متّی 4

یسُوع دا ازمایا ونجنڑ

1وَل رُوح القُدس یسُوع کُوں بیابان ءچ گِھن گِیا تاں جو او ابلیس تُوں ازمایا ونجے۔ 2چالیہہ ڈینہہ تے چالیہہ رات دے روزے تُوں بعد آخر اُونکُوں بُکھ لگی۔ 3وَل ابلیس کولھ آ تے اُونکُوں آکھیا، ”جے تُوں خُدا دا پوتر ہیں تاں اِنہاں پتھراں کُوں آکھ جو ایہ روٹیاں بنڑ ونجنڑ۔“

4اُوں جواب ءچ آکھیا، ”لِکھیا ہے جو ’اِنسان صرف روٹی نال ای زندہ نہ راہسی بلکہ ہر گالھ تُوں جیہڑی خُدا دے مُنہ ءچوں نِکلدی ہے1‘۔“

5وَل ابلیس اُونکُوں مُقدّس شہر ءچ گِھن گِیا تے ہیکل دے منارے اُتے کھڑا کر تے اُونکُوں آکھیا، 6”جے تُوں خُدا دا پوتر ہیں تاں آپنڑے آپ کُوں تلے سَٹ ڈے کیوں جو لِکھیا ہے جو

’او تیڈے کیتے آپنڑے فرشتیاں کُوں حُکم ڈیسی

تے او تیکُوں آپنڑے ہتھاں اُتے چا گِھنسن

اِینویں نہ تھیوے جو تیڈے پیراں کُوں پتھر نال دھک لگے2‘۔“

7یسُوع اُونکُوں آکھیا، ”ایہ وی لِکھیا ہے جو تُوں رب آپنڑے خُدا دی ازمائش نہ کر3۔“

8وَل ابلیس اُونکُوں ہِک بہُوں اُچے پہاڑ اُتے گِھن گِیا تے دُنیا دیاں ساریاں بادشاہیاں تے اُنہاں دی شان و شوکت اُونکُوں ڈِکھائی۔ 9تے اُونکُوں آکھیا، ”جے تُوں میڈے اگُوں جُھک تے میکُوں سجدہ کریں تاں مَیں ایہ سبھ کُجھ تیکُوں ڈے ڈیساں۔“

10یسُوع اُونکُوں آکھیا، ”شیطان! دُور تھی وَنج، کیوں جو لِکھیا ہے جو ’تُوں رب آپنڑے خُدا کُوں سجدہ کر تے صرف اُوندی عبادت کر4‘۔“

11وَل ابلیس اُوندے کنُوں چلیا گِیا تے فرشتے آ تے اُوندی خدمت کرݨ لگے۔

یسُوع گلیل ءچ خدمت دا آغاز کریندے

12جِیں ویلے یسُوع ایہ سُنڑیا جو یُوحنّا پکڑوا ڈِتا گئے تاں او گلیل دے علاقے دو چلیا گِیا، 13تے ناصرت کُوں چھوڑ تے کفرنحُوم ءچ راہنڑ لگا، جیہڑا جھیل دے کنارے زبُولُون تے نفتالی دی سرحد اُتے ہے۔ 14اِینویں او کلام جیہڑا یسعیاہ نبی دی معرفت فرمایا گِیا ہا، پُورا تھیّا جو

15”زبُولُون دا علاقہ تے نفتالی دا علاقہ

جھیل دی راہ یردن دریا دے پار

غیر قوماں دی گلیل:

16جیہڑے لوک اندھارے ءچ راہندے ہَن

اُنہاں تیز روشنی ڈِٹھی

جیہڑے موت دے مُلک تے پچھاویں ءچ راہندے ہَن

اُنہاں اُتے نُور چمکیا5۔“

17اُوں ویلے تُوں یسُوع تبلیغ کرݨ تے ایہ آکھنڑ شروع کیتا، ”توبہ کرو کیوں جو اسمان دی بادشاہی نیڑے آ گئی ہے۔“

یسُوع مچھیریاں کُوں چُنڑدے

18گلیل دی جھیل دے کنارے اُتے ٹُردے ہوئے یسُوع ڈُو بِھرانواں، شمعون جیہڑا پطرس اکھویندا ہا تے اُوندے بِھرا اندریاس کُوں جھیل ءچ جال سٹیندے ڈِٹھا کیوں جو او مچھیرے ہَن۔ 19اُوں اُنہاں کُوں آکھیا، ”میڈے پِچُھوں آؤ تے مَیں تُہاکُوں خُدا کیتے بندے پکڑن آلا بنڑیساں۔“ 20او فوراً آپنڑے جال چھوڑ تے اُوندے پِچُھوں ٹُر پئے۔

21اُتھوں اگھاں ودھ تے اُوں ڈُو بئے بِھرانواں، یعقُوب تے یُوحنّا کُوں ڈِٹھا جیہڑے زبدی دے پوتر ہَن تے کشتی ءچ آپنڑے پِیُو نال آپنڑے جالاں دی مرمت کریندے پئے ہَن۔ اُوں اُنہاں کُوں سڈیا 22تاں او فوراً کشتی تے آپنڑے پِیُو کُوں چھوڑ تے اُوندے پِچُھوں ٹُر پئے۔

یسُوع تعلیم ڈیندے تے شِفا ڈیندے

23یسُوع سارے گلیل ءچ پِھردا ریہا تے عبادت خانیاں ءچ تعلیم ڈیندا تے بادشاہی دی خوشخبری سُنڑیندا ریہا، تے لوکاں کُوں ہر طرحاں دی بیماری تے کمزوری تُوں شِفا ڈیندا ریہا۔ 24یسُوع دی شُہرت سارے سُوریہ ءچ تھی گئی تے لوک سبھ بیماراں کُوں جیہڑے طرحاں طرحاں دیاں بیماریاں تے تکلیفاں دے وکھیڑے ءچ ہَن اُوندے کولھ گِھن آوݨ لگے تے اُنہاں کُوں وی جیہڑے مِرگی دے تے فالج دے مریض ہَن تےجِنہاں ءچ بدرُوحاں ہَن۔ تے اُوں اُنہاں سبھ کُوں شِفا ڈِتی۔ 25تے گلیل، دکپُلس، یروشلیم، یہُودیہ تے یردن دے پار تُوں وڈی بِھیڑ اُوندے پِچُھوں تھی پئی۔