Yônà 4

Ecifufu ca Yônà n’ishuzo lya Nyamuzinda

1Erhi Nnâmahanga àbà amâbabalira Ninive, ebyo byashologorha Yônà hôfi kucîniga n’oburhè. 2Anaciyâkûza, erhi: «Ntarhenga omu iderhero, waliha! K’arhali birya naderhaga erhi nciri omu cihugo cîrhu ebi! Co cànarhumaga ncîlibirhira kuhika e Tarsisi, bulya nalinyôsire mmanyire oku we Nyamuzinda w’obwonjo n’ow’olukogo, orharukûza, we mugale mwimâna, Orhakwîrirwa bubî. 3Mâshi Yâgirwa, mpêka buno, yanka guno mûka, bulya olufù lwo lukulu aha kalamo emwâni buno». 4Nnâmahanga amushuza erhi: «Cici cirhumire wakaliha okungan’aho?» 5Yônà arhenga muli cirya cishagala, aciyungulira ebushoshôkero bw’izûba, ayûbakayo ecifumba, adêkerera, alingûsa ebyâbà omu cishagala. 6Okuhandi, Nnâmahanga àmumezaho olubonobono, lwakula, lwakâmujirira ecîhôho, lwakâmucikirira omu malibuko. Yônà asîma bwenêne olwo lubonobono. 7Ci kwône erhi bugendica sêzi, lukula arhanda, Nnâmahanga àgeza shumbwe muli lulya lubonobono, lwanaciyûma. 8E­erhi izûba lishoshôka, Nyamuzinda azûsa empûsi yâyôca, lirya izûba lyabasha­ kwo Yônà, okuhandi ajogonokerwa. Kandi acîfinja olufù, aderha, erhi: «Aye! Okufà kwo kukulu aha kulama ntya». 9Nnâmahanga àmushuza, erhi: «Cankarhuma wadwîra omu nda nk’ihiri, olwo lubonobono obêrîre burhè, ka lwâwe?» Naye, erhi: «Yâgirwa, kurhi ntankabà burhè mâshi!» 10Nnâmahanga ashubîrira, amubwîra, erhi: «W’oyu, olubonobono orhakoleraga, orhanaluyuhiriraga, luli lwakuvuna, budufu buguma lwameraga, budufu buguma lwayumire. 11Nâni nie obwînage oku ntankafà mungo kuli Ninive, ecishagala cinene cirimwo bihumbi igana na makumi abirhi, ciru na kulusha, ga bantu barhishi okulyo kwâbo, barhishi okulembe kwâbo, cirimwo n’obusò bw’ebintu!»