Sikkiligar Bible
ಅಪೊಸ್ತಲೊ 22
"ವಿಶ್ವಾಸಿಯೊ ವರಿ ಬಾಪೊ, ಹಮ್ನಾ ಮಿ ಕವಾನಿ ಸಮರ್ಥನೆನಿ ವಾತ ವ್ಹೈ ಕೈನ ಕದ್ಯೊ. ತೆ ತ್ಯುನಾ ಕ್ಹಾತೆ ಹಿಬ್ರಿಯ ಭಾಶೆಮಾ ಬೊಲಾನು ಐಕೊ ತ್ಯುನೆ ವರಿ ಶಾಂತ ಥೈಗೈಯಾ. ತೆಳಾಮಾ ತೆ ಸು ಕದ್ಯೊಮ;
ಮಿ ಯಹುದಿ ವ್ಹೈ. ಕಿಲಿಕ್ಯನಿ ತಾರ್ಸಮಾ ಹುಟ್ಟಲ ವ್ಹೈ,ತೆನೈಸೊ ಎ ಗಾಮ್ಮಾ ಬೆಳದಲವಾಲೊ. ಗಮಲಿಮಾ ಪಾದ ಸನ್ನಿದಿಮಾ, ಅಪ್ನಾ ಪಿತೃವೊನಾ ಧರಮಶಾಸ್ತ್ರಮಾ ಪುರಾ ಶಿಕ್ಷಣ ಲಿದ್ಯೊ; ತುಮೆ ಕ್ಹಾರಾ ಹಮ್ನಾ ಕ್ಹುದಾನಾ ಹುತಿ ಅಭಿಮಾನ ರ್ಹಯಲವಾಲಾವೊನಿಂಗತ, ಮಿಬಿ ಅಭಿಮಾನಿ ಥಯೊಸ. ಎ ವಾಟಮಾ ರ್ಹಯಲವಾವೊನೆ ತ್ರಾಸ ದಿವಾಲೊ ಥೈನ ದಾಣ್ಗಾವೊನೆ ವರಿ ಬಾಕ್ಡಿಯೊನೆ ಬೆಡಿಯೊ ಘಾಲಿನ, ತ್ಯುನೊನೆ ಜೆಲ್ಮಾ ಘಲಾತೊ ವ್ಹತ್ತೊ, ಖಲಾಸ ಕರಾನೆಬಿ ಪಾಚೊ಼ ಸರಕ್ತೊ ನ್ಹೊತೊ ತೆಕ್ಲೊ ತ್ರಾಸ ದೆತೊತೊ. ಇನಾಹುತಿ ಮಾಹಾ ಯಾಜಕ, ಮ್ಹೊಟಿ ಸಬೆವಾಲಾ ಮನಕ್ಹೊ ಸಾಕ್ಷಿಯೊ ಥಯಾಸ; ತ್ಯುನಾ ಹುತಿಜ಼ ಮಿ ದಮಸ್ಕಮಾ ರ್ಹಯಲ ವಿಶ್ವಾಸಿಯೊನೆ ಪತ್ರೊ ಕಾಳ್ಳಿನ, ತ್ಯಾ ಗಯಲವಾಲಾವೊನೆ ಬೆಡಿಯೊಕ್ಹು ಭಾಂದಿನ ಶಿಕ್ಷಾನಾ ಹುತಿ ಯೆರೊಸೆಲಿಮೆ ಲೌ ಕೈನ ಜಾ಼ವಾಲೊ.
ಪೌಲ ತಿನಾ ಬದಲಾವಣೆನಾಹುತಿ ಕವಸ
(26:12-18)
ಮಿ ಪ್ರಯಾಣ ಕರ್ತೊ ದಮಸ್ಕನಾ ನಜಿಕ ಆತಾಮಾ ದುಪಾರ ಥೈತಿ ತೆಳಾಮಾ ಹಬಾಳಮಾತು ಯಕ್ಕ ಮ್ಹೊಟು ಉಜಾಲು ಮಾರಾ ಸುತ್ತೆ ಫೈಲಿ ಗಯು. ಮಿ ಜಿಮಿನಪರ ಪಡ್ಯೊ ತೆಳಾಮಾ, ಸೌಲಾ, ಸೌಲಾ ಮನೆ ಕಾ ತ್ರಾಸ ದಿವಾಡ್ಯೊಸ? ಕದಲ ಮಿ ಆವಾಜ಼ ಐಕ್ಯೊ. ತಿನಾಹುತಿ ತೆ ಉತ್ತರ ದಿದ್ಯೊ; ಕರ್ತಾ, ತು ಕುನ ವ್ಹೈ? ಕೈನ ಪುಚ್ತಾ಼ಮಾ ತೆ; ತು ತ್ರಾಸ ದಿವಾನು ನಜ಼ರೆತನೊ ಯೆಸು ಮಿಜ಼ ಕೈನ ಕದ್ಯೊ. ಮಾರಾ ಕ್ಹಾತೆ ರ್ಹಯಲವಾಲಾ ಹುಜಾಲು ಯಕ್ಕಜ಼ ದೆಕ್ಯಾ, ಮರಾ ಕ್ಹಾತೆ ಬೊಲಲವಾಲಾನು ಅವಾಜ಼ ಐಕ್ಯಾ ನೈ. ತೆಳಾಮಾ ಮಿ; ಕರ್ತಾ, ಮಿ ಸು ಕರು? ಕೈನ ಪುಚ್ತಾ಼ಮಾ ಕರ್ತಾ ಮನೆ; ತು ಉಟಿನ ದಮಸ್ಕಮಾ ಜಾ಼. ತು ಸು ಕರು ಕೈನ ಕವಾನು ತುನೆ ತ್ಯಾ ಕವಸ ಕದ್ಯೊ. ತೆ ಉಜಾಲಾನಿ ಮಹಿಮಾಕ್ಹು ಮನೆ ಡೊಳಾ ನೈ ದಿಕ್ಹಲ ಹುತಿ ಮನಾರಾ ಕ್ಹಾತೆ ರ್ಹಯಲವಾಲಾ ಮಾರೊ ಹತ ಧರಿನ ದಮಸ್ಕನಾ ಗಾಮ್ಮಾ ಹತ ಧರಿನ ಲಿನ ಗಯಾ.
ತೆ ಗಾಮಮಾ ಅನನಿಯ ಕವಾಲೊ ಯಕ್ಕ ತ್ಯಾ ಧರಮಶಾಸ್ತ್ರನೆ ಕರೆಟ್ಟ ಚಾ಼ಲಾಲಾ, ತೆ ಜ಼ಗಾನಾ ಕ್ಹಾರಾ ಯಹುದಿಯೊಕ್ಹು ಚೊ಼ಕೊ ವ್ಹೈ ಕೈನ ಕವೈಲಿದಲ ನಾಮ ಅನ್ಯನಿಯ ಕವಾಲೊ ಮನಕ್ಹ ವ್ಹತ್ತೊ. ಹುಬ್ರೈನ; ಭೈ ಥಯಲ ಸೌಲಾ ತಾರಾ ಡೊಳಾ ದಿಕ್ಹಾದೆ. ತೆಳಾಮಾಜ಼ ಮಾರಾ ಡೊಳಾ ದಿಕ್ಹ್ಯಾ, ಮಿ ತಿನೆ ದೆಕ್ಯೊ. ತೆಳಾಮಾ ತೆ; ಹಮಾರಾ ಪಿತೃವೊನೊ ಬಾ, ತಿನಿ ಚಿತ್ತ ತು ತಿಳ್ದಿಲಿವಾನೆ, ತೆ ಕ್ಹರಿ ರ್ಹಯಲವಾಲಾನೆ ದೆಕಾನೆ ತಿನಾ ಮ್ಹೊಡಾಮಾತಿಯೊ ಆವಾನಿಯೊ ವಾತು ಐಕಾನೆ ಮನೆ ನೆಮಶ್ಯೊಸ. ತು ದೆಕಿನ ಐಕಲ ಕ್ಹಾರ ಮನಕ್ಹೊನಾ ಕ್ಹಾಮೊ ತು ಸಾಕ್ಷಿ ಕೌ ಹಮ್ನಾ ತು ಕಾ ತಡಾ ಕರಡ್ಯೊಸ? ಉಟಿನ ಕರ್ತಾನು ನಾಮ ಕೈಲಿವಾಲೊ ಥೌ ಕೈನ ಬಾಪ್ತಿಸ್ಮ ಕರೈಲಿನ ತಾರು ಪಾಪ ಧವೈಲೆ ಕೈನ ಕದ್ಯೊ ತಿನಾಹುತಿ ಪ್ರಾರ್ಥನಾ ಕರ್ಯೊ.
ಬಿಜಾ಼ಮನಕ್ಹೊನೆ ಬೊದನೆ ಕರಾನಾಹುತಿ ಪೌಲಾ ಬಲಾವಾನು
ತೆ ಥಯಲ್ಪರ ಮಿ ಯೆರುಸಲಿಮೆ ಫರಿನ ಐನ ದೆವಾಲಯಮಾ ಪ್ರಾಥನಾ ಕರ್ತಾಮಾ ಯಕ್ಕ ದರ್ಶನ ಥೈಯು. ಮಿ ಪ್ರಭುನೆ ದೆಕ್ಯೊ ತೆ; ತು ಭೆಗಿನ ಯೆರುಸೆಲಿಮಾತೊ ಗೈಪಡ ಮರಾಹುತಿ ತು ಕವಾನಿ ಸಾಕ್ಷಿ ತ್ಯುನೆ ವಪ್ಪಿಲೆತಾ ನೈ ಕದ್ಯೊ. ತಿನಾಹುತಿ ಮಿ,ಕರ್ತಾ, ಕ್ಹಾರಾ ಸಭಾಮಂದಿರಮಾ ತಾರಾ ಉಪ್ಪರ ಬರೊಕ್ಹೊ ಮ್ಹೆಲಾವಾಲಾವೊನೆ, ಮಿ ಜೆಲ್ಮಾ ಘಲಾತೊ ವರಿ ಮಾರ ಕ್ಹಲಾತಾಮಾ ವರಿ ತುನೆ ಸಾಕ್ಷಿಥಯಲ ಸ್ತೆಫನು ರಗತ ನಾಕತಾ ಟೈಮ್ಮಾ, ಮಿ ಕ್ಹಾಮೊ ಹುಬರೈನ ತೆ ಸಮ್ಮತಿಸಿ,ತಿನೆ ಮಾರೆಲವಾಲಾನಾ ವಣಾ ಕಾಯಿದಾಡೊತೊ. ಕವಾನು ತ್ಯುನೆ ಗೊತ್ತಥಯಲವಾಲಾ ವ್ಹತ್ತಾ. ತೆಳಾಮಾ ಪ್ರಭು ಮನೆ ಕದ್ಯೊ; ತು ಜಾ಼,ಮಿ ದುರ ಯೆಹುದಿಯೊ ನೈಸೊ ಮನಕ್ಹೊ ಕನ ವಳಾವಸ ಕೈನ ಕದ್ಯೊ.
ತ್ಯಾ ಲಕ್ಕಾ ಪೌಲಾನಿಯೊ ವಾತೊ ಕತಾಮಾ ವಾತೊನೆ ಕಾನ ದಿನ್ನ ಐಕ್ಯಾ ಐಕಿನ ಚಾಲಾಡಾ ತಾ. ತೆಳಾಮಾ ತಿನೆ ಜಿಮಿನಮಾತಾ ಭಾರಾಕಾಡಿಪಡು. ತೆ ಜಿತೊ ರ್ಹವಾನೆ ಯೊಗ್ಯ ನತಿ ಕೈನ ವದರಿವ ಕದ್ಯಾ. ತ್ಯುನೆ ಅಡತಾ ತ್ಯುನಾ ವಣಾ ಪ್ಹಾಡಿಲೆತಾ ಮಾತಿ ಭಿರಕಾತಾ ರೊಮ್ಮನಾ ಶತಾದಿಪತಿ ಆಗನ್ಯೆ ದಿವಸ ಮನಕ್ಹೊ ಪೌಲಾನೆ ವಿರುದ್ದ ಥೈನ ವದರತ್ತಾ ರ್ಹತಾಮಾ ಅದಿಕಾರಿ ತಿಳಿದಿಲಿನ ಆತ್ತಾಮಾ ತಿನೆ ಕೊಟೆಮಾ ಲೈನ ಬಾರಕೊಲಕ್ಹು ಮಾರಿನ ವಿಚಾರಣೆ ಕರಿಯೆ ಕೈನ ಅಪ್ಪಣೆ ದಿದ್ಯೊ. ತ್ಯುನೆ ಪೌಲಾನೆ ಬಾರಕೊಲಕ್ಹು ಭಾಂದಿನ ತಿಕನ ಹುಬರೈಲ ಶತಾದಿಪತಿನೆ ; ರೊಮಾಪುರನೊ ಮನಕ್ಹ ನ್ಯಾಯ ವಿಚಾರ ಕರೆವ್ಯಾಚಿ ಬಾರಕೊಲಕ್ಹು ಮಾರಾ ಲಗಾಡಾನು ಕಯು ನ್ಯಾಯ ವ್ಹೈ? ಕದ್ಯೊ.
ಶತಾಧಿಪತಿ ತೆ ವಾತೊ ಐಕಿನ ಅದಿಕಾರಿಕನ ಗೈನ "ತು ಸು ಕರುಕೈನ ಛೆ? ತೆ ಮನಕ್ಹ ರೊಮಾಪುರವಾಲೊ ವ್ಹೈ.
ತೆಳಾಮಾ ಅದಿಕಾರಿ ಪೌಲಾನಾ ಕ್ಹಾಮೊ ಐನ. ತು ರೊಮಾಪುರನೊ ಹಕ್ಕದಾರ ವೈಸು "ಮನೆ ಕೆ ಕೈನ ತಿನೆ ಪುಚ್ಯೊ ತೆ ಹೊ ಕೈನ ಕದ್ಯೊ.
ತೆಳಾಮಾ ತೆ ಅದಿಕಾರಿ ಕದ್ಯೊ, ಮಿ ಘನ್ನಾ ದೊಕಡಾ ದಿನ್ನ ತೆ ಹಕ್ಕ ಮಿ ಲಿದ್ಯೊಸ ಕತಾಮಾ ಪೌಲಾ ಮಿತೊ ರೊಮಾಪುರ ಹಕ್ಕದಾರ ಥೈನ ಹುಟೆಲವಾಲೊ ವ್ಹೈ ಕದ್ಯೊ.
ತಿನೆ ಮಾರಿನ ವಿಚಾರ ಕರಿನ ಆಯೆಲ ಪರ ತೆಳಾಮಾ ತಿನೆ ಛೊಡಿಪಾಡ್ಯಾ. ತೆನೈಸೊ ತೆ ರೊಮಾಪುರನೊ ಹಕ್ಕದಾರ ವ್ಹೈ ಕೈನ ತಿಳ್ದಿನ ಆತ್ತಾಮಾ ತೆ ತಿನೆ ಭಾಂದಿನ ಘಾಲತ್ತಾಮಾ ಸೆನಾಧಿಪತಿ ನೆ ಬುಚುಕು ಹುಟ್ಯು.
ಪರಿಶತ್ತನಾ ಕ್ಹಾಮೊ ಪೌಲಾ
ಮರ್ನಾ ದಿನೆ ಪಾಟೆ ಪೌಲಾನೆ ವಿರುದ್ದ ಯೆಹುದಿಯೊ ಕೈಜ಼ ತಪ್ಪಘಾಲಾನಾ ವಿಷಯಮಾ ಕ್ಹರಿನಿಜ಼ ಸಂಗತಿ ತಿಳದಿಲಿವಾನಾ ಹುತಿ ಅದಿಕಾರಿ ಮರ್ನಾದಿನ್ನೆ ತೆ ತಿನಾ ಬೆಡಿಯೊ ಕಾಡಿನ ಖಾಸ ಯಾಜಕ, ಯೆಹುದಿಯೊನಾ ಮ್ಹೊಟಾ ಸಬೆವಾಲಾ ಕುಡಿನ ಆವಾನಾ ಹುತಿ ಅಪ್ಪಣೆ ದಿನ ಪೌಲಾನೆ ಬಲೆಲಿನ ಗೈನ ತ್ಯುನಾ ಕ್ಹಾಮೊ ಹುಬಾರಾಡ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.