Bushinganyanya 6

II. Salomoni n’okulongereza obushinganyanya

Abâmi bakwânîne balongereze obushinganyanya

1Muyumve mwe bâmi, muyumvîrhize bwinjà. Mucîyîgîrize, mwe bâmi b’e mahanga. 2Murhege okurhwiri mwe murhegeka embaga, mwe mulimbira obunji bw’engabo zinyu. 3Nyakasane ye wamuhâga obuhashe, n’obukulu, Ow’Enyanya wamuhâgabo, Yêne ye walola emikolo yinyu anasingirize enkengêro zinyu, 4N’akabâga oku muli barhonyi omu bwâmi bwâge, murharhegekaga n’obushinganyanya, murhakulikiraga irhegeko, murhanakulikiraga enjira y’obulonza bwa Nyamuzinda, 5akolaga amuhonera n’obukali bwoshi buzira kulâliza. Bulya nêci abanênênè bâyîsh’itwîrwa olubanja n’obukali1, 6omunyinyi, olukogo bamubêrîre lunarhume ababalirwa; ci abarhegesi bayish’ihanwa bwenêne. 7Bulyâla Omukulu w’abakulu arharhînya ndi, ntâye arhinyira obunene: abanyinyi n’abanênênè yêne wabajiraga, boshi kuguma abashîbirira; 8abanya-buhashe badôsibwa n’obuhashe bulushîne. 9Mwe mhwizire obwo, mw’oyo mwe bâmi, kuderha nti muyîgîrize obushinganyanya mulek’ihirima; 10bulyâla ababika bwinjà ebitagatîfu, bâyîsh’iboneka oku bali batagatîfu; n’abacîyîgîrizâbyo, bâmanyiramwo kurhi bishuza. 11Mucîfinjage ebinwa byâni, mubisîme mwâkûlamwo ihano.

Obushinganyanya bwône buciyêrekana

12Oburhimanya kulabuka bulabuka, burhanajakwo ngisha. Ababurhonya barharham’ibubone, bwône buciyêreka ahabulonza. 13Kucirhangira bucîrhangîra abacîfinjirebwo, bunarhang’ibà bo buciyêrekana. 14Owazukiriza àbulonza sêzi-sêzi arhakarhama, ho abushanga butamire aha lusò. 15Okubumalîra obushiru, bwo bwîrhonzi bwimâna, n’owalâla oku cîko bwo burhuma, arhakarham’ifuma entanya. 16Bwône bunajè hoshi hoshi, bulonze2 balya babukwânîne, bunajè aho bucîyerekebwo n’enshagali omu njira, bucîrhangire buj’ibugâna enkengêro zâbo zoshi. 17Bulyâla omurhangiro gwâbo mwinjà, kucîfinja okubuyiga n’okulonza okubumanya, kwo na kuburhonya, 18n’okuburhonya kwo na kulanga amarhegeko gâbo, n’okushimba amarhegeko gâbo kwo kurhafà kwoshi okwo, 19n’okurhafà kunahise omuntu hali Nyamuzinda, 20ntyo, olwifinjo lw’oburhimanya lunahise omuntu kwo obwâmi. 21Akabâga entebe n’amashungwè binamusîmîse mwe barhegesi b’amashanja, mukenge oburhimanya, lyo muyîma emyâka n’emyâka.

Omuhigo gw’okumanyîsa oburhimanya

22Nkolaga naganira oburhimanya buli cici na kurhi bwameraga; amahwe gâbo ntagafulike, nashimbûlira enshando zâbo kurheng’emurhondêro, n’oku bumanywa nakuhira ahabona ntanaderhe nti ngere kuli n’okuli; 23nanga ntagere njira nguma n’obwâgalwa burhuma omuntu ahorha3, kulya kubà burhimbanwa n’oburhimanya. 24Okuluza abarhimanya, kwo kucira kw’igulu, n’omwâmi murhimanya gwo murhûla gw’olubaga. 25Mulekage ebi binwa byâni bimuyîgîrize: mwabikûlamwo obunguke.