವೊನಾ ಪಗೊಕ್ಹು ತಾರಿಯೊ ಒಣಿಯೊನೆ ಕ್ಹುಂದಾ ಲಗಾಡಿನ ತಲ್ವಾರಕ್ಹು ತಾರಾ ಮನಕ್ಹೊನೆ ಕ್ಹಲಾಸ ಕರಿನ ತಾರಾ ತಾಕತವರ ದಗ್ಡಾವೊನಾ ಕ್ಹಂಬಾವೊನೆ ಪಾಡಿಪಡಸ. ತಿನಾ ಸೈನಿಕೊ ತಾರಿ ಆಸ್ತಿನೆ ಲುಟಿನ ತಾರಾ ಸಾಮನೊನೆ ಚೊ಼ರಿ ಕರಿನ ತಾರಿಯೊ ಗೊಡಿಯೊನೆ ಪಾಡಿನ ತಾರಾ ಮ್ಹೊಟಾ ಘರೊನೆ ಕಿತ್ತಿನ ತಾರಾ ದಗ್ಡಾ ಝಾಡೊ ಮಾತಿನೆ ಸಮುಂದರನಾ ಪಾಲ ಕರಸ. ಮಿ ತಾರಿ ಗಿದ್ದೊನಿ ಅವಾಜ಼ನೆ ಹುಬ್ರಾಡಿ ಪಡುಸ; ತಾರಿ ಕಿನ್ನರಿಯೊನು ಅವಾಜ಼ ಹಬ್ದಾತಿ ಐಕು ನೈ ಆತಿ. ಮಿ ತುನೆ ಘಟ್ಟ ದಗ್ಡೊ ಕರುಸ; ತು ಬಲಿಯೊನೆ ವರಾವಾನೆ ನಕಾನಿ ಜ಼ಗಾ ಥಾಶಿ; ತಾರಾ ಉಪ್ಪರ ಹಬ್ದಾ ಘರೊ ಭಾಂದತಾ ನೈ; ಯಹೊವಾ ಥಯಲ ಮಿಜ಼ ಅಪ್ಪಣೆ ದಿದ್ಯೊಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಕರ್ತಾ ಥಯಲ ಯಹೊವಾ ತುರನೆ ಅಮ್ಮ ಕವಸ ತಾರಾ ವಚ್ಮಾ ಕೊಲೆ ಥೈನ ದುಕ್ಕೊ ಥಯಲವಾಲಾ ನೆಳ್ಳಾಕ್ಹು ತು ಪಡಾನಾ ಅವಾಜ಼ನೆ ದ್ವಿಪೊ ಹಲ್ಲಿ ಜಾ಼ವಸ ನೈ. ತೆಳಾಮಾ ಸಮುಂದರನಾ ಆಜು಼ ಬಾಜು಼ ರ‍್ಹಯಲ ಕ್ಹಾರಾ ಪ್ರಭುವೊ ತ್ಯುನಾ ಸಿಂಹಾಸನೊಪರ್ತಾ ಉತ್ರಿನ ಉಪ್ಪರಲ್ಯಾ ಅಂಗ್ಡಾ ಕಾಡಿನ ಬುಟೆದಾರಿನಾ ವಣ್ಣಾ ಕಿತ್ತಿನ ನಾಕಿನ ತತ್ತರನೆ ವರಾಡಿಲಿನ ಜಿಮನ ಪರ ಬೈಟಿನ ಕ್ಷಣಕ್ಷಣಬಿ ಕಾಪತೊತುನೆ ಬುಚ್ಕಿನ ಘಾಬ್ರಾ ಥಾವಸ. ಇವ್ನೆ ತಾರಿ ವಿಷಯಮಾ- ಹಡಗೊ ಚ಼ಲಾವಾಲಾವೊನಾ ಘರೊ, ನಾಮ ರ‍್ಹಯಲ ಪುರಿ, ಸಮುಂದರಕ್ಹು ತಾಕತವರ ಥಯಲ ಗಾಮ, ತು ಕೆಕ್ಲುಕಿ ಹಾಳ ಥೈ! ಸಮುಂದರ ಪರ ಫರಾಲಾ ಕ್ಹಾರಾವೊನೆ ಭೆ ಹುಟ್ಸಾವಾವಾಲಾ ಥಯಲ ತಾರಾ ಘರವಾಲಾ ಕೆಕ್ಲಾಕಿ ಹಾಳ ಥಯಾ! ಎ ತಾರಾ ನಾಶ ಥಾವಾನಾ ದಿನ್ನಮಾ ಕರಾವಳಿ ಕಾಪಸ; ತು ನೈ ರ‍್ಹಯಲಕ್ಹು ಸಮುಂದರನಾ ದ್ವಿಪ ಕಾಪಸ ಕವಾನಾ ಶೊಕನು ಗಿದ್ದ ಕವಸ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ಮಿ ತುನೆ ಹಾಳ ಗಾಮ ಕರಿನ ಮನಕ್ಹೊ ನೈ ರ‍್ಹಯಲ ಗಾಮೊನಿ ಗತಿ ಲೈನ ತು ಜಲರಾಶಿಮಾ ಡುಬಿನ ಜಾವಾವರ್ಕ್ಹು ತಾರಾ ಉಪ್ಪರ ಮಹಾ ಸಾಗರ ಆತಾಮಾ ಪೈಲಾನಾ ಕಾಲಮಾ ಹಾಳ ಥಯಲ ಗಾಮೊ ನಿಂಗತ ತುನೆ ಅಧೊಲೊಕಮಾ ಢಕ್ಲಿನ ಪಾತಾಳನೆ ಉರ್ತಲ ಪೈಲಾನಾ ಕಾಲವಾಲಾವೊನಾ ಕ್ಹಾತೆ ರ‍್ಹವಾ ವರ್ಕ್ಹು ಕರುಸ; ಹೊ, ತು ತಾರಾ ಮಹಿಮಾನೆ ಜಿವಲೊಕಮಾ ನೆಲೆ ಕರ‍್ಯಾಬಗರ ನೈ ರ‍್ಹಯಲವಾಲಾ ನಿಂಗತ ತುನೆ ಪಾತಾಳನೆ ಉತ್ರಲವಾಲಾವೊನಾ ಸವಾಸಮಾ ಮಳೌಸ. ತುನೆ ಘನ್ನೊ ನಾಶ ಕರುಸ; ತು ನೈ ರ‍್ಹಯಲ ನಿಂಗತ ಥಾಶಿ; ಕಕ್ಲಾ ಹುಡಕಯಾ ತಬಿ ತು ಕೆಳಾಮಾಜ಼಼ ಮಳ್ತಿ ನೈ;ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.