مُکاشفہ 2

اِفِسُس دی کلیسیا کیتے پیغام

1اِفِسُس دی کلیسیا دے فرشتہ کُوں ایہ لِکھ جو

جیہڑا آپنڑے سجے ہتھ ءچ سَت تارے گِھدی کھڑے تے سونے دے سَت چراغ داناں دے وچال پِھردے، او فرمیندے جو 2”مَیں تیڈے کم، تیڈی محنت تے تیڈی ثابت قدمی کُوں جانڑدا ہاں۔ تے ایہ وی جانڑدا ہاں جو تُوں بدکاراں کُوں برداشت نئیں کر سگدا تے جیہڑے آپنڑے آپ کُوں رسُول آدھے ہِن پر ہِن نئیں، تَیں اُنہاں کُوں ازمائے تے کُوڑا ثابت کیتے۔ 3تے تُوں صبر کریندا ہیں تے میڈے ناں دی خاطر مُصیبت برداشت کریندے کریندے نئیں تھکدا۔ 4پر میکُوں تیڈے تُوں ایہ شکایت ہے جو تَیں آپنڑی پہلے آلی محبت چھوڑ ڈِتی ہے۔ 5بس یاد کر جو تُوں کِتھوں ڈھٹھا ہیں۔ توبہ کر تے، اُوہو کم کر جیہڑے پہلے کریندا ہَویں، نہ تاں مَیں تیڈے کولھ آ تے تیڈے چراغ کُوں اُوندی جاہ کنُوں ہٹا ڈیساں۔ 6پر ایہ گالھ تیڈے حق ءچ ہے جو تُوں نِیکُلیاں1 دے کماں تُوں نفرت کریندیں جِنہاں تُوں مَیں وی نفرت کریندا ہاں۔

7جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔ جیہڑا غالب آسی مَیں اُونکُوں زندگی دے اُوں درخت دا پھل کھاوݨ کیتے ڈیساں جیہڑا خُدا دے فِردوس ءچ ہے۔“

سمُرنہ دی کلیسیا کیتے پیغام

8سمُرنہ دی کلیسیا دے فرشتہ کُوں ایہ لِکھ جو

جیہڑا اوّل تے آخر ہے تے جیہڑا مر گِیا ہا تے ولا زندہ تھی گئے، او فرمیندے جو 9”مَیں تیڈی مُصیبت تے غریبی کُوں جانڑدا ہاں، پر حقیقت ءچ تُوں دولت مند ہیں2۔ تے مَیں اُنہاں لوکاں دی تُہمت کُوں وی جانڑدا ہاں جیہڑے آپنڑے آپ کُوں بنی اِسرائیل3 تاں اکھیندے ہِن پر ہِن نئیں بلکہ شیطان دی جماعت ہِن۔ 10جیہڑے ڈُکھ تیکُوں سہنڑے ہوسن اُنہاں کنُوں نہ ڈر۔ ڈیکھ ابلیس تیڈے لوکاں ءچوں کُجھ کُوں قید ءچ بند کراوݨ آلا ہے تاں جو تیکُوں ازماوے تے تُوں ڈاہ ہِک ڈینہہ تئیں مُصیبت چیسیں۔ جان ڈیوݨ تئیں وفادار رہ تاں مَیں تیکُوں زندگی دا تاج ڈیساں۔

11جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔ جیہڑا غالب آسی اُونکُوں ڈُوجھی موت4 کنُوں کوئی نُقصان نہ پُجسی۔“

پِرگمُن دی کلیسیا کیتے پیغام

12پِرگمُن دی کلیسیا دے فرشتہ کُوں لِکھ جو

جیندے کولھ ڈُو دھاری تلوار ہے، او فرمیندے جو 13”مَیں جانڑدا ہاں جو جِتھاں تُوں راہندیں اُتھاں شیطان دا تخت5 ہے، پر وَل وی تُوں میڈے ناں نال وفادار ریہا ہیں۔ تے اُنہاں ڈینہاں ءچ وی جِیں ویلے میڈا سچا گواہ اِنتپاس تیڈے شہر ءچ شہید کیتا گِیا جِتھاں شیطان راہندے، اُوں ویلے وی تَیں میڈے اُتے اِیمان رکھنڑ تُوں اِنکار نئیں کیتا۔ 14پر میکُوں تیڈے تُوں کُجھ گالھیں دی شکایت ہے جو تیڈے ءچوں کُجھ لوک بلعام دی تعلیم6 دی پیروی کریندے ہِن، جئیں بلق کُوں سِکھایا جو بنی اِسرائیل کُوں کِینویں گُمراہ کرے تے نتیجے ءچ اُنہاں بُتاں کُوں نذر کیتیاں گئیاں قُربانیاں دا گوشت کھادا تے حرام کاری کیتی۔ 15اینویں ای تیڈے ءچ کُجھ ایجھے لوک وی ہِن جیہڑے نِیکُلیاں دی تعلیم دی پیروی کریندے ہِن۔ 16اِیں واسطے توبہ کر، نہ تاں مَیں جلدی تیڈے کولھ آساں تے آپنڑے مُنہ دی تلوار نال اُنہاں نال لڑساں۔

17جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔ جیہڑا غالب آسی مَیں اُونکُوں پوشیدہ مَن ءچوں ڈیساں۔ مَیں اُونکُوں ہِک سفید پتھر وی ڈیساں جیندے اُتے نواں ناں لِکھیا ہوسی، جِیندا علم صرف اُونکُوں ہوسی جِینکُوں او مِلسی۔“

تھواتِیرہ دی کلیسیا کیتے پیغام

18تھواتِیرہ دی کلیسیا دے فرشتہ کُوں لِکھ جو

خُدا دا پوتر جیندے اکھیں بھاہ دے شعلہ وانگُوں تے جیندے پیر خالص پِتّل وانگُوں ہِن، ایہ فرمیندے جو 19”مَیں تیڈے کماں، تیڈی محبت، تیڈے اِیمان، تیڈی خدمت تے تیڈی ثابت قدمی کُوں جانڑدا ہاں تے ایہ وی جو تُوں ہُنڑ پہلے کنُوں وی زیادہ کم کریندا پِیا ہیں۔ 20پر میکُوں تیڈے تُوں ایہ شکایت ہے جو تَیں اُوں عورت اِیزبل7 کُوں جیہڑی آپنڑے آپ کُوں نبِیّہ آدھی ہے، نئیں روکیا۔ او میڈے خادماں کُوں تعلیم ڈے تے گُمراہ کریندی ہے جو او بُتاں کُوں پیش کیتیاں گئیاں قُربانیاں دا گوشت کھاوݨ تے حرامکاری کرݨ۔ 21مَیں اُونکُوں مُہلت ڈِتی ہے جو او آپنڑی بدکرداری تُوں توبہ کرے پر او توبہ کرݨ نئیں چاہندی۔ 22ڈیکھو! مَیں اُونکُوں اِینویں سزا ڈیساں جو او بسترے اُتے پئی راہسی تے جیہڑے اُوندے نال زِنا کریندے ہِن، جے او آپنڑے بُرے کماں تُوں توبہ نہ کریسن تاں مَیں اُنہاں کُوں وی سخت مُصیبت ءچ پَھسا ڈیساں۔ 23مَیں اُوں عورت دے فرزنداں کُوں جان کنُوں مار ڈیساں۔ وَل ساریاں کلیسیاواں کُوں پتا لگ ویسی جو مَیں ای ہاں جیہڑا دِلاں تے ذہناں کُوں پرکھدا ہاں تے مَیں تُہاڈے ءچوں ہر ہِک کُوں اُوندے کماں دے مطابق بدلہ ڈیساں۔

24پر تُساں تھواتِیرہ دے باقی لوکاں کُوں جِنہاں اِیزبل دی تعلیم دی پیروی نئیں کیتی تے جِنہاں اُنہاں گالھیں کُوں نئیں سِکھیا، جِنہاں کُوں لوک شیطان دے گہرے راز آدھے ہِن، مَیں ایہ آدھا ہاں جو مَیں تُہاڈے اُتے کوئی بِیا بھار نہ پیساں، 25سوائے اِیندے جو جیہڑا کُجھ تُہاڈے کولھ ہے، اُونکُوں میڈے آوݨ تئیں مضبوطی نال پکڑی رکھو۔ 26جیہڑا غالب آسی تے آخر تئیں میڈی مرضی دے مطابق عمل کریسی، مَیں اُونکُوں قوماں اُتے اِختیار ڈیساں، 27بالکل اِینویں جِینویں مَیں وی آپنڑے باپ کنُوں اِختیار پاتے،

’او لُوہے دی سوٹی نال اُنہاں اُتے حکُومت کریسی،

تے اُنہاں کُوں مِٹی دے تھانواں آلی کار ٹُکڑے ٹُکڑے کر ڈیسی8۔‘

28تے مَیں اُونکُوں صُبح دا تارہ وی ڈیساں۔

29جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔“