Lulanga lwa 56

Ntà mango omwemêzi ahuligane

1Gwârhi omukulu w’abimbiza. «Ak’engûkù y’omu mirhi y’ihanga». Lwa Daudi. N’izù linyinyi. Amango Daudi àbaga amâgwârhirwa e Gati n’Abafilistini.

2Ombè lukogo mâshi Nnâmahanga, niono bahizire okw’idaho, badwîrhe bamvulindika burhahusa, nieshi bajirire manywanywa.

3Babisha abo badwîrhe bandabarha ntyo burhahusa, banali banji banji abadwîrhe bandwîsa.

4Yâgirwa, we bà enyanya, wêne ncîkubagîre, olusiku entemu yânshamula. 5Ndagâno ya Nyamuzinda eno nâcîtakîrira muli ye, Nyamuzinda oyu ncîkubagîre: ntà bwôba bungwêrhe: kurhi zanjira engonyi?

6Badwîrhe balegerera bampurana, enkengêro zâbo nie zishimbire, zirhânnongeza oburhali buhanya.

7Erhi bayish’ibugânana, bagwîke emirhego, igenda lyâni balij’ebulâbi, balonze oku bakankûlamw’omûka.

8Nyamuzinda mâshi, obalengere oku bubî bwâbo bunakwânîne, orhang’iluba oher’embaga.

9Emihanda bàngezagyamwo erhi bandibirhakwo orhayihabiri; n’emirenge nalasire bulya omu hirembe hyâwe eri migunje: k’arhali mulya hitabu hyâwe eri miyandike?

10Amango nkakuyâkûza, ago mango lyo abanshomba bâshukira; mmanyire bwinjà oku Nyamuzinda nie âlwîra.

11Ndagâno ya Nyamuzinda eno nâcîtakîrira muli ye.

12Nyamuzinda oyu ncîkubagîre: ntà bwôba bungwêrhe: kurhi zânjira engonyi?

13Cirya ciragâne nakulaganyagya Nnâmahanga, co cino cingwêrhe, nkolaga nalîka enterekêro z’okukukuza:

14Nabwîne walîkûza omûka gwâni oku lufù, n’amagulu gâni, oku gali gakola mpu garhereze, wagagalukira, mpu lyo nkaz’ikananda omu ka-Nyamuzinda, omu bumoleke bw’abazîne.