Santhali Project
आपोस का़मि 28
मा़लटा़ रे
आरले बाञचाव राकाप्एन खानले बाडायकेदा, ओना टा़पु दो मा़लटा़को मेताक्आ मेनते। आर ओंडेन होड़को दो आ़डितेत्को माँयाँवाक्लेया, आर दाक्ए जा़ड़ियेत्कान आर राबाङकान ताहेंकान इया़ते सेङगेल जोलकेत्ते आले जोतोकोको आताङ दारामकेत्लेया मेनखान पावल दो ढेर ञोक् झुरि सामटावकेत्रे सेङगेलरेये ठेकावकेत् खान मित्टेच् बिसान बिञ दो सेङगेल दाँकते ओडोकेनते उनियाक् तिरेये बेदहावेना। खानगे ओंडेन होड़ दो उनियाक् तिरे उनि बिञ ढिलवा़ङ आकान ञेलकेदेतेको मेपेनेना, “धोरागे खुनिया़ँहि कानाय नुय होड़ दो जालापुरि खोने बाञचाव ओडोक आकान रेहों होक बिक्चा़रिच् दो जिवेत् बाय ताहें ओचोवाय काना।” मेनखान उनि दो उनि बिञ सेङगेलरेये इरचि गिडि गोत्कादेया आर आच् दो चेत् हों बाय हा़नलेना। मेनखान ओनको दोको ञेल होहोरकान ताहेंकाना उनि दोए भारावक्आ आर बाङखान आचकागे गोच् भिनदा़ड़ गोदोक्आ नाहाँक्, आर ढेर घा़ड़ि ञेल होर ञेल होरते उनिरे चेत् हों बाङ होयोक्कान ञेलकेत् खान हुदिस आ़चुरकातेको मेनकेदा, “नुय दो मित्टेन देब कानाय।”
आर ओना जायगा आडेपासे दो पुबलियुस ञुतुमानिच् ओना टा़पुरेन नापड़ाक् होड़ रेयाक् ओत ताहेंकाना, आर उनि दो आताङ आदेरकेत्लेते पे माँहाँ आ़डि मोजतेये पेड़ाकेत्लेया। आर नोनका होयेना, पुबलियुस आपात दो रुवा़ आर सुलतेये जाड़ावआकान ताहेंकाना, आर उनि ठेन बोलोयेनते पावल दो कोयकाते उनिरे तिकिन चापोवादेतेये बोगे केदेया। आर ओनका होयेन खान ओना टा़पुरेन सारेच् रुगिको होंको हेच्एना आरको बोगे ओचोयेना। आर ओनको दो आ़डि मानोतको मानोतकेत्लेया, आर ओंडे खोन जाहाजतेले चालाक् जोखेच् जा़रुड़ोक्आक्को जाहाजरेको बोजाव गोत्आत्लेया।
मा़लटा़ खोन रोमते
आदो पे चाँदो तायोम आले दो आलेकसान्डेरिया़ रेयाक् मित्टेन जाहाजरेले देच्एना, ओने ओकाटाक् ओना टा़पुरे राबाङ दिनले टालाव आकात् ताहेंकान ओना दो “जावा देबकिनाक् मुठा़नते” चिनहा़प आकान ताहेंकाना। आर सुरा़कुस आतोरे जाहाज तेङगोकेत्ते पे माँहाँ ओंडेले ताहेंयेना। आर ओंडे खोन आ़चुर चालावेनते रेगियुम नागराहारेले सेटेरेना, आर मित् दिन तायोम दा़खिन सेच् खोने होयकेत्ते दोसार हिलोक् दो पुटेयोलितेले हेच्एना। ओंडे दो बिसवा़सिकोले ञामकेत्कोवा आरको नेहोंरात्लेते ओनको ठेन एयाय माँहाँले ताहेंयेना आर ओनकाते रोमतेले हेच्एना। आर ओंडे खोन बिसवा़सिको दो आले रेयाक्को आँजोमकेत् खान आले दाक्रामको हेच्एना, आ़प्पियोस हाट आर पे सा़रा़इ हा़बिच्, पावल दो ओनकोय ञेलकेत्को खान इसोरे गुन मानाव जोहारादेया आरे खा़तिरजोमायेना।
रोम रे
आर रोमतेले बोलोयेन खान, पावल दो आच् होरहोयेदिकान पालटोन तुलुच् एसकारगेको ताहें ओचोवादेया।
आर पे माँहाँ तायोम उनि दो जिहुदिको मोदरेन ओंडे ताहेंकान नापड़ाक् नापड़ाक् होड़कोय होहो जारवाकेत्कोवा आदोको हेच् जारवायेन खाने मेतात्कोवा ए बोयहाको, इञ दो आबो जा़तरेनको से हापड़ामकोवाक् चा़लि बिरुदरे चेत् हों बा़ञ चेकाआकात्रे हों एनरेहों जेरुसालेम खोन का़इदिकाते रोमिकोवाक् तिरेञ सोपरोत ओचोयेना। आर ओनको दो इञको कुलि बाड़ाकेदिञ खान आड़ाक्का़ञको मेनवाना, गोच् ओचोक् लेक चेत् दोस हों इञरे बाङ ताहेंकान इया़ते मेनखान जिहुदिकोको रोड़ दारामकेत् खान का़इसा़र दोहायाय ला़गित् जा़रुड़ होयेनतिञा मेनखान इञ जा़तरेनको जाहानाक् बोहोक्को ला़गित् ताहेंकानतिञा, ओना इया़ते बाङा।1 आदो नोवा कारोनतेगे आपे तुलुच् ञेपेलोक् आर गालमारावापेया मेनतेञ होहो आ़गु ओचोवाकात्पेया, एनते इसराएलको रेयाक् आस जिसु खा़तिरतेगे नोवा सिकड़िते दोञ तोल आकान।
खानगेको मेतादेया, आले दो आम रेयाङ जिहुदा़ खोन चिठिको हों बाले ञामआकादा, आर बोयहाको मोदरेन ओकोय हों नोंडे हेच्काते आम रेयाक् जाहानाक् बा़ड़िच् दो बाको रोड़ाकादा। मेनखान आमाक् मोन रेयाक् आम ठेन खोन आँजोम दो ठिकले मेताक्काना, एनते नोवा सिकना़त दोल रेयाङ दो आलेले बाडाया, सानाम टा़न्डिगे रोड़ दारामोक्काना।
आदो मित्टेच् दिन नेन्डावादेते ढेर होड़ उनि ठेन उनियाक् डेरातेको हेच्एना ओने ओनको सेताक् खोन आ़युप् हा़बिच्ए गालमारावात्को इसोराक् राज रेयाक् गोहा एमकाते आर मोसे रेयाक् आ़न खोन हों आर ना़बिकोवाक् खोन हों जिसु रेयाक्ए बुजहा़वाकोकान ताहेंकानते। आर आदोमको दो रोड़ेनाक्कोतेको धिरपुरेना, आर आदोमको दो बाको पा़तिया़वादा। आदो आको आकोरे काथा एपड़ेयेनताकोतेको चालाव बाड़ायेना, पावल मित् काथाय रोड़केत्ते बाङमा सोनोत जिउ दो जेसाया ना़बि होतेते आपेरेन हापड़ामको ठेन ठिकगेये रोड़लाक्आ। एनकाथाय,
“दु नोको जा़तरेनको ठेन सेनकाते मेताकोम,
आँजोम दोपे आँजोमगेया, मेनखान बापे बुजहा़वा,
आर ञेल दोपे ञेञेलगेया, मेनखान बाङगेपे ओरोमा।2
एनते नोको होड़ाक् मोन दो दा़रिया़येन ताकोवा
आर लुतुर दो गोधड़ोयेनताकोवा,
आर मेंत् दोको जा़पित् आकात्ताकोवा,
जेमोन मेंत्ते आलोको ञेल
आर लुतुरते आलोको आँजोम,
आर मोनते आलोको बुजहा़उ
आरको आ़चुर रुवा़ड़ोक्
आर इञ बोगे बोतेच्केको।”
आदो पावले मेन जुटुच्केदा ओना इया़ते बाडाय जोङपे, इसोराक् बाबाञचाव सोमबात दो जिहुदि बाहरेरेनको ठेनगे कोल आकाना, आर ओनकोको आँजोमा। आदो नोवाको काथाय रोड़केत् खान जिहुदिको दोको आपान आ़पिनेना, आको आकोरे ढेरको आपठा आ़पठिक् कानते।
आर पावल दो बार सेरमा पुरा़ पुरि आयाक् भाड़ा ओड़ाक्रेये ताहेंयेना, आर आच् ठेन हिजुक्कान सानामकोय आताङ दारामेत्को ताहेंकाना। आर इसोराक् राज रेयाक्ए पोरचाराको कान आर प्रोभु जिसु मा़सि रेयाङे चेत्आको कान ताहेंकानते, आ़डि सोहोसाते आर बिन बोतोरते।
Source notes (2)
- Cross-reference आ का़ २५:११
- Cross-reference जेसा ६:९,१०
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.