BIBLIYA NTAGATIFU OMU MASHI
AGA KABIRI EMWA ABAKORINTI 4
Co cirhumire, rhwe rhwabêrîrwe obwonjo erhi rhuhâbwa obwo bugo, rhurhagonyâla. Ci okuhulika erhi nshonyi zirhuma, rhurhacikubâmwo. Obwenge bw’okurhebana rhurhabubâkwo, n’oluderho lwa Nyamuzinda rhurhaluhindula. Ci omu kuyêrekana okunali mwo rhucîmanyikiza oku mirhima y’abantu omu masù ga Nnâmahanga. N’akabà Emyanzi y’Akalembe rhuyigîriza eciri mifulike, balya bâhera bo enafulisirwe, balya barhayêmêra, balya Nyamuzinda w’en’igulu1 ahusize obukengêre, mpu bankanabona obulangashane bw’Emyanzi y'Akalembe y’irenge lya Kristu, y’eri nshusho ya Nnâmahanga2. Bulyâla arhali rhwêne rhuja rhwaciderha, ci Nyakasane Yezu Kristu rhuja rhwamanyîsa. Rhwêhe rhuli barhumisi binyu, erhi buzigire bwa Yezu Kristu burhuma. Bulya Nyamuzinda waderhaga mpu omu omwizimya murhenge obumoleke, yêne ye wanamolekeraga omu mirhima yîrhu, mpu obulangashane bw’irenge lya Nyamuzinda liri ebusù bwa Kristu bumanyibwe.
Amalibuko n’obulangâlire bw’abajà-bugo
Ci kwônene obwo buhirhi omu mibiri y’obudaka rhubugwâsize, lyo bamanya oku obuhashe butyo kuli Nyamuzinda burhenga, ci arhali kuli rhwe. Rhufundêrîre enyunda zoshi, ci rhurhahinangusiri; rhurhamanyiri cici rhulangâlirage, ci erhi rhunalangâlîre. Barhurhindibuza, ci rhurhali balîkirire; barhukubire, ci rhurhahimirwi. Amababale g’olufù lwa Yezu, rhugadwîrhe omu mubiri gwîrhu ngasi hoshi na ngasi mango, ly’obuzîne bwa Yezu nabo bubonekera omu mubiri gwîrhu. Bulya, ciru rhukabà rhuzîne, ngasi kasanzi rhuli batwîre okufà erhi Yezu orhuma, ly’obuzîne bwa Yezu nabo bubonekera omu mubiri gwîrhu gwâfè. Ntyo olufù ludwîrhe lwajira omukolo gwâlwo muli rhwe3, ci muli mwe buzîne.
Ci kulya kubà nshôkano4 nguma y’obuyêmêre rhugwêrhe, nka kulya biyandisirwe, mpu5: Nayêmîre, co canarhumaga nshambâla, nîrhu rhuyêmîre, co cinarhuma rhushambâla; bulya rhumanyire oku owafûlaga Nyakasane Yezu, ayish’irhufûla nîrhu haguma na Yezu, anayish’irhuhira aha burhambi bwâge haguma ninyu. N’ebyo byoshi mwe bibêra, mpu lyo enshôkano nyinji kulusha erhuma omunkwa gwaluga, gunaluze abaguvuga, lyo Nyamuzinda ajà irenge.
Co cirhuma rhurhagonyâla. Ci oku omuntu orhuli embuga6 ashandâla, omuntu orhulimwo ahinduka muhyâhya ngasi lusiku. Bulya okwôla kulibuka hityungunu kwa hisanzi hitya kurhurheganyiza kulusha ngasi lugero omwandu gw’irenge ly’ensiku n’amango. Co cirhuma rhurhalola ebiboneka, ci ebirhaboneka; bulya ebiboneka birhashinga kasanzi, ci ebirhaboneka biri by’ensiku n’amango.
Source notes (6)
- Footnote Shetani oyo ocihamba mpu yekola nn’eri igulu, ye olya wabwira Yezu mpu amuharamye! ( Mat 4, 9-11 ). Ntâye arhamanamanakwo.
- Footnote rhulole amahugûlo omu 3, 18 .
- Footnote olufù luli lwajira omukolo gwâlwo: Omukolo n’amalibuko g’obugo'bw’entumwa binyihya amagala gâzo, ci byo birhuma Nnâmahanga ashobôza abemêzi obuzîne bw’okuli. Kwo omuganda ashusha Nnawâbo Yezu ntyo; Yezu acîhânyire bunguke bw’abandi, kwo n’entumwa y’okuli ejira.
- Footnote Nshôkano ya Mûka Mutagatîfu.
- Cross-reference Lul 116.
- Footnote Omuntu orhuli embuga gwo mubiri, n’orhulimwo, bwo buzîne rhwashobôlaga erhi rhuhinduka bâna ba Nnâmahanga omu Bubatizo.
BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.