Ayubu 10

1Bulyâla akalamo kanshologosire, nkolaga naleka omulenge gudubuke, nkolaga naderha omutula gundi emurhima. 2Nabwîra Nyamuzinda, nti: orhanyagirizagya Muhanyi, ombwîre nâni cici ntumwire. 3K’obwînage kuli kwinjà oku kugwârhira ecikalarhu? Okûla kugolongohya obushanja bw’omu nfune zâwe? N’okûla kurhabâla ababisha omu mirali yâbo? 4K’amasû gâwe kwo gàbirage nka bunya-mubiri? Erhi nîsi k’obonaga nka muntu? 5K’ensiku zâwe kwo zirigi nka za muntu? Erhi nîsi emyâka yâwe kw’egera ak’eyâbo? 6We dwîrhage walongereza obubî bwâni, wanadôkereza ogwa ecâha câni. 7Wênene omanyire oku ndi mwêru-kwêru, na ntâye wankankûla omu nfune zâwe! 8Ndi bushanja bw’enfune zâwe, wêne wandemaga, ka lêro okolaga wanshambûla, onjegenje! 9Kengêra oku wêne wambumbaga kula babûmba ibûmba, ko wânânanshubize omu katulo. 10Kàli wêne wankamaga kula bakama amarhà, wanantwîsa kula batwîsa amashanzà? 11Wanyambika omubiri n’omunyafu, wansobekamwo amavuha n’emisî; 12Kandi wanshobôza obuzîne, n’obushibirizi bwâwe kuli nie bwo bwarhuma nalama. 13Ci kwône erhi onambîsire muhako; mmanyire okwo; kwàli n’omu bukengêre bwâwe. 14Nkakola ebigalu-galu, erhi onandi ebulâbi, na ntâko wankaciderha mpu ndi mwêru-kwêru. 15Nkabà munya-byâha, erhi namânahera! Nkabà mwêru-kwêru, ciru ntayinamule amalanga, bulyâla ndi muntu enshonyi zibumbire, n’obuhanya bunyunjwîre! 16Erhi najiderha nti nyinamule irhwe, onampîve kula entale ehìva, erhi kandi oshubinkolera akal’ibala. 17Nnanyumve oshubirintabâlira, oshub’intûlakwo omujina, engabo z’emicûkà zintêre burhahusa. 18Lêro càrhumaga ontenza omu nda ya nyâmà, singa nacîfirîre, na nt’îsù lyàkandozire-kwo! 19Ko nankacîbêrîre nk’orhahabaga, bankûle omu nda ya nyâmà, bampêke omu nshinda. 20N’ensiku z’akalamo kâni oku zakôfiha wâni! Ocinyîrekerage, mbè nkanarhûlirira. 21Embere mbalame burhagaluka, omu cihugo c’omwizimya n’endunduli, 22emunda endunduli n’enshandâle bishûndwa, emunda omûshi guyôrha nka budufu bukulu.