Lulanga lwa 86

Omusengero gw’omwîra wa Nnâmahanga

1Musengero. Gwa Daudi.

Yâgirwa, orhege okurhwiri kwâwe onyumve nâni, bulyâla mpanyagîre nnandi mukenyi.

2Omanyire omurhima gwâni, bulya ndi wâwe, ocize mwambali wâwe, bulya we acîkubagîre.

3We Nyamuzinda wâni; onfè lukogo mâshi Yâgirwa, obûla ndwîrhe nakukûbiriza burhahusa.

4Oshagaluse omurhima gwa mwambali wâwe, bulyâla emund’oli, Nyakasane yo ndengerize omurhima gwâni.

5Na bulya Yâgirwa we mwinjà, we n’olukogo lushundwakwo; onaluzize obwonjo oku ngasi boshi bakusengera.

6Nyamwagirwa, omusengero gwâni oguyumvîrhize, n’izù ly’omusengero gwâni olirhege okurhwiri.

7Nkuyâkûzize olusiku ndi burhè, bulyâla mmanyire oku wanyumvîrhiza. 8Abazimu barhalimwo okuhisirekwo, Nyakasane, na ntà mulenga ohisire okw’ikola lyâwe.

9Amashanja walemaga goshi, gayisha gakuharâmye, Nyamwagirwa, ganamanyise izîno lyâwe.

10Bulya we munênênè we nakola ebirhangaza: wêne we Nyamuzinda. 11Muhanyi, onnangûle enjira yâwe nkaz’igera omu kunali kwâwe, ohabûle omurhima gwâni, gukaz’irhînya izîno lyâwe.

12Yâgirwa Nyamuzinda, nacîkwitakîra n’omurhima gwâni gwoshi, nnamanyîse izîno lyâwe emyâka n’emyâka.

13Bulyâla olukogo lwâwe lwayishir’ibà lunji kuli nie, washâywîre omûka gwâni omu muhengere gw’ekuzimu.

14Nyamuzinda, mâshi, balya bagayana bantezire, n’engabo ya balya b’ecikalarhu egungêzize omûka gwâni, barhanakushibiriri ciru w’oyo.

15Cabâ wêhe, Nyamwagirwa, we Nyamuzinda w’obwonjo n’olukogo, we Nn’obwinjà bwoshi, orhalubiraho orhanarhebana.

16Ndolakwo obwonjo bukugwârhe; oshobôze mwambali wâwe obuzibu bwâwe, onacize mugala wa mwambali-kazi wâwe.

17Ompè ecimanyîso c’oburhonyi bwâwe, balya banshomba babone, n’enshonyi zibabumbe, babone oku wantabîre, Nyamwagirwa, wanantûliriza.