Skip to content
BibleKenya

Sikkiligar Bible

ಯಜಕೆಲಾ 17

ಹದ್ದೊ ವರಿ ದ್ರಾಕ್ಷಿ ಬಳ್ಳಿನಿ ಸಾಮ್ಯ

ಯಹೊವಾ ಆಂ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ, ತು ಇಸ್ರಾಯಲ ವಂಶವಾಲಾವೊನೆ ಆ ಸಾಮ್ಯ ಒಗ್ಗಟ ನಿಂಗತ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ರುಂದ ರ‍್ಹಯಲ ವರಿ ಲಾಂಬು ರ‍್ಹಯಲ ರೆಕ್ಯಾ ರ‍್ಹಯಲ ಪಿಚ್ಚಾ಼ ಭರಲ ಘನಾ ಕರಲನಿ ಘಾರ ಲೆಬನೊನಿನೆ ಐನ ದೆವದಾರು ಝಾಡನಾ ಉಪ್ಪರಲ್ಯಾ ಠೊಂಗಿನೆ ಕಿತ್ತ್ಯು; ಉಪ್ಪರಲಿ ತುದಿನಾ ಚಿರಗನೆ ಕಡ್ಡಿನ ವ್ಯಾಪಾರ ಕರಾನಾ ದೆಶೆ ಲಿನ ಗೈನ ಘನ್ನು ವರ್ತಕರ ರ‍್ಹವಾನಾ ಗಾಮಮಾ ಮ್ಹೆಲಿ ಪಡಿ. ಪಾಚಾ಼ತು ತೆ ತೆ ದೆವದಾರು ರ‍್ಹಯಲ ದೆಶನಾ ಯಕ್ಕ ಬಿಯೊ ಲಿನ ಫಲ ರ‍್ಹಯಲ ನಿರಾವರಿ ಜಿಮಿನಮಾ ಲಗಾಡಿನ ಚೊ಼ಕು ಬೆಳದ್ಯು. ತೆ ಗುಂಚಲೊಥೈನ ಬೆಳದಿನ ದ್ರಾಕ್ಷಿಯೊ ಘನ್ನಾ ಫೈಲಿನ ತಿನಾ ರೆಂಬಾವೊನೆ ತೆ ಘಾರನಾ ಕನ ಚಾಚಿನ ತಿನಾಹಟು ತಿನಾಬೆರೊನೆ ಛೊಡ್ಯು; ತೆ ಲತೆ ಥೈನ ರೆಂಬಾವೊನೆ ಫೈಲೈನ ಚಿಗರೊನೆ ಮೊಕ್ಲಯು.

ರುಂದ ರ‍್ಹಯಲ ರೆಕ್ಯಾ ರ‍್ಹಯಲ ಪಿಚ್ಚಾ಼ ಭರಲ ವರಿಯಕ್ಕ ಮ್ಹೊಟಿ ಘಾರ ವ್ಹತ್ತಿ; ಹಮ್ನಾ ತೆ ದ್ರಾಕ್ಷಿನು ತೆ ನಾಟಿ ಲಿದಲ ಪಾತಿಯೊಮಾತಿ ತಿನಾ ಬಗಲ ತಿನಾ ಬೆರೊನೆ ಫರೈನ ತಿನಾ ರೆಂಬಾವೊನೆ ಚಾಚಿನ ತಿಕ್ಹು ಪಾನಿನೆ ಉರಾಡಾತಿತಿ. ತೆ ಘನ್ನು ಹಸರ ಥೈನ ರೆಂಬೆನೆ ಫೈಲೈನ ಫಲ ದಿವಾನೆ ಅನಕುಲ ರ‍್ಹಯಲ ಚೊಕು ನಿರಾವರಿ ಜಿಮಿನಮಾ ಹುಟ್ಯತು. ಎ ವಾತನೆ ಕೆ ಕರ್ತಾ ಥಯಕಲ ಯಹೊವಾ ಅಮ್ಮ ಕವಸ ತೆ ಸಮೃದ್ದಿ ಥೈನ ರ‍್ಹವಸ? ತೆ ಕದಲ ಘಾರ ತಿನಾ ಬೆರೊನೆ ಕಿತ್ತಿನ ತಿನಾ ಫಲನೆ ಕತ್ರಾನೆ ತೆ ಕ್ಹುಕ್ಹೈನ ತಿನಾ ಪಾಲೊ ಬಾಡತಾ ನೈಸು ತೆ ಬೆರನಾ ಕ್ಹಾತೆ ಕಿತ್ತಾವಸ; ಘನಿ ತಾಕತಕ್ಹು ನೈ ಘನಾ ಮನಕ್ಹೊಕ್ಹು ನೈ. ಹುಟ್ಟಲ ತೆ ಲತೆ ಬಿ ಸಮೃದ್ದಿಕ್ಹು ರ‍್ಹವಸ? ಕೆಟ್ಟ ವಾರೊ ಆತಾಮಾ ಬಾಡ್ತಾ ನೈ? ಬೆಳದಲ ಜಿಮಿನಮಾಜ ಕ್ಹುಕ್ಹೈ ಜಾ಼ವಸ.

ಸಾಮ್ಯನು ಮತ್ಲಬ

ಯಹೊವಾ ಹಜಿಯಕ್ಕ ವಾಕ್ಯಾ ಮನೆ ದಿದ್ಯೊ ದ್ರೊಹಿ ವಂಶವಾಲಾವೊನೆ ಆಂ ಮನಕ್ಹೊನೆ ಅಮ್ಮ ಕೆ ಇನು ಅಬಿಪ್ರಾಯ ತುಮೊನೆ ಗೊತ್ತ ನತ್ತಿ ಸು? ಹಮ್ನಾ ಬಾಬಿಲೆನೊ ರಾಜೊ಼ ಯರುಸಲೆಮನೆ ಐನ ತ್ಯಾನಾ ರಾಜಾವೊನೆ ಮಂತ್ರಿಯೊನೆ ಧರಿನ ಬಾಬಿಲೊನನೆ ಲಿನ ಗಯೊ. ವರಿ ರಾಜ ವಂಶವಾಲಾಮಾ ಯಕ್ಲಾನೆ ಇನಿನ ತಿನಾಕ್ಹಾತೆ ಒಡಂಬಡಿಕೆ ಕರಲಿನ ತಿನಾಕ್ಹು ಕ್ಹಮ್ಮ ಘಲೈನ ಇನು ರಾಜ್ಯ ಉಪ್ಪರ ಉಟೆವಾಚಿ ಒಡಂಬಡಿಕೆನೆ ಪಾಲಸಲಕ್ಹು ಹುಬ್ರೆತಾ ನೈಕೈನ ತೆ ಗಾಮ್ನಾ ತಾಕತವಾಲಾವೊನೆ ಗಡಿಪಾರ ಕರಾಯೊ. ತೆನೈಸೊ ತೆ ಬಾಬೆಲೊನನಾ ರಾಜಾನಾ ಉಪ್ಪರ ಫರಿನ ಪಡಿನ ಘೊಡಾವೊನೆ ಘನಾ ಸೈನಿಕೊನೆ ಅಪೊನೆ ದಿದ್ಯಾಸ ಕೈನ ಐಗುಪ್ತ ರಾಜಾ಼ನಾ ದುತೊನೆ ವಳಾಯೊ. ಆಂ ಸಮೃದ್ದಿಕ್ಹು ರ‍್ಹವಸ? ಹವಾ ಕಾಮೊನೆ ಕರಲವಾಲೊ ಪಾರಥಾವಸ? ಒಡಂಬಡಿಕೆನೆ ಮಿರಲವಾಲೊ ತಪ್ಸಿಲಿದ್ಯೊಸ? ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಾರೊ ಜಲಮ, ಆಂ ಕಿನಾಕ್ಹು ರಾಜೊ಼ ಥೈನ ನೆಮ್ಸಲ ವ್ಹೈ, ಕಿನೆ ಘಾಲಲ ಕ್ಹಮ್ಮನೆ ಇನ್ಕಾರ ಕರ್ಯೊ, ಕಿನು ಒಡಂಬಡಿಕೆ ಮಿರ‍್ಯೊ, ತೆ ರಾಜಾಕನ , ಕದ್ಯಾಮ ಬಾಬೆಲೊನ ಕವಾನಾ ತಿನಾ ರ‍್ಹವಾನಾ ಜ಼ಗಾಮಾ ಎ ಮರಾನು ಖಚಿತ ವ್ಹೈ. ಫರೊಹನ ತಿನು ಮ್ಹೊಟಿ ಸೆನಾ ಮ್ಹೊಟು ಪರಿವಾರ ಐನ ಘನಾ ಮನಕ್ಹೊನೆ ಮಾರಾನಾಹುತಿ ಗುಬ್ಬಾವೊನೆ ಘಾಲಿನ ಗೊಡಿಯೊ ಭಾಂದ್ಯಾ ಯುದ್ದ ಕ್ಹೆಲ್ತಾಮಾ ಇನೆ ಸುಜ಼ ಮದದ ಥೈಯು ನೈ. ಎ ಘಾಲಲ ಕ್ಹಮ್ಮನೆ ಇನ್ಕಾರಿನ ಒಡಂಬಡಿಕೆನೆ ಇನ್ಕಾರ್ಯೊ ನೈ; ಹತ್ತಪರ ಹತ್ತ ಮ್ಹೆಲ್ಯಾಮಾ ಸು? ಎ ಕ್ಹಾರು ಕರಿನ ಛೊಡ್ಯೊಸತೊ? ಎ ಪಾರ ಥಾವಸ. ಇಮ್ಮ ರ‍್ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಾರಾ ಕ್ಹಮ್ಮಬಿ, ಮನೆ ದಿದಲ ಕ್ಹಮ್ಮ ತೆ ಇನ್ಕಾರಿನ ಮಾರಾ ಒಡಂಬಡಿಕೆನೆ ಇನ್ಕಾರಲ ದೊಷ ತಿನಾ ಮಾತಾಪರ ಭಾಂದುಸ. ಮಿ ತಿನೆ ಮಾರಾ ಜಾಲಮಾ ಘಾಲುಸ, ಮಿ ಘಾಲಲ ಜಾಲಮಾ ಕ್ಹಾಪ್ಡಸ. ಮಿ ತಿನೆ ಬಾಬೆಲೊನನೆ ಲೈನ ತಿನಾ ಕ್ಹಾತೆ ಬೊಲಿನ ತೆ ಮನೆ ಕರಲ ಅಪರಾದನೆ ತಿನಾಪರ ಘಾಲುಸ. ತಿನಿ ಸೆನಾ ಕ್ಹಾರಿ ಭಿಕ್ಹರೈನ ನ್ಹಾಟಿನ ಗೈನ ತಲ್ವಾರನೆ ಗುರಿಥಾವಸ; ಉಗ್ರಲವಾಲಾವೊನೆ ಕ್ಹಾರಿ ಜ಼ಗಾ ವಾರಾಮಾ ಭಿರಕೈ ಪಡುಸ; ಎ ವಾತ ಕದಲ ಯಹೊವಾ ಥಯಲ ಮಿಜ ಕೈನ ತುಮೊನೆ ಗೊತ್ತ ಥಾವಸ.

ಕ್ಹುದಾನಿ ವಾಗ್ದಾನನೊ ಬರೊಕ್ಹೊ

ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಿಜ ಉಚ್ಚು ಥಯಲ ದೆವದಾರು ಝಾಡನಾ ಉಪ್ಪರ ರ‍್ಹಯಲ ಟೊಂಗಿನೆ ಕಾಡಿನ ತಿನೆ ಗಾಡುಸ; ತುದಿನಾ ಟೊಂಗಿಯೊಮಾ ಕ್ಹಾರಾತಿ ಚೊಕು ರ‍್ಹಯಲ ಚಿವುಟಿ ಚೊಕು ರ‍್ಹಯಲ ಡೊಂಗರನಾ ಉಪ್ಪರ ಗಡೌಸ; ಮಿ ತಿನೆ ಇಸ್ರಾಯಲನಾ ಡೊಂಗರಪರ ಘಾಲಾನೆ ತೆ ಚೊಕು ರ‍್ಹಯಲ ದೆವದಾರು ಝಾಡ ಟೊಂಗಿಯೊನೆ ಫೈಲೈನ ಫಲ ದಿವಸ; ತಿಮಾ ಘನಾ ತರನಾ ಪಕ್ಷಿಯೊ ರ‍್ಹತಾ ತಿನಾ ಟೊಂಗಿಯೊನಿ ಛೌಲಿನು ಆಸ್ರೊ ಥಾವಸ. ತೆಲಾಮಾ ಯಹೊವಾ ಥಯಲ ಮಿ ಉಚ್ಚು ರ‍್ಹಯಲ ಬಗ್ಸಾಡಿ ಬಗ್ಗಲನೆ ಉಚ್ಚು ಕರಿನ ಹಸರ ರ‍್ಹಯಲನೆ ಕ್ಹುಕ್ಹೈನ ಕ್ಹುಕ್ಹಾಯಲನೆ ಬೆಳಸಾಯೊಸ ಕೈನ ಹರಯಕ್ಕ ಝಾಡೊ ತಿಳ್ದಸ;

ಎ ಯಹೊವಾ ಥಯಲ ಮಿಜ ಕೈನ ಚಲಾಯೊಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.