Emigani 24

1Orhahîraga okayonganwa n’enkola-maligo, orhanalonzagya okuzikômera.

2Bulyâla omurhima gwâbo gurhagerêreza ebirhali bigalu-galu, n’akanwa kâbo karhahâna erhali mihigo mibî.

3Burhimanya omuntu ayûbakamwo enyumpa, bwîrhonzi omuntu ahûmbamwo eciriba câyo;

4Bushiru bubûmba enguli y’omuntu, bîra binjà-binjà byoshi bija ecibuye.

5Aha omuntu ankaluza emisî ankaluza oburhimanya, aha ankabà ciri-misî, ankabà mulenga.

6Bulyâla kuyêsha kwinjà emirhima: kuhima ntambala, n’okubâ na bahanûzi banji kwo kuhimira omuntu.

7Omuhwinja mpu oburhimanya buli enyanya bwenêne, arhanabumbûla kanwa aha ngombe.

8Olonza okujira amabî, ye baderha cishûngu!

9Omuhwinja arhalôrha ebirhali bibî, n’omugambanyi, abandi barhamubâkwo.

10Akabà warhibire omurhima olusiku lw’amarhangulo, erhi obuzibu bwâwe bunali ntabwo.

11Ogalukire abâhêkwa ebwa lufù, ofungire n’abadwîrhwe nk’eyajibâgwa.

12Ka kwo wâyishiderha, erhi: kàli rhurhâli rhumanyire? K’orhamanyiri oku Olyâla olâba emirhima ntâco ahabire? K’orhamanyiri oku omulanzi olanga omurhima gwâwe, Oku arhahabiri bici? Ye wâhembe ngasi muguma nk’oku ànakozire.

13Okazirya oku bûci mwâna wâni, bulya bubà bwinjà, n’ebigukulu hy’obûci hirhahimwa kununa omu kanwa.

14Ntyo kwo n’oburhimanya nabwo buli omu murhima gwâwe, erhi wankabuhikakwo wanabona ensiku, n’obulangâlire bwâwe burhâfânandè.

15Orhahîraga okahira omurhego omu nyumpa y’omushinganya, orhanamushâbiraga enyumpa.

16Bulyâla kali nda omushinganyanya akulumba anashubizûka, ba-nyankola-maligo bôhe kugwa bagwa omu buhanya.

17Erhi omushombanyi wâwe ankakulumba, orhacîshingaga; omurhima gwâwe gurhasîmaga mpu obwenge amâsârhala.

18Nyakasane akanagaya omu kubona ntyo, obone arhacimurhûzirikwo mungo.

19Orhahîraga okalubira enkola-maligo, orhayâgalagwa n’endyâlya,

20Bulya ntà irhôndo ly’enkola-maligo: akamole k’endyâlya kuzima kanazima.

21Mwâna wâni, orhînye Nyakasane, orhînye na mwâmi, orhahîraga okajira oyu wagomera muli abwo bombi;

22Bulya obuhane bwâbo burhalâliza, na bulya, ndi omanyire citumule cici bâyishikuhirakwo bombi?

IV. Ebindi binwa by’abarhimanya

Okugwasanya

23Ebi nabyo biri binwa bya barhimanya: Okulola ola ye ndi nka watwa olubanja, kurhabâ kwinjà.

24Obwîra omumînya mpu ali mushinganyanya, kuhehêrerwa ahehêrerwa n’amashanja, kugaywa anagaywa n’abandi.

25Ci kwône abatwa olubanja bwinjà, banayumve basîmire: mugisho banajâkwo.

26Omuntu wakushuze bwinjà1, erhi hinûnugurho akuhizire oku kanwa.

27Orheganyize omukolo gwâwe embuga, oshubija aho ohînge ishwa lyâwe2, wabona oku watunga enyumpa yâwe.

28Orhahîra okayêmêra duba obuhamîrizi bwayâgîriza omulungu, orhanahîra okarheba omuntu n’akâwe kanwa.

29Orhaderhaga, erhi: «nâmukolera ebi ànkolire! erhi nahà ngasi muguma nk’oku ànakozire»

Obwôlo

30Nageraga aha kw’omwôlo, abà ishwa ly’ecingolo-ngolo,

31Alà oku lyoshi lyàli limeziremwo omushadu, lyoshi lyàliyumjwire mishûgi, n’olugurhu-gurhu lw’amabuye erhi lwahongosire.

32Omu kubona ntyo nadôsa emirhima, okubona ebyo kwampà ezo nkengêro.

33Mpu «wârhangibunga hitya, warhangibâ nka waheba olugohe oku lundi, warhengibà nka wahira okuboko oku kwâbo, ocîhengeke»;

34«Oku ecizômbo cahanda aha mwâwe nka mubalama, n’ecizômbo cakutulikakwo amatumu!»