Bushinganyanya 10

III. Obushinganyanya bwa Nyamuzinda omu nsiku za mîra

Kurhenga Adamu kuhika Mûsa

1Omuntu murhanz’iremwa wa Nyamuzinda, îshe w’igulu1, oku aciri yêne mulume, obushinganyanya bwamulanga, bwanamurhenza omu câha câge 2bwamuhà n’emisî y’okurhegeka byoshi. 3Enkola-maligo mpu yacîkûla oku bushinganyanya n’oburhè n’oburhè, yaherêrekera n’omungo gw’okuyîrha mwene wâbo2. 4Amango igulu lyalohomaga erhi ye rhuma, kandi bushinganyanya bwaligalukire, bwageza omushinganyanya omu mîshi, oku irumbi mpu murhi3. 5N’amango amashanja gayumvanyagya omu bubî galinda gacigusha haguma4, kandi burhimanya bwagabwinemwo omushinganyanya, bwamulanga buzira izâbyo omu masù ga Nyamuzinda, bwamuzibuhya ahima omurhima gw’olukogo lw’omwâna wâge. 6Amango bazigululaga enkola-maligo oburhimanya bwaciza omushinganyanya erhi bayâka omuliro5 gwamanukiraga Bishagalabirhanu, ye Pentapolis. 7Ecêrekanè c’obwo bubî: haciri ecihugo calibwîre citumbûka mugî, emirhi y’eco cihugo enakaz’irhengakwo amalehe garhayera; n’oku kukengêza olw’embula-buyêmêre, enshusho y’omunyu6 eciba eyimanzire. 8Abantu mpu bayâka enjira y’oburhimanya, bacîhêka omu njira yâbahamisa ebinja, basigira abazîne akakengêzo k’isirhe lyâbo7, na ntyo, amabî gâbo garhaciyôrhaga mafulike. 9Oburhimanya bwôhe bwalîkûza abambali oku malibuko g’amarhangulo. 10Burhimanya bwalangûlaga omushinganyanya enjira nnungêdu, erhi ayâka ho na halya omujina gwa mukulu wâge8, bwanamuyêrekeza obwâmi bwa Nyamuzinda, bwamuhà n’okumanya ebitagatîfu. Bwamurhabala okuyâza emmanja zâge, n’okubêrwa omu mirimo yâge, 11Oburhimanya bwamucinga oku babisha bali mpu bamunyâge, bwanamuhà omwandu gw’ebirugu. 12Bwamucinga oku bashombanyi na kuli balyâla bali mpu bamurhezire, bwanamuhimira entambala ndârhi mpu lyo amanya oku ntâbyo burhahima. 13Oburhimanya burhalikiriraga omushinganyanya amango bâli bamuguzize9, cikwône bwamucinga oku câha. 14Bwayandagalira bo naye omu mpamikwa, burhanamulikiriraga omu mugozi, ciru bwamuhisa oku ishungwè ly’obwâmi n’oku buhashe bw’okurhegeka abarhegesi bakâg’imulibuza burhanzi, ciru bwayîgîriza n’âbâli bamushobesire obunywesi, bwanamuhà irenge ly’ensiku n’amango.

Amango g’olubungo lw’okurhenga e Mîsiri

15Bwo bwakûlaga olubaga lutagatîfu lw’entagengwa omu nfune z’olubaga lwakâg’ilulibuza. 16Bwo bwâjaga omu murhima gw’omushinganyanya wa Nyakasane, bwakoza n’ebimanyîso n’ebisômerîne abâmi badârhi. 17Bwo bwahâga abatagatîfu oluhembo lw’omurhamo gwâbo, bwabageza omu njira y’okurhangâza bwanababêra mâkiro g’omûshi na bumoleke bwa nyenyêzi budufu. 18Bwo bwabayikizagya enyanja ndukula, bwanabageza omu mîshi manji. 19Bwazisa abashombanyi bâbo bwanabashala barhenga omu musima gw’enyanja. 20Entagengwa zashokôla enkola-maligo, zacîtakîra izîno lyâwe litagatîfu, Nyakasane, n’okuboko kwâwe kwabalikûzagya bacitakirakwo na murhima muguma. 21Obushinganyanya erhi bwamâdumûla akanwa k’orhuduma, erhi bwamânalikûla olulimi lw’ebirhaba.