Lulanga lwa 41

Omusengero gw’omulwâla olekêrîrwe

1Gwârhi omukulu w’abimbiza. Lulanga. Lwa Daudi.

2Ali muny’iragi omuntu oshîbirira omukenyi n’orhagwêrhi hyâge; Nyakasane amuciza olusiku lubî.

3Nyakasane àmulanga, àmulekeramw’omûka, amuhè n’iragi hanw’igulu, arhàmuyôhe omu lîno ly’ababisha.

4Nyakasane àyisha al’imurhabâla oku ncingo alwâlira, amurhenzemwo endwâla yoshi.

5Niehe kwo ndesire, nti: «Yâgirwa mâshi ombabalire, oncize bulya nakubîhîre!»

6Abashombanyi bâni banakaz’inderhera kubî, mpu: «Mangaci afà, mpu mangaci izîno lyâge lyaherêrekera?»

7Hakajira owayîsh’intangula naye busha anaderha: omurhima gwâge gunagende guhagirine bubî, erhi ahika embuga agwîre aderhaderha.

8Balya banshomba boshi erhi bahika baguma bagwîre bampurana, bagerêrezagye ebibî kuli nie obwo, mpu:

9«Kafinjo kadârhi bamulozire», mpu: «Y’oyo ogwîshîre, arhakacifà azûsire aho».

10Ciru n’omwîra nali ncîkubagîre, oyu rhwakazâg’ishangîra mugati muguma, naye ampîre ebinioko.

11Wêhe Yâgirwa mâshi, onfè lukogo, onzûse ahâla ntang’ibayêreka nâni.

12Nâmanya oku bwenêne ontonya, bano mbona omushombanyi arhâcicîshinga.

13Nâni onjire nyôrhe ndi mutaraga, onampire omu masù gâwe mbêremwo ensiku n’amango.

14Ayâgirwe Nyamuzinda w’Israheli, ayâgirwe emyâka n’emyâka. Amen! Amen!