Lulanga lwa 84

Omwîfinjo gw’okuhika omu ka-Nyamuzinda

1Gwârhi omukulu w’abimbiza. Luyimbwa aka Gati. Lwa bene Korè. Lulanga.

2Alà nk’enyumpa yâwe yayinjiha Yâgirwa Nyakasane k’Emirhwe.

3Omurhima gwâni gwafîre n’omwîfinjo gw’okuhika omu kônga ka Nyakasane.

Omurhima gwâni n’amagala gâni bidwîrhe byalwîra okuhika aha burhambi bwa Nyamuzinda ozîne.

4Ciru n’ehifunzi hijira aha mwahyo, n’ehirembe-rembe hijira olwôgo hidêkerezamwo ebyâna byahyo. Câhisibwa aha luhêro lwâwe Nyakasane k’emirhwe. Yâgirwa Nnâmahanga!

5Câbajirwa ababà omu nyumpa yâwe Nyamwagirwa bolino barhahwa barhâkukuza.

6Iragi lyâge omuntu orhabâlwa nâwe, amango agwêrhe omulâli gw’olugendo lutagatîfu.

7Hano bayikira akabanda kûmu, bâkahindula nshôko, n’enkuba mpangûka ekabumbe mugisho.

8Bâja bazibuha bunjirà-njirà bulya bâyîsh’ibona Nnâmahanga omu Siyoni.

9Nyakasane k’emirhwe oyumve guno musengero gwâni, Nyamuzinda wa Yakôbo ontege nâni okurhwiri.

10Nnâmahanga, we mpenzi yîrhu, rhulolekwo nîrhu, lolà oku busù bw’omushîge wâwe.

11Kwo binali: omulegerege omuntu agezize omu mwâwe gwo mukulu oku yindi cihumbi, okubêra aha lusò lwa Nnâmahanga, kwo kukulu aha kubêra omu nyumpa y’abanya-byâha.

12Nyakasane Nnâmahanga ye Kazûba-zûba ye na Mpenzi, oburhonyi n’irenge zo ngalo zâge. arhazijinikira, oku bantu bakerekera omu ntagoma.

13Nyakasane k’emirhwe, iragi lyâge omuntu ôkwîkubagira.