Ayubu 18

Oburhè burhali cici embere z’obushinganyanya

1Okubundi Bildadi w’e Shwahi, anacijà eluhya, aderha, erhi: 2Mangaci weki waleka ebîrà binwa byâwe? Orhangigerereza buzinda rhubulikubwîra, rhuganîre. 3Cirhumire odwîrhe warhulola nka nyama, rhwamayôrha nka binganyi omu masù gâwe! 4We dwîrhe wacibâga erhi burhè burhuma, K’omanyire mpu igulu lyayôrha kwône erhi we rhuma, Ka wamanya mpu ibuye likola lyakûlwa omu bululi bwalyo? 5Nêci, obulangashane bw’omwîsi bwahirigirha, n’engulumira y’omuliro gwâge erhakacimoleka bundi. 6Obulangashane bwazima omu nyumpa yâge, itara lyâge lyazimîra enyanya ly’irhwe lyâge. 7Okulambagira kwâge n’emisî kwahwa, n’ihano lyâge yênene lyo lirhumire akûmba. 8Bulya amagulu gâge gamâgwârhwa n’emigozi, amâlambagira omu kasira. 9Omurhego gwamâmugwârhira oku kansisira n’empulula yagwo yamâmusêza. 10Guli mufulike ekuzimu omugozi gumurhezire, n’omurhego gwamurhuluba guli omu njira yâge. 11Ngasi lunda ankayêrekera obwôba bwâmugwârha, bunamushimbulwîre oku ajà agenda. 12Ishali bwo buhane bwâge, n’obuhanya bwamâmuja aha burhambi. 13Oluhù lw’ebirûmbu byâge loshi lwalîbirwe, ebirûmbu byâge byamalîbwa n’enfula y’olufù. 14Amâkûlwa omu nyumpa yâge, omu ànalicibêrîre n’omurhûla, akululirwa emwa mwâmi wa bakahèza. 15Wanahashig’iyûbaka omu nyumpa yâge bulya erhaciri yâge, ecibiriti camâlashirwa aha mwâge. 16Omu nshishi, emizî yâge yamâyûma, omu nyânya, amashami gâge gamâgokômba. 17Arhakaciyibukwa hano igulu, arhacigwêrhi izîno omu cihugo. 18Bamâmurhenza omu bulangashane, amâja omu ndunduli, amâkagwa hanôl’igulu. 19Arhacigwêrhi ehy’omwîmo, oli ehy’iburha omu lubaga lwâge, ntâye wafulumusire olufù omu lugò lwâge. 20Omu kubona okwôla ayôsire, abantu b’e Buzika-zûba bamârhemuka. Nabo abantu b’ebuzûka-zûba, bamârhungwa n’obwôba. 21Kwo habà ntyo, aha mw’enkola-maligo; kwo hayôrha ntyôla aha mw’omuntu orhayishi Nyamuzinda.