Ayubu 20

Obushinganyanya burhalondôla

1Sofari w’e Nâmati aj’eluhya aderha, erhi: 2Enkengêro zâni zamambwîriza ishuzo, bwo n’obu ndwîrhe nakanâna nti nshuze. 3Nayumvîrhe ebinwa bimbabazize, Ci obukengêre bwâni bwampwehwerhîze ishuzo, 4K’orhîshi kurhenga mîra, Kurhenga omuntu ali bano igulu, 5Oku obushagaluke bw’enkola-maligo bubà bunyi, n’oku amasîma gw’omuntu mubî gabà ga kasanzi kasungunu? 6Ciru omujunja gwâge gwankalwîra omu lya mazihwa, ciru irhwe lyâge lyankahuma oku bitù, 7anahirigirhe nka muzimu, abamuyishi mpu «ngahi àjirage?» 8Anabalale nka cilôrho cirhankakengêrwa, analibirhe nka bilôrha by’omu budufu. 9Amasù gakomeraga akumubona gamuziguluke, Aha mwâge harhakacimushish’isù! 10Bagala bâge balyûle amabî àjirîre abakenyi, bagala bâge banalyûla ebirugu byâge; 11Amavurha gâge gali gayunjwîre misî ya busole: ye n’obusole bwâge, bamâlambama omu katulo. 12Akaginunirwa n’amabî, Garhahusagya oku lulimi lwâge, 13Akagigabikirira bwinjà, agagobere ebiraka byâge. 14Ebyo biryo byâge bikola bibolêreza omu nda yâge, bikola bimuli omu nda nka bôge bwa manjokà-njokà. 15Kukwânîne ashale amagala àmirangusize, Na Nyamuzinda wamushazago. 16Anunugusire obôge, Lulimi lw’igû lwamuyîrha. 17Irhondo arhakacibona emikôndo yahulula, emikôndo y’obûci n’ey’amakafè. 18Alyûla ebi àlîre, ayihikwe anahongôkwe, kulya àkâg’ibijandâga arhakacikujira bundi. 19Kulya kubà àshâbîre abakenyi enyumpa anabalibuza, enyumpa aj’azinyaga ahâli h’akuziyûbaka. 20Bulya àli wa masù, arhànayigurhaga, obugale bwâge burhamulikûze; 21Bulya ntâye arhalibuzagya omu magene gâge, obwôloloke bwâge burhankarhinda. 22Oku aciri ajêjêrhwa n’ebirugu, arhemuke n’omusisi, emihimbagulizo y’obuhanya emurhogerekwo 23Nyamuzinda anamurhogezekwo obukunizi bwâge bunene, anamurhulirekwo obwîre bw’emyampi yâge. 24Akafuma emirasano y’ebyûma, muherho gwa mulinga gwamurhulûla. 25Ecisonga camâmuyisha emugongo, ecûma calangashana camâmurhulûngula obudiku, obuhanya bwamâmurhogera, 26Endunduli zoshi ye zibîkîrwe mpu zimuhûnjukane, Omuliro gurhayâsîbwi na ndi1 gwamâmusingônola, gwamâmalîra na gasi byàli bicimusigalire omu nyumpa. 27Amalunga gamâmanyîsa obubî bwâge, n’igulu lyamuhindukira. 28Obugale bwâge bwamâshandâla, bwamâhirigirha omu kasânzi k’obukunizi. 29Lwo luhembo Nyamuzinda abîkîre enkola-maligo olwo, owahehêrirwe, co cigabi Nyamuzinda amutwira eco!