Lulanga lwa 148

Empingu n’igulu bikuze Nyakasane

1Aleluya!

Kuzagi Nyamuzinda kurhenga enyanya emalunga mumukuze oku nkuba.

2Mweshi Bamalahika bâge mumukuze, ninyu mweshi mirhwe yâge mumukuze.

3Mwe mwêzi n’izûba mumukuze mwe nyenyêzi zilangashana mumukuze.

4Mumukuze mwe malunga g’oku nkuba, ninyu mwe mîshi mubà emalunga mumukuze.

5Byoshi bikuze izîno lya Nyakasane bulya kanwa kaguma kône àdesire byanabà.

6Abizibuhize emyâka erhaganjwa, àgwîsire irhegeko lirhakahindulwa.

7Murhondêrere en’igulu mwamukuza, mwe biryanyi by’omu mîshi, ninyu mwe nyanja.

8Omuliro, olubula n’olwikungu na ba-kalemêra, barhahumba irhegeko lya Nyamuzinda.

9Mwe ntondo n’orhurhondo rhwoshi emirhi y’amalehe n’emirhi yoshi.

10Ensimba z’emuzirhu n’ebishwêkwa bya ngasi lubero, ebinyâgâsi n’ebinyunyi bibalala.

11Abâmi b’igulu n’amashanja goshi, abaluzi ninyu batwî b’emmanja b’igulu. 12Emisole n’ensûli, abashosi n’abâna.

13Bakuze izîno lya Nyamuzinda, bulya izîno lyâge lyône liri likulu, irenge lyâge liri enyanya ly’igulu n’amalunga.

14Ajîsize olubaga lwâge irenge, ngwârhiro ya bukuze oku barhonyi bâge, bo bâna b’Israheli, ishanja limuyêgêra.