Lulanga lwa 48

Siyoni, ntondo ya Nyamuzinda

1Lwimbo. Lulanga. Lwa bene Korè.

2Nyakasane mushâna ali mukulu, akwânîne bamukuze bwenêne omu lugo lwa Nyamuzinda wîrhu.

3Entondo yâge ntagatîfu hibà hirhondo hilushire ezindi, abà mushagalusa w’igulu lyoshi. Entondo ya Siyoni yo ntebe ya Nyamuzinda, lwo lugo lw’omwâmi mukulu.

4Nyamuzinda àyerakanîre omu lugo lwâge oku anali lwâkiro lw’okunali.

5Lâba oku abâmi bâli bamâhuluzanya banarhabâlira caligumiza.

6Oku bànabona ntya bafuduka, bashandabana bakûla idârhi.

7Entemu yabashamula, balwâla ebihamba ak’owalwâla emikero

8Gashuba manywanywa nka kula empûsi yàhubuka ebushoshôkero bw’izûba eshangula amârho g’e Tarsi.

9Oku rhwabwîragwa kwo rhwayishirig’ibona, omu lugo lwa Nyamuzinda wîrhu, omu lugo lwa Nyakasane Nn’emirhwe Nyakasane àluzibuhize mpu lusêre ensiku n’amango.

10Yâgirwa Nnâmahanga, rhunakaz’ikengêra olukogo lwâwe omu ngombe yâwe.

11Irenge lyâwe Nyamwagirwa, lihumîre ah’irhwêrhwè ly’igulu ak’Izîno lyâwe.

Okulyo kwâwe kuyunjwîre bushinganyanya:

12entondo ya Siyoni ecîzigirize, n’abanyere b’omu Yûda bacîtakîre obushinganyanya bwâwe omu kutwa emmanja.

13Muj’izunguluka Siyoni mubone, mumugere omu marhambi munaganje enkingi zâge,

14mulolêreze enkûta zâge, musingirize na ngasi nkingi eyâkirwamwo, lyo muhash’ibwîra abâna bâburhwa, erhi:

15«Nyamuzinda oyo mutyo», erhi: «Nyamuzinda wîrhu ho abâ ensiku n’amango, yêne ye mungere orhuyâbula kuhika olw’okufà».