Santhali Project
आपोस का़मि 18
कोरिन्थिरे पावल
ओनाको तायोम उनि दो आथेंस खोन ओडोक चालावेनते कोरिन्थि रेये सेटेरेना। आर आ़कविला़ ञुतुमान मित्टेन जिहुदिये ञाम केदेया, जानामते पोनतुसरेन होड़गे, ओने उनि सोर दिनगे आच् ओड़ाक् होड़ प्रिसकिला़ साँवते इटा़लिया़ खोने हेच् आकान ताहेंकान, एनते कलोउडियोसे हुकुमाकात् ताहेंकाना, सानाम जिहुदिको रोम खोनको ओडोक चालाक्आ मेनते। आर उनकिन ठेने चालावेना, आर मित् लेकानाक्गे का़मि ताहेंकानताकोते उनकिन ठेने ताहेंयेना, आरको का़मिकान ताहेंकाना, एनते ता़मबु बेक्नावकोको ताहेंकाना। आर जिरा़उक् माँहाँ पिछे सुना़गोगरे होड़को तुलुच्ए गालमारावाकोकान ताहेंकाना, आर जिहुदि आर जुना़निकोय बुजहा़उ ओरोम ओचोयेत्को कान ताहेंकाना।
मेनखान सिलास आर तिमोथि मा़किदुनिया़ खोनकिन फेड हेच्एन खान, पावल दो इसोराक् काथातेये उदगा़उ ओचोयेनते, जिसुगे मा़सिकानाय मेनते जिहुदिकोय गोहावात्कोवा। आर ओनको दो तेङगो दाराम आरको हेनोसतावादे खान, आयाक् किचरिच् कोटाकेत्तेये मेतात्कोवा, आपेयाक् माँयाँम दो आपेयाक् बोहोक्रेगे पाड़ावक् मा, इञ दोञ मिरिदोसगेया, आर नित खोन जिहुदि बाहरेरेन जा़तरेनको ठेनिञ चालाक्आ। आदो ओंडे खोन फेड सेनेनते तितुस जुसतुस ञुतुमान मित् होड़ाक् ओड़ाक्तेये बोलोयेना मित्टेन इसोर सेक्वा होड़गे, ओने उनियाक् ओड़ाक् दो सुना़गोगरे भिड़ा़वाकान ताहेंकान। आर सुना़गोगरेन मुखिया़ क्रिसपुस दो आच् घारोंजरेनको सानामको सेलेत् प्रोभुरेये पा़तिया़वेना, आर कोरिन्थिको मोदरेन ढेर होड़ आँजोमकातेको पा़तिया़वेना, आरको बा़प्तिसएना।
आर प्रोभु दो ञिंदा़ मित्टेच् दोरसोनते पावले मेतादेया, आलोम बोतोरोक्आ मेनखान रोड़मे, आर आलोम हापेक्आ। एनते इञगे आम साँवते मिना़ञा, एनते आम हा़नमे ला़गित् दो ओकोय हों दिल बाको एमा, एनते नोवा नागराहारे आ़डि उता़र होड़ मेनाक्कोतिञा। आदो मित् सेरमा तुरुइ चाँदो ओंडे ओनको तालारे इसोराक् काथा चेत्आकोकाने ताहेंयेना।
मेनखान गा़लियो दो आखायारेन चाक्लाविच्ए ताहेंकान जोखेच्, जिहुदिको दो मित् जोमकावते पावल उपा़रतेको तेङगोयेना, आर बिक्चा़र दुड़ुप्आक् सामाङरे इदिकेदेतेको मेनकेदा। नुय होड़ दो आ़न रेयाक् धारा खोन उलटा़ इसोर सेवावाय ला़गित् होड़कोय आ़ंडिच्एत्कोवा।
खान पावले रोरोड़ ला़गिदोक् कान ताहेंकानरे गा़लियो दो जिहुदिकोय मेतात्कोवा, ए जिहुदिको, नोवा दो जाहान बेहोकाक् से दुसटा़मियाक् बा़ड़िच् ताहेन खान, जा़रुड़गेञ आँजोमकेतापेया होनाङ। मेनखान काथा रेयाक् आर ञुतुमको आर आपेयाक् आ़न रेयाक् रेटेपेटे कान खान एनडे खान आपेतेगे ञेलजोङपे ओनकानाक्को रेयाङ बिक्चा़रिच् होयोक् ला़गित्, इञ दो मोन बा़नुक्तिञा आदो बिक्चा़र दुड़ुप्आक् ठेन खोने लागा ञिरकेत्कोवा। खानगे ओनको सानामको दो सुना़गोगरेन मुखिया़ सोसथेनेस साप्काते बिक्चा़र दुड़ुप्आक् सामाङरेको दाल केदेया। आर गा़लियो दो ओनाको चेत् हों बाय मेंत् लुतुरादा।
पावल आनटिओखिया़तेये रुवा़ड़ोक्
आर पावल दो आरहों ढेरञोक् दिन ओंडे ताहेंकाते बोयहाको ठेन खोन बिदा़येनते जाहाजते सुरिया़तेये चालावेना, आर उनि साँवते प्रिसकिला़ आर आ़कविला़ हों, आर केनखिरया़रेये मुंडरा़येना, एनतेये मानानआकावान ताहेंकाना।1 आदो एफेसुसरेको सेटेरेन खान आर उनकिन दो ओंडेये बा़गि ओटोवात्किना, मेनखान आच् दो सुना़गोगरे बोलोयेनते जिहुदिको तुलुच्ए आपठा आ़पठियेना। आर बा़ड़ति दिने ताहेना मेनतेको नेहोंरेन खान बाय रेबेनलेना। बिचकोम ओनको ठेन खोन बिदा़येनतेये मेनकेदा, इसोरे मेनले खान आपे ठेनिञ रुवा़ड़ हिजुक्आ, आदो जाहाजते एफेसुस खोने चालावेना।
आर का़इसा़रिया़रेये फेडएन खान जेरुसालेमते राकाप् सेनकाते का़लिसिया़रेनकोय जोहारात्कोते आनटिओखिया़तेये चालावेना। आर तिना़क् दिन चोङ ताहेंकाते ओंडे खोने ओडोक चालावेना, आदो मित् मोहंडा गालातिया़ टोठा आर फुरुगिया़ तालातेये सेन इदियेना, आर सानाम चेलाकोय दिड़हो इदिकेत्कोवा।
आपोलोस एफेसुस आर कोरिन्थि
आर आपोलोस ञुतुमान मित्टेन जिहुदि होड़ जानामते दो आलेकसान्डेरिया़ रेन, रोरोड़रे मित्टेन गा़खुड़ होड़ एफेसुसरेये सेटेरेना। उनि दो सोसतोरको बेस बाडाय होड़े ताहेंकाना। उनि दो प्रोभु रेयाक् होर रेयाङे ला़इ चेत् आकोकान ताहेंकाना, आर जिउरेये हेडेजोक्कान ताहेंकानते जिसु रेयाक्को ठिक ठिके गालमाराव आर चेत् आकोकान ताहेंकाना। मेनखान एकेन जोहान रेयाक् बा़प्तिसगेये बाडाय आकात् ताहेंकाना। आर उनि दो सुना़गोगरे सोहोसाते रोरोड़े एहोप् एना। आदो प्रिसकिला़ आर आ़कविला़ उनिकिन आँजोमकेदे खान, आ़किन ठेनकिन इदि केदेया, आर इसोराक् होर रेयाक् आरतेत् ठिक ठिक किन ला़इ बुजहा़वादेया। आर आखायाते पारोम चालाक्ए मेनवान खान, बिसवा़सिको दो उनिको उसकुर केदेया, आर चेलाकोको ओलात्कोवा जेमोनको आताङ दारामे, उनि दो ओंडे सेटेरेनते दायाते पा़तिया़वाकानको आ़डिये गोड़ोंवात्कोवा। एनते उनि दो सोदोरते होड़ सामाङरे जिहुदि होड़को दो जिदा़जिदे भागावकेत्कोवा, जिसुगे मा़सिकानाय मेनते सोसतोरको खोन सोदोरतेये सा़बुतात्कोवा।
Source notes (1)
- Cross-reference नुमे ६:१८
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.