مُکاشفہ 21

نواں اسمان تے نوِیں زمین

1وَل مَیں ہِک نواں اسمان تے ہِک نوِیں زمین ڈِٹھی کیوں جو پہلا اسمان تے پہلی زمین چلی گئی ہئی تے کوئی سمندر نہ ریہا۔ 2وَل مَیں مُقدّس شہر نویں یروشلیم کُوں خُدا کنُوں اسمان تُوں لہندے ڈِٹھا۔ او اُوں کُنوار وانگُوں سجایا گِیا ہا جئیں آپنڑے پئے کیتے سنگھار کیتا ہووے۔ 3تے مَیں تخت ءچوں کہیں کُوں اُچی اواز نال ایہ آدھے سُنڑیا جو ”ڈیکھ خُدا دی سکونت گاہ ہُنڑ اِنساناں دے وچال ہے تے او اُنہاں نال سکونت کریسی۔ او اُوندے لوک ہوسن تے خُدا خود اُنہاں نال راہسی تے اُنہاں دا خُدا ہوسی۔ 4او اُنہاں دے اکھیں دے سارے ہنجُو پُونجھ ڈیسی۔ وَل نہ موت باقی راہسی نہ ماتم، نہ رووݨ تے نہ ای کوئی درد، کیوں جو پہلیاں چیزاں ویندیاں ریہیاں۔“

5وَل اُوں جیہڑا تخت اُتے بیٹھا ہا آکھیا، ”ڈیکھ مَیں ساریاں چیزاں کُوں نواں بنڑیندا پِیا ہاں۔“ وَل آکھیا جو ”لِکھ کیوں جو ایہ گالھیں اعتماد دے لائق تے سچے ہِن۔“ 6وَل اُوں میکُوں آکھیا جو ”مکمل تھی گِیا! مَیں الفا تے اومیگا، ابتدا تے اِنتہا ہاں۔ مَیں ترِسّے کُوں زندگی دے پانڑی دے چشمہ ءچوں مُفت پِلیساں۔ 7جیہڑا غالب آسی او اِنہاں چیزاں دا وارث ہوسی۔ مَیں اُوندا خُدا ہوساں تے او میڈا پوتر ہوسی۔ 8پر بُزدلاں، غیر اِیمانداراں، گندے کم کرݨ آلیاں، قاتلاں، حرام کاراں، جادُوگراں، بُت پرستاں تے سبھ کُوڑیاں دی جاہ بھاہ تے گندھک نال سڑن آلی جھیل ہوسی۔ ایہ ڈُوجھی موت ہے۔“

نواں یروشلیم

9وَل اُنہاں سَت فرشتیاں ءچوں جِنہاں دے کولھ آخری سَت آفتاں نال بھرے سَت مُنگر ہَن، ہِک آ تے میکُوں آکھیا جو ”آ، مَیں تیکُوں کُنوار، یعنی لیلے دی ذال ڈِکھیساں۔“ 10تے او میکُوں رُوح ءچ ہِک وڈے، اُچے پہاڑ اُتے گِھن گِیا تے میکُوں مُقدّس شہر یروشلیم ڈِکھایا جیہڑا خُدا کنُوں اسمان تُوں تلے لہندا پِیا ہا۔ 11او شہر خُدا دے جلال نال روشن ہا تے اُوندی چمک بہُوں ای قیمتی پتھر یعنی یشب وانگُوں ہئی تے بَلّور وانگُوں بالکل صاف۔ 12اُوندی چاردیواری بہُوں وڈی تے اُچی ہئی تے اُوندے بارہاں پھاٹک ہَن۔ تے ہر پھاٹک اُتے ہِک فرشتہ ہئی۔ اُنہاں پھاٹکاں اُتے بنی اِسرائیل دے بارہاں قبیلیاں دے ناں لِکھے ہوئے ہَن۔ 13ترے پھاٹک مشرق دو، ترے شمال دو، ترے جنُوب دو تے ترے مغرب دو ہَن۔ 14اُوں شہر دی چاردیواری دی بنیاد بارہاں پتھراں اُتے قائم ہئی جِنہاں اُتے لیلے دے بارہاں رسُولاں دے ناں لِکھے ہَن۔ 15جیہڑا فرشتہ میڈے نال گالھ کریندا پِیا ہا، اُوندے کولھ شہر تے اُوندے پھاٹکاں تے چاردیواری کُوں ناپنڑ کیتے سونے دا گز ہا۔ 16او شہر چورس ہا یعنی اُوندی لمبائی تے چوڑائی برابر ہئی۔ فرشتے گز نال شہر کُوں ناپیا تاں او چوڈھاں سو (1,400) مِیل1 ہا۔ اُوندی لمبائی، چوڑائی تے اُچائی برابر ہئی۔ 17وَل فرشتے چاردیواری کُوں اِنسانی ناپ دے مطابق ناپیا تاں او ہِک سو چوتالیہہ (144) ہتھ2 ہئی۔ 18او دیوار یشب پتھر نال بنڑی ہئی تے شہر بالکل صاف شیشے وانگُوں خالص سونے دا بنڑیا ہویا ہا۔ 19شہر دی چاردیواری دیاں بنیاداں ہر قِسم دے قیمتی پتھر نال سجیاں ہوئیاں ہَن۔ پہلی بنیاد یشب پتھر نال بنڑی ہئی، ڈُوجھی نیلم نال، تریجھی شب چراغ نال، چوتھی زمُرد نال، 20پنجویں عقیق نال، چِھینویں لعل نال، ستویں سنہرے پتھر نال، اٹھوِیں فیروزہ نال، نانویں زبر جد نال، ڈاہویں یمنی پتھر نال، یارہویں سُنبلی پتھر نال تے بارہویں یاقُوت نال۔ 21او بارہاں پھاٹک بارہاں موتیاں دے ہَن یعنی ہر پھاٹک سالم موتی دا ہا۔ شہر دی سڑک بالکل صاف شیشہ وانگُوں خالص سونے دی ہئی۔

22مَیں شہر ءچ کوئی ہیکل نہ ڈِٹھی کیوں جو خُداوند، قُدرت آلا خُدا تے لیلا اُوندی ہیکل ہِن۔ 23او شہر سِجھ تے چَن دا مُتھاج نئیں، کیوں جو او خُدا دے نُور نال روشن ہے تے لیلا اُوندا چراغ ہے۔ 24قوماں اُوندی روشنی ءچ ٹُرسن تے زمین دے بادشاہ اُوندے ءچ آپنڑا شاندار سامان گِھن آسن۔ 25تے اُوندے پھاٹک ڈینہہ ویلے کڈھائیں وی بند نہ ہوسن کیوں جو اُتھاں رات نہ ہوسی۔ 26قوماں دی شان تے دولت اُوندے ءچ گِھن آئی ویسی۔ 27کوئی ناپاک چیز یا کوئی گندے کم کرݨ آلا یا کُوڑ گھڑن آلا اُوندے ءچ کڈھائیں داخل نہ تھیسی، پر صرف اُوہو جِنہاں دے ناں لیلے دی کتاب ِ حیات ءچ لِکھے گئے ہِن۔