BIBLIYA NTAGATIFU OMU MASHI
Lulanga lwa 99
Nyamuzinda, Mwâmi mushinganyanya na Mutagatîfu
Nyakasane ayîmire, amashanja gadwîrhe gageramwo ogwa nyegenye. Atamîre oku nyanya lya bakerubi1: igulu lidwîrhe lyajuguma.
Nyakasane arhabâ ntindi omu Siyoni, ye nakulîre amashanja goshi. Izîno lyâge ligashâne, lirhali nshâhu balirhînye: liri litagatîfu.
Ye yîmire omuzibu osîma obushinganyanya, wafundisire ebinwa bishingânîne, muli Yakôbo obushinganyanya buli bwâwe, n’emmanja we zitwa.
Mulengeze Nyakasane Nnâmahanga wîrhu, mufukamirize aha cisinde ahirakwo amagulu: ciri citagatîfu.
Mûsa na Aroni bali omu badâhwa bâge, Samweli naye àli muli balya bàkazâgiyâkûza izîno lyâge. balya bàkazâgiyâkûza izîno lyâge naye anabayumvirhize.
Akazibashambâza anali omu nkingi y’ecitù: bakaziyumva amarhegeko gâge, bakaziyumva oku abarhegesire.
Yâgirwa Nnâmahanga wîrhu, mushâna wabayumvîrhîze, Nyamuzinda, mushâna wali obabêrîre obwonjo, ci bubî bwâbo bwarhumaga wacîhôla.
Mulengeze Nyakasane Nyamuzinda wîrhu, mufukamirize aha ntondo yâge ntagatîfu. Bulyâla Nyakasane Nyamuzinda wîrhu ali Mwimâna.
Source notes (1)
- Footnote Kerubi: nsalamu za byûbi birîbirî z’omu ka-Nyamuzinda.
BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.