Yozwè 13

II Okugabâna ecihugo

Ebihugo bisigîre okurhêrwa n’okurhôlwa

1Yozwè obushosi bwamugwârha, emyâka yâge erhaciri minyi; Nyakasane anacimubwîra, erhi: W’oyu obushosi bwamagwârha, emyâka yâwe erhaciri minyi, ecihugo cicigwâsirwe okurhôlwa ciri cinji. 2Alaga ecihugo cisigîre: amashwa g’abà-Filistini1 goshi n’ecihugo c’abanya-Geshuriti. 3Kurhenga e Shibori, olunda lw’ebuzûka-zûba bw’e Mîsiri, kuhika oku cihugo c’Ekroni, emwênè2 eri ecihugo cidesirwe cihugo c’abanya-Kanâni; n’emirhundu irhanu y’abà-Filistini: omurhundu gwa Gaza, omurhundu gwa Ashdoti, omurhundu gwa Eshikoloni, omurhundu gwa Gati n’ogwa Ekroni. 4Haciri ba-Hivi b’e mukondwè3, ecihugo c’abanya-Kanâni coshi n’eca Meyara, cibà cihugo c’Abasidoni, kuhika ah’Apeki, kuhika oku cihugo c’Abanya-Moreni; 5ecihugo c’Abanya-Gibiliti, n’olunda lw’ebuzûka-zûba bwa Libano loshi, kurheng’e Baal­ Gadi, kuhika omu marhambi g’entondo Hermoni, kuhika aha muhango gwa Hamati.

6Abantu b’omu ntondo boshi, kurhenga e Libano kujà e Misirefoti-w’e Buzika-zûba, abantu b’e Sidoni boshi: abo bantu nabakungusha4 boshi embere za bene Israheli. Ci konene ebyo bihugo ojè wabigabira bene Israheli omu kubiyeshera ecigole, Nk’oku nanakurhegekaga. 7Na buno ogabe eco cihugo myanya myanya oku milala mwenda ya bene Israheli, na kwa cirya cindi cihi­mbî ca bene Menashè.

Enshokolezi

8Ecindi cihimbi c’omulala gwa Menashè, bene Rubeni na bene Gadi, abo bali erhi bahâbirwe omwanya gwâbo, galya mango Mûsa abahâga olunda lw’e buzûka-zûba bwa Yordani, mpu ciyôrhe cihugo câbo nk’okwo anabahâga co Mûsa omurhumisi wa Nyakasane. 9Kurhenga e Aroeri, oku burhambi bw’o­ mugezi gw’Arnoni, ecihugo ciri omu karhî k’akabanda k’ogwo mugezi, akabà­ nda koshi ka Medeba kuhika aha Diboni; 10engo zoshi za Sihoni5, mwâmi wa banya-Mori, owayûbakaga aha Hesboni kuhika oku cihugo ca bene Amoni. 11Kandi Galadi, ecihugo c’abanya-Geshuri n’eca abanya-Maaka, entondo Hermoni yoshi, na Bashani yêshi kuhika aha Salka. 12Kandi obwâmi bwa Ogu bwoshi omu Bashani ye wali mwâmi w’aha Ashtaroti n’aha Edreyi: yêne wali ocisigire omu ba Refayimi. Mûsa ahima abo bâmi anabalibirhakwo. 13Ci bene Israheli barhalibirhagakwo bene Geshuri, bene Maaka, n’abo bene Geshuri na bene Maaka bacibà omu Israheli kuhika ene. 14Omulala gwa bene Levi6 gônene Mûsa arhahâga ecihugo nka mwanya, bulya Nyakasane, Nyamuzinda w’Israheli, yêne yeri mwanya gwâbo, nk’oku anamubwîraga.

Omulala gwa Bene Rubeni

15Mûsa agabira bene Rubeni ogwâbo mwanya gw’ecihugo nk’oku emilala yâbo yanali. 16Ecihugo câbo càli kurhenga aha Aroeri oku burhambi bw’omugezi gw’Arnoni, n’olugo luli omu karhî k’olubanda koshi luli hôfi na Medeba, 17Hesboni n’engo zâge zoshi ziri omu kabanda, Diboni, Bamoti-Bali, Beti-Bali­ Meoni, 18Yahasi, Kedemoti, Mefati, 19Kiriyatayimi, Sibma, Sereti-ha-Shahari eri omu kabanda, 20Beti-Poeri, amarhambi ga Pisga, Beti-ha-Yeshimoti, 21e­ngo z’omu kabanda zoshi; omwâmi w’abanya-Mori wayûbakaga aha Hesboni, Mûsa ye wamuhimaga, ye n’abaluzi b’e Madiani, Evi, Rekemi, Suri, Huru na Reba; bâli barhambo ba Sihoni, bo bayûbakaga eco cihugo. 22Olya mushonga Balâmu7 mugala wa Beori, àli muguma wa muli balya bene Israheli bayîrhaga, babaniga n’engôrho. 23Ntyo, ecihugo ca bene Rubeni cahika kuli Yordani lwo lwàli lubibi lwâco.

Omwanya gwa bene Gadi

24Mûsa agabira omulala gwa Gadi, ho baligi bene Gadi, ogwâbo mwanya nk’oku emilala yâbo yanali. 25Banacihâbwa ecihugo ca Yazeri8, engo zoshi za Galadi, oluhande lw’ecihugo ca bene Amoni, kuhika ah’Aroeri, oli aha ishiriza lya Raba, 26kurhenga aha Hesboni, kuhika aha Ramati-ha-Mispe na Betonimi, na kurhenga aha Mahanayimi kuhika oku cihugo ca Lo-Debari. 27N’omu kabà­nda ka Bet-Harami, Beti-Nimra, Sukoti na Safoni, musigala gw’obwâmi bwa Sihoni, mwâmi w’e Hesboni; Yordani n’ecihugo câge, kuhika oku buzinda bw’enyanja ya Kinereti, olunda lw’e buzûka-zûba lwa Yordani. Gwo mwanya gwâbo ogwo. 28Zo ngo ezo n’ebishagala bya bene Gadi nk’oku emilala yâbo yanali.

Omwanya gw’ecihimbi ca bene Menashè

29Mûsa aha ecihimbi c’omulala gwa bene Menashè, ho haligi bene Menashè, ogwâbo mwanya nk’oku emilala yâbo yanali. 30Ecihugo câbo càli kurhenga aha Mahanayimi. Bashani yêshi, obwâmi bwa Ogu yêshi, ye wali mwâmi w’e Bashani, emirhundu yoshi ya Yayiri omu Bashani: ngo makumi gali ndarhu. 31Oluhande lwa Galadi, Ashtaroti na Edreyi; engo z’obwâmi bwa Ogu omu Bashani bazihà bene Makiri, mugala wa Menashè, bâli cihimbi ca bene Makiri, babagabira nk’oku emilala yâbo yanali. 32Yo myanya Mûsa agabaga eyo omu rhubanda rhwa Mowabu, olundi lunda lwa Yordani, 33ah’ishiriza lya Yeriko, olunda lw’e buzûka-zûba. Ci kône Mûsa arhahâga bene Levi omwanya; Nyakasane, Nyamuzinda w’Israheli, yêne yeri mwanya gwâbo nk’oku anababwîraga.