1 Bâmi 4

Abarhambo b’emirhwe ya Salomoni

1Mwâmi Salomoni ayîma ecihugo c’Israheli coshi. 2Abarhambo bâge bali babà: Azaryahu, mwene Sadoki, mudâhwa, 3Elihorefi na Ahiya, mwene Shisha, bandisi. Yozafati, mugala wa Ahiludi, murhindisi. 4Benayahu, mwene Yehoyada, murhambo w’engabo y’abalwî. Sadoki n'Abiyatari, badâhwa 5Azaryahu, mwene Natani murhambo wa barhambo, Zabudi, mwene Natani, mudâhwa na mwîra wa mwâmi, 6Ahishari, cibwindi c’omu nyumpa ya mwâmi. Eliyahu, mugala wa Yowabu, murhambo w’abasirika. Adonirami, mugala wa Abda, murhambo w’abanyakasi.

7Salomoni ali agwêrhe barhambo ikumi na babirhi omu cihugo coshi c’Israheli, bo bakâg’ilêrha ebiryo bilibwa aha bwâmi; ngasi muguma agwêrhe ogwâge mwêzi g’okurhûla. 8Amazîno g’abo barhambo gaga: Bene-Huri, w’omu mirhezi y’e Efrayimu. 9Bene-Dekeri e Makasi, e Shaalbimu, e Bet-Shemeshi na Eloni-Bet­ Hanani. 10Bene-Hesedi w’aha Aruboti; ali agwêrhe na Soko n’ecihugo coshi c’e Heferi. 11Bene-Abinadabu ali arhegesire entambirhambi z’e Dori; mukâge ye wali Tafata, mwâli wa Salomoni. 12Bâmina, mwene Ahiludi, erhi arhambula e Tanaka n’e Megido na kuhika e Yokimeyamu, n’e Beti-Sheani yoshi ebibikanwa na Sartani enyanya ly’e Yizreeli, kukahika e Abeli-Mehola ishiriza ly’e Sortani. 13Bene Geberi enyanya ly’e Galadi kuhika oku cishagala c’e Yayiri emwa bene Menashè, abayûbaka e Galadi. Ali arhegesire ecihugo c’e Argobu cibà e Bashani, bishagala binene makumi gali ndarhu, bizonzirwe n’e­ byôgo n’empamikizo y’amarhale. 14Ahinadabu mwene Ido aha Mahanayimu. 15Ahimasi e Nefutali, naye ali ayiankire Salomoni omwâli oderhwa Basmati. 16Bâna mugala wa Hushayi akâg’irhegeka e Asheri n’e Beyaloti. 17Yehozafati mwene Paruwah omu Isakari. 18Shimeyi mugala wa Ela omu Benyamini. 19Geberi mwene Uri arhegeka ecihugo ca Gadi, eca Sihoni mwâmi wa Abamoriti n’ecihugo ca Ogu, mwâmi wa Bashani. Hali n’omurhambo w’engabo orharhengaga omu cihugo. 20Bene Yûda na bene Israheli bali banji, banji nka mushenyi gw’oku nyanja: bakalya bananywa, banalama n’omurhûla.