Ayubu 16

Obulyâlya bw’omuntu n’obushinganyanya bwa Nyamuzinda

1Okubundi Ayubu anacij’eluhya, aderha, erhi: 2Namâyumva kanji-kanji binwa bya bene ebyo, mweshi muli barhûliriza badârhi! 3Mangaci mwayûsa ebyôla binwa binyu byakaz’ihehûka nka mpûsi? Ka hali endwâla edwîrhe yakuhahabusa omu kuderha bya bene ebyo. 4Nâni, nanahasha okushambâla akinyu, acibâga mwe mwâli ahâla ndi; nali namubwîra ebinwa binjinjà na mmudûndire irhwe. 5Omu kanwa kâni nali namubwîra; nti muzibuhe, na buzinda ncîhûmbire. 6Nkaderha, okola kurharhûze amalumwa gâni, nkahulika ka lyo gandekaga? 7Nêci! Lolà oku amamperêrekeza! Wàhungumwîre omulala gwâni, na nâni niono wamaziriringa. 8Amacijira muhamîrizi, akola anjisa lubanja! Owambêshera amâyanjikira. 9Obukunizi bwâge bwanyîsire, bunshimbulwîre, adwîrhe aluma amîno erhi nie ntuma, omushombanyi wâni kuli nie adwîrhe agalambula amasù gâge. 10Badwîrhe banyâshamulira orhunwa rhwâbo, omu kunjacira badwîrhe bampà empî omu marhama, boshi oku banali, bamacizangiza kuli nie. 11Nyamuzinda anampânyire emw’omuntu mugalu-galu1, amandekêrera omu maboko g’abîsi b’abantu. 12Nali ncîbêrîre n’omurhûla ci ye wamvungunywîre, angwârhira oku igosi, anacinfûnda omu katulo. Nie nkola itêgwa lyâge 13emyampi yâge yanzungulusire, yantulungwîre enda buzira bwonjo, amanshambulira endulwè yâni oku idaho. 14Nie ntumire ayisha ayôkêra-yôkêra, akola ancinagîre-kwo nka mulwî wa ntambala. 15Oku mubiri gwâni, nahângirekwo sûnzu, n’obusù bwâni nabufûnda omu katulo. 16Obusù bwâni bwadukulize erhi kulaka kurhuma, n’engohe zâni zirhacibona. 17Ci kwônene ntà bumînya buli omu nfune zâni, n’omusengero gwâni guli mwêru kwêru2. 18Omanye wankabîikira omukò gwâni3, wâni idaho, n’omulenge gwâni gukaz’isôka burhahusa. 19Muli ganôla mango gonênè, lolà oku ayiruka empingu, omuhamîrizi wâni, omufungizi wâni omu hantu h’enyanya. 20Abadwîrhe bandagira n’abîra bâni bayêrekîre emunda Nyamuzinda ali, emunda ali yo amasù gâni gadwîrhe galakira. 21Aye! Acibâga omuntu ankahash’ijà lubanja4 boshi na Nyamuzinda? Nka kula omuntu ankanaluja boshi n’owâbo muntu! 22Bulya, emyâka yâni misungunu eyîra yacihwêra, na nkolaga najà muli erya njira, eyi ntankanacigalukamwo.