Lulanga lwa 58

Omucîranuzi w’abacîranuzi b’en’igulu

1Gwârhi omukulu w’abimbiza. Luzihwa aka «omanye washâba». N’izù linyinyi. Ya Daudi.

2Ka mmanja munatwa obu mwe bagale? Ka murhalyâlyanya nka mwazitwa obu, mwe bashamuka?

3Câba obulyâlya mwêhe emurhima mubujirira, n’enfune zinyu zirhamîra oburhali bulyâlya omw’igulu.

4Emihera eburhwa enali mihera, kuburhanwa eburhanwa okuhabuka kwâyo, erhaderha n’oburhali bunywesi.

5Olulimi luyibâ ekanwa kwo lulangabuka nka lwa njoka, amanjokà-njokà emihera emeshera kwo gayôrha aka ag’empiri y’ebihuli, yo ekaz’ifuka amarhwîri,

6mpu yankanayumva izù ly’abàshâsirwe enjoka, balya bazihira enjoka zidogêre.

7Nnâmahanga mâshi, ohungumule eyo mihera amîno gayiri ekanwa, oshangule ebijigo by’ezo mpangaza, mâshi Nyakasane.

8Bashandâle nka mîshi gahona oku ntuli, bakaderha mpu balîka omwampi gubè nka kuno bagutûmba.

9Bagende ak’ecishomgambeba, co cija cajonga bunjirà-njirà. Bagere nka cimomano ca muntu, co cigera cirhanabonaga izûba.

10Enyungu zinyu mâshi, oku zirhaciyumva idûrhu ly’olurhadu, zimanyulwe n’idûrhu ly’empûsi.

11Omushinganyanya acishinge abona encuku zahanwa, ahulire n’igâ omu mukò gw’endyâlya.

12N’abantu baderhe, mpu: «Nêci oluhembo lw’abashinganyanya ho lubà», mpu: «Nêci ho Nyamuzinda otw’emmanja z’igulu abâ».