BurhSira 51

Okucîtakîra kw’omunkwa

1Nkola nilkuvuga omunkwa, Yâgirwa Mwâmi, nakukuza, Nyamuzinda, Muciza wâni, 2Wàndwirîre, wanfungira, wandîkûza omu mîno ga nyamulûmbà, wantenza omu murhego gw’olulimi lubî, wankûla ekanwa k’abanywesi; wanyimangira embere z’abangosire, wanciza, 3omu lukogo lwâwe lunji n’oku bukuze bw’izîno lyâwe, wandîkûza omu kanwa k’abayashamire mpu bandye, wantenza omu maboko g’abanshimbire mpu banyîrhe, omu malibuko goshi nabwîne, 4wankûla ecîko nnankola ndi buhuba, wankûla omu muliro muhangala! 5wandîkûza oku lulimi lw’obulyâlya, n’oku nderho z’obunywesi. 6- kalimi ka balenzi omu bwâmi.- Nashugunuka olufù, omûka gwâni gwagalukira aha nshinda-burhambi. 7Bangorha nieshi, nabula n’ecirhabîre; nalola eyi n’eyi nti nkaba nabo­na owîrhu wantabâla, namubula. 8Ka lêro ntakengera obwonjo bwâwe, Nyakasane k’emirenge, emikolo yâwe ya kurhenga ensiku n’amango, nakengêra oku we ciza abakulangâlira, obakûle omu maboko g’abashombanyi. 9Omusengero gwâni gwayînamukira emund’oli, nashenga nti ondîkûze omu lufù. 10Nashenga Nyakasane, îshe wa Nnâhamwîrhu, nti: «Orhantibe omu nsiku z’amalibuko, omu nsiku z’abacîbonyi n’abalenzi. Nâkuza izîno lyâwe ngasi mango, nâcîtakîriralyo, mvuge omunkwa». 11Omusengero gwâni gwayankirirwa, wantenza ekuzimu, wandîkûza oku mango g’obubî. 12Co cirhumire nacîtakîra, nkuvuge omunkwa, nkuze izîno lya Nyakasane.

Olulanga lw’oburhimanya

13Omu busole bwâni, erhi nabaga nabalama, nantangishenga, nsengere n’obwâlagale oburhimanya. 14Nabusengerera aha lusò lw’ecirhînyiro: na kuhika olusiku lwâni luzinda erhi bwo nankulikire. 15Amango bwàli buyâsize, nka muzâbîbu guyanyire, omurhima gwâni gwabusîma. Amagulu gâni gajà omu njira ekubûsire, kurhenga ebusole bwâni erhi burhimanya nnongereza. 16Naburhega okurhwiri, nanabuhâbwa, nahika oku nyigîrizo nyinji. 17Nagenda bwinjà bwo burhumire, nakuza owampaga oburhimanya. 18Bulya narhôzire omuhigo gw’okubukulikira, nalongereza n’obushiru enjira y’aminjà, ntà mango nâbulabule. 19Iroho lyâni lyabulwira, nacîsêza okushimba irhegeko, nayinamulira amaboko enyanya, nahuna obwonjo oku buhwinja bwâni. 20Omurhima gwâni gwayerekera emunda buli, nabushimâna n’omurhima gucîre; bw’obûla nkulikîre kurhenga emurhondêro, co ca­rhuma ntasigala omu marhabi, 21Nayekemba enda erhi bwo burhuma, nabushimâna, narhimâna ebinja. 22Nyamuzinda ampîre, ampà engalo y’olulimi lw’okumukuza, 23Muyishe emunda ndi, mwe bahwinja, mujè omu masomo gâni. 24Cirhumire mucijira bakenyi, n’obwo enyôrha y’oburhimanya emugwêrhe? 25Nabumbwîre akanwa nti nderhe: gulagi, burhafà nsaranga1, 26mugombe ecikanyi ah’idako ly’omurhamba, muyigîrizibwe, enyigîrizo hôfi hôfi ninyu ziri. 27Ninyu mwene mucîbonere: mubwîne okuntarhamaga bwenêne, nabul’ibona obuluhûkiro bw’enkwîra. 28Muhâne birugu binji oku nyigîrizo, zammuhisa oku mwandu gw’amasholo. 29Omurhima gwinyu, gurhimûkwe n’olukogo lwa Nyakasane, murhabâga nshonyi z’okumukuza. 30Mujire omukolo gwinyu oku amango garhacihika, olusiku hano luyisha, ammuhà. oluhembo lwinyu. Nyakasane akuzibwe emyâka yoshi, n’izîno lyâge liyimbwe kurhenga oku iburha kujà oku lindi iburha.

Omunwe muzinda: Burhimanya bwa Yezu! Mwene-Sira.