Skip to content
BibleKenya

Sikkiligar Bible

ಎಸ್ತರ 4

ಎಸ್ತರ ಯಹುದಿಯೊನೆ ಮದತ ಕರಾನೆ ವಪ್ಪಲ

ಮೊರ್ದೆಕೈ ಥಯಲ ಕ್ಹಾರು ಐಕ್ಯಲಪರ ತಿನಾ ವಣ್ಣಾ ಫಾಡಿಲಿನ, ಕೊತ್ಳೊ ಸುತ್ತಿಲಿನ, ರಾಕ ಮಾತಾಪರ ಘಾಲ್ಲಿನ, ಗಾಮನಾ ವಚ್ಮಾ ಜಾ಼ತೊ ಘನ್ನೊ ದುಖಕ್ಹು ರಯೊ. ಕೊತ್ಳೊ ಭಾಂದಿಲಿದಲವಾಲಾ ಮಹೆಲನಾ ಮ್ಹೈ ಜೌ಼ನೈ ಕೈನ ಅಪ್ಪಣೆ ಥೈತಿ. ತಿನಾಹುತಿ ತೆ ಮಹೆಲನಾ ಬಾಕಲನಾ ಕ್ಹಾಮೊ ಆಯೊ. ಕಯಾ-ಕಯಾ ಸಂಸ್ಥಾನೊಮಾ ರಾಜಾ಼ನಿ ಆಗನ್ಯಾ ವರಿ ತಿರ್ಮಾನ ವ್ಹತ್ತು ತ್ಯಾ ಕ್ಹಾರಿ ಜ಼ಗಾ ಯೆಹುದ್ಯೊಮಾ ಘನ್ನು ದುಖ, ಉಪಾಸ, ತ್ರಾಸ ವರಿ ಗೊಳಾಟ ಥಯು. ಘನ್ನಾ ಜ಼ನಾ ಕೊತ್ಳಾ ವಚೈ಼ನ ರಾಕ ಘಾಲ್ಲಿನ ತಿನಾ ಉಪ್ಪರ ಬೆಟ್ಯಾ.

ಎಸ್ತೆರನಿ ಮದದ ಮಾಂಗ್ಯಲ ಮೊರ್ದೆಕೈ

ಎಸ್ತೆರನಾ ಸೆವಕಿಯೊ ದೆಕಭಾಲ ಕರಾಲ್ಯೊ ರಾಣಿ ಥಯಲ ತಿಕನ ಐನ ಎ ಸುದ್ದಿ ತಿಳ್ಸಾತಾಮಾ ತೆ ಘನ್ನಿ ಕಳವಳ ಥೈನ ಮೊರ್ದೆಕೈನೆ ವಣ್ಣಾ ವಳೈನ, ಕೊತ್ಳೊ ಕಾಡಿಲಿನ, ಆಂ ವಣ್ಣಾ ಘಾಲ್ಲೆ” ಕೆ ಕೈನ ವಳೈ. ತೆನೈಸೊ ತೆ ವಣ್ಣಾ ಲಿದ್ಯೊ ನೈ. ತೆಳಾಮಾ ತೆ ರಾಜಾ಼ಕ್ಹು ತಿನಾ ಸೆವಾನಾಹುತಿ ನೆಮಕ ಕರಲ ಹತಾಕ ಕವಾನಾ ರಾಜ಼ ಕಂಚಕಿನೆ ಬಲೈನ, "ತು ಮೊರ್ದೆಕೈ ಕನ ಗೈನ ಇನೆ ಕಾರಣ ಸು ವ್ಹೈ ಕೈನ ಪುಚ್ಚಿನ ಆ” ಕೈನ ವಳೈ. ಹತಾಕ ಮಹೆಲನಾ ಕ್ಹಾಮೊ ರ‍್ಹವಾನು ಗಾಮನಾ ಅಂಗಳಾ ಕನ ಮೊರ್ದೆಕೈ ಕನ ಗಯೊ. ಮೊರ್ದೆಕೈ ತಿನೆ ಥಯಲ ಕ್ಹಾರು, ಹಾಮಾನ ಯೆಹುದ್ಯೊನೆ ನಾಶ ಕರಾನೆ ರಾಜಭಂಡಾರನೆ ದ್ಯುಸ ಕೈನ ಕದಲ ರುಪ್ಪಾನಾ ದೊಕ್ಡಾ ಅಕ್ಲು ವ್ಹೈ ಕವಾನು ತಿನೆ ಕದ್ಯೊ. ತಿನಾಕ್ಹಾತೆ ತ್ಯುನೊನೆ ಖಲಾಸ ಕರಾನಾಹುತಿ ಶುಶನಮಾ ಥಯಲ ರಾಜಶಾಸನ ಯಕ್ಕ ಕಾಗತ ದಿನ, "ಎ ಎಸ್ತೆರನೆ ದೆಕಾಡಿನ ಕೆ; ವರಿ ತೆ ರಾಜಾ಼ಕನ ಗೈನ ತಿನಿ ಕೃಪಾ ದೆಕಾಡಾನಾಹುತಿ ತಿನಾ ಸನ್ನಿದಿಮಾ ತಿನಾ ಮನಕ್ಹೊನಾಹುತಿ ಮಾಂಗಿಲಿವಾದೆ” ಕೈನ ವಳಾಯೊ. ಹತಾಕ ಫರಿನ ಐನ ಎಸ್ತೆರನೆ ಮೊರ್ದೆಕೈನಾ ವಾತೊ ತಿಳ್ಸಾಯೊ. ಎಸ್ತೆರ ತಿನೆ ವರಿ ಮೊರ್ದೆಕೈಕನ ವಳೈನ, "ರಾಜಾ಼ನೆ ತಿಕನ ಆವಾನೆ ಕದ್ಯೊತೊ ತೆನೈಸೊ ತಿಕನ ಮ್ಹೈನಾ ಪ್ರಕಾರೆ ಜಾ಼ವಾಲಾ ಮರಣ ದಂಡನೆ ಪಾತ್ರ ಥಾವಸ ಕವಾನಿ ಯಕ್ಕಜ಼ ನಿಯಮ ಕ್ಹಾರಾ ಹೆಣ್ಣ ಗಂಡನೆ ಛೆ. ಕಿಕನ ತೆ ತಿನಾ ಸುವರ್ಣ ಲಾಕ್ಡು ವಚಾ಼ವಸ ಕ್ಹಾಲಿ ತ್ಯುನೆ ಜಿವ್ತಾ ರ‍್ಹವಸ ಕವಾನು ರಾಜಾ಼ನಾ ಕ್ಹಾರಾ ಸೆವಕೊನೆ ವರಿ ಸಂಸ್ಥಾನನಾ ಕ್ಹಾರಾ ಮನಕ್ಹೊನೆ ಗ್ವತ್ತ ಛೆ. ಮನೆತಬಿ ಮುವತ್ತ ದಿನ್ನತಾ ರಾಜಾ಼ಕನ ಜಾ಼ವಾನೆ ಬಲಾಯಲ ನತ್ತಿ” ಕೈನ ಕದಿ. ಹತಾಕ ಎಸ್ತೆರನಾ ವಾತೊ ಮೊರ್ದೆಕೈನೆ ಕದ್ಯೊ. ತೆ ಎಸ್ತೆರನೆ, "ಕ್ಹಾರಾ ಯೆಹುದ್ಯೊ ನಾಶ ಥಯಾತಬಿ ಮಿ ಯಕ್ಲಿ ರಾಜ಼ ಮಹೆಲಮಾ ರ‍್ಹವಾಕ್ಹು ವಾಚು಼ಸ ಕೈನ ತಿಳ್ದಿಲ್ಯು ನಕೊ. ತು ಹಮ್ನಾ ಗಪ್ಪ ರ‍್ಹೈ ಪಡಿಮ ಬಿಜಿ ಜ಼ಗಾತಿ ಯೆಹುದ್ಯೊನೆ ಸಹಾಯ, ವಿಮೊಚನೆ ಥಾವಸ; ತು ಸುತಬಿ ಮಾರಾ ಬಾನಾ ಘರವಾಲಾವೊನಾ ಕ್ಹಾತೆ ನಾಶ ಥಾಶಿ. ಎನೈಸೊ ತು ಹವಾ ಟೈಮನಾಹುತಿ ಗಾಮೆ ಆಯೊವಸ” ಕೈನ ವಳಾಯೊ. ತೆಳಾಮಾ ಎಸ್ತೆರ ಮೊರ್ದೆಕೈನೆ, "ತು ಗೈನ ಶುಶನಮಾ ಮಳಾನಾ ಯೆಹುದ್ಯೊನೆ ಮಳಾ; ತುಮೆ ಕ್ಹಾರಾ ತನ್ನ ದಿನ್ನ ರಾತ-ಪಾಟ ಅನ್ನ ಪಾನಿ ಛೊಡಿನ ಮಾರಾಹುತಿ ಉಪವಾಸ ಕರೊ; ತಿನಾನಿಂಗತ ಮಿ ಮಾರಿ ಸೆವಕಿನಾ ಕ್ಹಾತೆ ಉಪಾಸ ರ‍್ಹೌಸ. ತೆ ಥಯಲ್ಪರ ಮಿ ನಿಯಮ ದಾಟಿನ ರಾಜಾ಼ಕನ ಜೌ಼ಸ, ಮರಿಮ ಮರುಸ” ಕೈನ ಕದಿ. ಮೊರ್ದೆಕೈ ಪಾಚೊ಼ ಫರಿನ ಎಸ್ತೆರ ಕದಲ ತಿಮ್ಮಜ಼ ಕರ‍್ಯೊ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.