Sikkiligar Bible
2 ಕೊರಿಂಥ 13
ಲಾಸ್ಟನಿಯೊ ಗ್ಯಾನನಿಯೊ ವಾತೊ ವರಿ ಆಶಿರ್ವಾದ
ಹಮ್ನಾ ಮಿ ತುಮೊಕನ ಆವಾನು ತನ್ವಾ ಸಲಾ ವ್ಹೈ. ಕಯುಬಿ ದುರ (ಅಪವಾದ) ರ್ಹಯುತುಬಿ ತಿನಾಹುತಿ ತಿನೆ ಬೆ ನೈತೊ ತನ್ನ ಸಾಕ್ಷಿಯೊ ರ್ಹೌ ಕೈನ ಬರ್ದಲ ಛೆ. ಮಿ ತುಮೊಕನ ಬೆವಾಸಲಾ ಆತಾಮಾ, ಪಾಪಕರಲವಾಲಾವೊನೆ ವರಿ ಬಿಜಾ಼ವೊನೆಬಿ ಹುಶಾರಕಿ ಕರ್ಯೊ. ಹಮ್ನಾ ದುರ ರ್ಹಯುತಬಿ ವರಿ ಹುಶಾರಕಿ ಕರಾಡ್ಯೊಸ. ವರಿ ನಿ ಫರಿನ ಆತಾಮಾ ತ್ಯುನೊನೆ ಶಿಕ್ಷಾದಿದ್ಯಾವಾಚಿ ರ್ಹತೊ ನೈ. ಕ್ರಿಸ್ತಯೆಸುಜ಼ ಮಾರಾ ಮುಕಾಂತರ ಬೊಲಸ ಕವಾನು ತುಮೊನೆ ಸಾಕ್ಷಿ ಚಾ಼ಯೆ ನೈ? ಯೆಸುಕ್ರಿಸ್ತ ತುಮಾರಿ ವಿಶಯಮಾ ದುರ್ಬಲ ವ್ಹೈಕೈನ ವರ್ತನೆ ಕರ್ಯೊನೈ. ತಾಕತವರ ಥೈನ ತುಮೊಮಾ ಛೆ. ಕವಾನು ಎಜ಼ ಆಧಾರ ವ್ಹೈ. ಬಲಹಿನ ರ್ಹತಾಮಾ ತ್ಯುನೆ ಶಿಲುಬಿಪರ ಚ಼ಡಾಯಾ ಕವಾನು ಕ್ಹರಿ ವ್ಹೈ. ತೆನೈಸೊ ಕ್ಹುದಾನಿ ತಾಕತಕ್ಹು ತೆ ಜುವ್ತೊ ಛೆ. ಕ್ರಿಸ್ತಯೆಸುಮಾ ಅಪೆ ಬಲಹಿನ ವ್ಹೈ ಸು? ತೆ ನೈಸೊ ತುಮಾರಿ ವಿಶಮಾ ದೆಕ್ತಾಮಾ ಕ್ಹದಾನಿ ತಾಕಕ್ಹು ಯೆಸುಸ್ವಾಮಿನಾ ಕ್ಹಾತೆ ಜಿವ್ತಾ ಛೆ. ತುಮಾರಿ ವಿಸ್ವಾಸಿ ಜಿವನಮಾ ತಮಾರಿಕ್ಹು ತುಮೊನೆಜ಼ ಪರಿಕ್ಷಾಕರಿನ ದೆಕೊ. ತುಮಾರು ಅಂತರಂಗ ಪರಿಕ್ಷಾ ಕರಿನ ದೆಕೊ.ತುಮೊಮಾ ಕ್ರಿಸ್ತಯೆಸು ತುಮೊಮಾ ಛೆ. ತುಮೆ ವಳಕ್ಯಾಸ ನೈ? ತೆ ತುಮೊಮಾ ನೈ ರ್ಹವತ್ತೊ ತುಮೆ ಕೆಟ್ಟ ಮನಕ್ಹೊಜ಼ ವ್ಹೈ. ಹಮೆತೊ ಕೆಟ್ಟ ನ್ಹವೈ ಕೈನ ತುಮೊನೆ ಗ್ವತ್ತ ಛೆ ಕೈನ ಮಿ ಬರೊಕ್ಹೊ ಕರುಸ. ತುಮೆ ಕಯುಜ಼ ಕೆಟ್ಟ ಕರುನೈ ಕೈನ ಕ್ಹುದಾನೆ ಪ್ರಾಥನಾ ಕರುಸ. ತಿಮಾ ಯಕ್ಕಜ಼ ಅಪೆ ಚೊ಼ಕಾ ವ್ಹೈ ಕೈನ ಉದ್ದೆಶ ಹಮೊನೆ ನತ್ತಿ. ಹಮೆ ಕೆಟ್ಟ ವ್ಹೈ ಕೈನ ಕವೈಲಿದ್ಯಾತಬಿ ತುಮೆ ಚೊ಼ಕುಜ಼ ಕರು ಕೈನ ಹಮಾರು ಉದ್ದೆಶ ವ್ಹೈ. ಕ್ಹರಿ ಬಗಲ ರ್ಹೈನ ತಿನಾ ವಿರುದ್ದ ಹಮೆ ಸುಜ಼ ಕರ್ತಾ ನೈ. ತುಮೆ ಕ್ಹರಜ಼ ಬಲಾಢ್ಯ ರ್ಹಯಾಮ ಹಮೆ ಬಲಹಿನ ರ್ಹಯಾತಬಿ ಹಮೊನೆ ಖುಶಿ ವ್ಹೈ. ತುಮೆ ಕ್ರೈಸ್ತವಿಸ್ವಾಸಿಯೊಮಾ ಪರಿಪುರ್ಣ ಥೌ ಕವಾನುಜ಼ ಹಮಾರಿ ಪ್ರಾಥನಾನು ಉದ್ದೆಶ ವ್ಹೈ. ತಿನಾಹುತಿಜ಼ ತುಮೊಕನ ಆವಾತಿ ಪೈಲಾಜ಼ ಅ ಕ್ಹಾರು ಬರ್ದಾಡ್ಯೊಸ.ತುಮೊನೆ ಹಾಳಕರಾಹುತಿ ನ್ಹವೈ. ತುಮೊನೆ ಉಟಾಡಾನಾ ಹುತಿ ಪ್ರಭು ಮನೆ ಅದಿಕಾರ ದಿದಲ ವ್ಹೈ.ಕೆಳಾಮಾಜ಼ ತುಮಾರಾ ಕ್ಹಾಮೊ ಐನ ಮನೆ ರ್ಹಯಲ ಅದಿಕಾರ ಕಠಿನ ಥೈನ ಉಪಯೊಗ ಕರಾನು ಮಾರು ಉದ್ದೆಶ ನ್ಹವೈ. ಲಾಸ್ಟಮಾ ಭಾಯೊ ಖುಶಿಕ್ಹು ರ್ಹವೊ ಪರಿಪುರ್ಣ ಕರ್ಲಿವೊ ಧೈರ್ಯಕ್ಹು ರ್ಹವೊ ಯಕ್ಕಜ಼ ಮನಸಕ್ಹು ರ್ಹವೊ ಸಮಾದಾನ ಕ್ಹು ರ್ಹವೊ ತೆಳಾಮಾ ಮಯಾಕ್ಹು ರ್ಹಯಲ ಶಾಂತಿದಾಯಕ ರ್ಹಯಲ ಕ್ಹುದಾ ತುಮಾರಾ ಕ್ಹಾತೆ ರ್ಹವಸ. ಮಯಾನಿ ಮಟ್ಟಿ ದಿನ ಯಕ್ನೆ ಯಕ್ಕ ವಂದನೆ ಕರೊ. ಕ್ಹುದಾನಾ ಮನ್ಹೊ ತುಮೊನೆ ಶುಭಾಶಯ ಕದ್ಯಾಸ. ಅಪ್ನೊ ಪ್ರಭು ಯೆಸು ಕ್ರಿಸ್ತನೊ ಆಶಿರ್ವಾದ ಕ್ಹುದಾನಿ ಮಯಾ ಪವಿತ್ರ ಆತ್ಮಾನಿ ಅನ್ಯುನ್ಯೆತೆ ತುಮಾರಾ ಕ್ಹಾರಾವೊನಾ ಕ್ಹಾತೆ ರ್ಹವಾದೆ. ಅಪ್ನೊ ಪ್ರಭು ಯೆಸುಕ್ರಿಸ್ತನಾ ಬಗಲ್ತಿ ಆಲಯ ವರಾ ಕ್ಹುದಾನಿ ಮಯಾ, ಪವಿತ್ರ ಆತ್ಮಾನಿ ಅನ್ಯುನ್ಯತೆ ತುಮಾರಾ ಕ್ಹಾತೆ ರ್ಹವಾದೆ..
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.