Lulanga lwa 141

Oyimangîrwe na wa-Ngwi adôma gashongwîre

1Lulanga. Lwa Daudi.

Yâgirwa w’ono ndwîrhe nayâkûza, ntabâla duba we kasinga, yumvîrhiz’omulenge gwâni w’ono ndwîrhe nayâkûza.

2Omusengero gwâni gusôker’emund’oli nka mugî gwa nshangi, n’aga maboko nalengeza gayêrekereyo nka burherekêre bwa bijingo.

3Yâgirwa ohire omulanzi aha kanwa kâni, n’omulâlîzi aha lusò lw’omunwa gwâni.

4Mâshi mâshi omanye wakayêrekeza omurhima gwâni emund’okubî buli, mpu gujire ebibî birhakwânînî. Ntanajaga omu bantu bajir’okubî, mpu ndye oku biryo byâbo.

5Omushinganyanya ankomekwo: kwo kukulu. Ankalihire erhi kwo: gali mavurha omw’irhwe. Irhwe lyâni lirhâgalahire, Nâkazicîsâlirira oku bali omu bubî bwâbo.

6Abakulu bâbo omu kucihukula oku mabuye, lyo bajirage bayumva obununu bw’ebinwa byâni.

7Kula owahinga ashandâza ebidaka na kula akoma irongo, kwo ebivuha byâbo byashandâlîre ekuzimu.

8Nêci Yâgirwa Nyamubâho, amasù gâni yo gayêrekîre emund’oli, yo nyâkîre emund’oli, omanye wakaherêrekeza omûka gwâni.

9Onnange oku murhego bantezire, n’oku rhusà rhw’abajira ebibî.

10Abo babî mâshi bagwe caligumiza omu mirhego badwîrhe barhega, oku nâcîfulumukira.