2 پطرس 2

کُوڑے اُستاد

1پر جِینویں بنی اِسرائیل ءچ کُوڑے نبی وی ہَن، اُونویں ای تُہاڈے ءچ وی کُوڑے اُستاد ہوسن۔ او چلاکی نال ہلاک کرݨ آلیاں بِدعتاں کِھنڈیسن، بلکہ آپنڑے اُوں مالک دا اِنکار کریسن جئیں اُنہاں کُوں مُل گِھدا ہا۔ ایجھے کماں نال او آپنڑے اُتے جلد ہلاکت گِھن آسن۔ 2بہُوں سارے لوک اُنہاں دی شہوت پرستی دی پیروی کریسن جیندے سببّوں سچائی دی راہ دی بدنامی تھیسی۔ 3لالچ دے سببّوں ایہ اُستاد فرضی گالھیں سُنڑا تے تُہاڈے تُوں ناجائز فائدہ چیسن۔ پر اُنہاں دی سزا دا حُکم بہُوں پہلے کنُوں تھی گئے، تے او سزا تیار ہے تے اُنہاں دی ہلاکت ءچ دیر نہ تھیسی۔

4ڈیکھو، خُدا اُنہاں فرشتیاں کُوں نئیں چھوڑیا جِنہاں گُناہ کیتا، بلکہ اُنہاں کُوں اندھارے دیاں زنجیراں نال1 بَدھ تے دوزخ ءچ سَٹ ڈِتا تاں جو عدالت دے ڈینہہ تئیں قید ءچ راہوݨ۔ 5اِینویں ای خُدا قدیم دُنیا کُوں نہ چھوڑیا بلکہ دُنیا دے بے دین لوکاں اُتے طوفان بھیج تے صرف راستبازی دی منادی کرݨ آلے نُوح کُوں بئے سَت لوکاں سمیت بچا گِھدا۔ 6تے خُدا سدُوم تے عمُورہ دے شہراں کُوں ہلاکت دے لائق قرار ڈے تے اُنہاں کُوں ساڑ تے سواہ کر ڈِتا تے آوݨ آلے زمانہ دے بے دیناں کیتے عِبرت دا نشان بنڑا ڈِتا۔ 7پر راستباز لُوط کُوں بچایا جیہڑا بدکاراں دے گندے چال چلنڑ تُوں تنگ ہا۔ 8کیوں جو اُنہاں دے وچال راہندے ہوئے، اُوں راستباز آدمی دا پاک دل اُنہاں دے بُرے کماں کُوں ڈیکھ تے، تے سُنڑ تے عذاب ءچ راہندا ہا۔ 9تاں ظاہر ہے جو خُداوند دیندار لوکاں کُوں ازمائش تُوں بچاوݨ تے بے دین لوکاں کُوں عدالت دے ڈینہہ تئیں سزا ءچ رکھنڑ جانڑدے 10خاص کر اُنہاں کُوں جیہڑے آپنڑے جِسم دیاں گندیاں خواہشاں دی پیروی کریندے ہِن تے اِختیار کُوں حقیر سمجھدے ہِن۔

ایہ لوک گُستاخ تے مغرُور ہِن تے جلالی ہستیاں دی توہین کرݨ تُوں نئیں ڈردے۔ 11حالانکہ اِیندے مُقابلہ ءچ فرشتے وی، جیہڑے طاقت تے قُدرت ءچ اُنہاں تُوں وڈے ہِن، خُداوند دے سامنڑے لعن طعن کر تے اُنہاں ہستیاں اُتے اِلزام نئیں لیندے۔ 12پر ایہ کُوڑے اُستاد، آپنڑی فطرت اُتے چلنڑ آلے ناسمجھ جانوراں وانگُوں ہِن جیہڑے اِیں واسطے پیدا تھئے ہِن جو اُنہاں کُوں پکڑیا تے ختم کیتا ونجے۔ او ایجھے گالھیں دی توہین کریندے ہِن جِنہاں کُوں او نئیں سمجھدے، تے اُنہاں دی بربادی ءچ او وی برباد تھی ویسن۔ 13ڈُوجھیاں کُوں نُقصان پُچاوݨ دے بدلے ءچ اُنہاں کُوں نُقصان تھیسی۔ اُنہاں دے نیڑے لُطف چاوݨ تُوں مُراد ایہ ہے جو ڈینہہ ویلے کُھل تے عیاشی کرݨ۔ او داغ تے دھبے ہِن جیہڑے تُہاڈے نال رفاقتی کھانڑے2 ءچ شریک تھی تے عیاشیاں کریندے ہِن۔ 14اُنہاں دے اکھیں ہر ویلے زِناکار عورتاں دی گولھ ءچ راہندیاں ہِن، تے گُناہ کرݨ تُوں کڈھائیں باز نئیں آندیاں۔ او کمزور لوکاں کُوں غلط کم کرݨ کیتے ورغلیندے ہِن تے لالچ کرݨ ءچ ماہر ہِن۔ او لعنتی ہِن۔ 15او صحیح راہ کُوں چھوڑ تے گُمراہ تھی گئے ہِن تے بلعام بِن بعور دے رستے اُتے ٹُردے پئے ہِن جئیں بُرے کماں دی مزدُوری کُوں پسند کیتا۔ 16پر گڈھاں اُونکُوں اِیں گُناہ پارُوں ملامت کیتی۔ اُوں جانور، جیہڑا بولنڑ دے قابل نہ ہا، اِنسان جیہی اواز ءچ گالھ کیتی تے نبی کُوں اُوندی بیوقُوفی کنُوں روکیا3۔

17ایہ لوک سُکے ہوئے چشمے تے اندھاری دے اُڈائے ہوئے بدّل ہِن۔ اِنہاں کیتے سخت اندھارا مقرر ہے۔ 18ایہ غرور دیاں فضول گالھیں کریندے ہِن، تے بے ہُودہ جسمانی خواہشاں نال ایجھے لوکاں کُوں ورغلیندے ہِن جیہڑے گُمراہی ءچ راہوݨ آلیاں ءچوں ہُنڑیں ہُنڑیں بچ نِکلے ہِن۔ 19ایہ کُوڑے اُستاد اُنہاں دے نال تاں ازادی دا وعدہ کریندے ہِن پر خود بُرائی دے غُلام بنڑے پئے ہِن۔ کیوں جو جیہڑی چیز اِنسان اُتے غالب آ ویندی ہے، اِنسان اُوندی غُلامی ءچ ہوندے۔ 20تے جے او لوک خُداوند تے نجات ڈیوݨ آلے یسُوع مسیح دی پچھاݨ دے وسیلہ نال دُنیا دی گندگی کنُوں چُھٹ تے ولا کنُوں اُوندے ءچ پَھس ونجنڑ تے اُوندے قبضے ءچ آ ونجنڑ، تاں اُنہاں دی حالت پہلی حالت کنُوں وی بدتر تھی ویندی ہے۔ 21اُنہاں صداقت دی راہ کُوں جاݨ تاں گِھدا پر اُوں پاک حُکم کنُوں پِھر گئے جیہڑا اُنہاں کُوں ڈِتا گِیا ہا۔ اُنہاں کیتے اِیہو چنگا ہا جو اِیں راہ کُوں کڈھائیں نہ جانڑدے۔ 22اُنہاں اُتے ایہ کہاوت سچ آندی ہے جو ”کُتا آپنڑی اُلٹی دو واپس آندے“ تے ”دھاتی ہوئی سُورنی ولا چِکڑ ءچ ویندی ہے۔“