BIBLIYA NTAGATIFU OMU MASHI
Yozwè 16
Omwanya gwa bene Yozefu
Ecigole canaciyesherwa bene Yozefu1. Olubibi lw’ishwa lyâbo lwarhangira olunda lw’e buzûka-zûba oku Yordani aha Yeriko, oku mîshi ga Yeriko; lwanacisôka kurhenga e Yeriko kujà oku ntondo, omw’irungu lya Beteli. Lwarhenga aha Beteli-Luzi2 lwanacigera oku lubibi lwa bene Arki aha Ataroti. Kandi lwanacibungulukira ebwa buzika-zûba, ebwa lubibi lw’Abayefaleti, kuhika oku lubibi lwa Abayefaleti, kuhika oku lubibi lwa Beti Horoni3 oli idako na kuhika aha Gezeri, lwajicîhônda omu nyanja: Gwo mwanya bene Yozefu bahîrwe ogwo, Menashè n’Efrayimu.
Alaga olubibi lwa bene Efrayimu, nk’oku amûko gâbo ganali. Olubibi lw’ecihugo câbo lwàli ntya: ebuzûka-zûba, Ataroti w’Adari, kuhika aha Beti Horoni w’enyanya. Olwo lubibi lwakazâgihika ebwa buzika-zûba kujà e Mikimetati, lwazonga ebwa Tanati-Silo4, lwanacigera embere zâge ebuzûka-zûba bwa Yanowah. Kandi kurhenga e Yanowah ha, lwabungulukira e Atoroti n’e Naara, lwahika kuli Yeriko, kandi lwacihonda omu Yordani. Kurhenga e Tapuaha, olwo lubibi lwajà olunda lw’ebuzika-zûba, oku mugezi gwa Kana, lwagendicîhonda omu nyanja. Kwo gwàli ntyo omwanya gw’omulala gwa bene Efrayimu nk’oku amûko gâbo ganali. Bene Efrayimu bashuhihâbwa ezindi ngo ziberulukine omu cihugo ca bene Menashè, ezo ngo zàli zigwêrhe n’ebishagala byâzo. Barhalibirhagakwo5 abanya-Kanâni bayûbakaga e Gezeri. Abanya-Kanâni bayûbakaga ntyo haguma na bene Efrayimu, ci konene nka bashizi ba kukazibakolera.
Source notes (5)
- Footnote Bene Yozefu: Murh 48; 49, 22-26; Lush 33, 13-17 .
- Footnote Olubibi lwarhenga e Beteli: Yoz 7, 2; 8, 9.17 . Bene Arki: 2 Sam 15, 32; 16, 16 . Embere aho hayîrikwe Beteli, haderhagwa Luz
- Footnote Oku lubibi lwa Beti-Horoni: Yoz 10, 10 . Kuhika aha Gezeri: Yoz 10, 33; 12, 12 .
- Footnote Tanati-Silo, erhi Silo omu bindi bitabu; Yoz 18, 1.8-10 .
- Footnote Barhalibirhagakwo ahanya-Kanâni: Yoz 15, 63; 17, 12; Bac 1, 29 . Gezeri: 1 Bâm 9, 16-17 . Bashizi ba kukazibakolera: Lush 20, 11 .
BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.