Sanskrit Bible (NT) in Sinhala Script (සත්‍යවේදඃ।)
ප්‍රකාශිතං 13
තතඃ පරමහං සාගරීයසිකතායාං තිෂ්ඨන් සාගරාද් උද්ගච්ඡන්තම් ඒකං පශුං දෘෂ්ටවාන් තස්‍ය දශ ශෘඞ්ගාණි සප්ත ශිරාංසි ච දශ ශෘඞ්ගේෂු දශ කිරීටානි ශිරඃසු චේශ්වරනින්දාසූචකානි නාමානි විද්‍යන්තේ|
මයා දෘෂ්ටඃ ස පශුශ්චිත්‍රව්‍යාඝ්‍රසදෘශඃ කින්තු තස්‍ය චරණෞ භල්ලූකස්‍යේව වදනඤ්ච සිංහවදනමිව| නාගනේ තස්මෛ ස්වීයපරාක්‍රමඃ ස්වීයං සිංහාසනං මහාධිපත්‍යඤ්චාදායි|
මයි නිරීක්‍ෂමාණේ තස්‍ය ශිරසාම් ඒකම් අන්තකාඝාතේන ඡේදිතමිවාදෘශ්‍යත, කින්තු තස්‍යාන්තකක්‍ෂතස්‍ය ප්‍රතීකාරෝ (අ)ක්‍රියත තතඃ කෘත්ස්නෝ නරලෝකස්තං පශුමධි චමත්කාරං ගතඃ,
යශ්ච නාගස්තස්මෛ පශවේ සාමර්ථ්‍යං දත්තවාන් සර්ව්වේ තං ප්‍රාණමන් පශුමපි ප්‍රණමන්තෝ (අ)කථයන්, කෝ විද්‍යතේ පශෝස්තුල්‍යස්තේන කෝ යෝද්ධුමර්හති|
අනන්තරං තස්මෛ දර්පවාක්‍යේශ්වරනින්දාවාදි වදනං ද්විචත්වාරිංශන්මාසාන් යාවද් අවස්ථිතේඃ සාමර්ථ්‍යඤ්චාදායි|
තතඃ ස ඊශ්වරනින්දනාර්ථං මුඛං ව්‍යාදාය තස්‍ය නාම තස්‍යාවාසං ස්වර්ගනිවාසිනශ්ච නින්දිතුම් ආරභත|
අපරං ධාර්ම්මිකෛඃ සහ යෝධනස්‍ය තේෂාං පරාජයස්‍ය චානුමතිඃ සර්ව්වජාතීයානාං සර්ව්වවංශීයානාං සර්ව්වභාෂාවාදිනාං සර්ව්වදේශීයානාඤ්චාධිපත්‍යමපි තස්මා අදායි|
තතෝ ජගතඃ සෘෂ්ටිකාලාත් ඡේදිතස්‍ය මේෂවත්සස්‍ය ජීවනපුස්තකේ යාවතාං නාමානි ලිඛිතානි න විද්‍යන්තේ තේ පෘථිවීනිවාසිනඃ සර්ව්වේ තං පශුං ප්‍රණංස්‍යන්ති|
යස්‍ය ශ්‍රෝත්‍රං විද්‍යතේ ස ශෘණෝතු|
යෝ ජනෝ (අ)පරාන් වන්දීකෘත්‍ය නයති ස ස්වයං වන්දීභූය ස්ථානාන්තරං ගමිෂ්‍යති, යශ්ච ඛඞ්ගේන හන්ති ස ස්වයං ඛඞ්ගේන ඝානිෂ්‍යතේ| අත්‍ර පවිත්‍රලෝකානාං සහිෂ්ණුතයා විශ්වාසේන ච ප්‍රකාශිතව්‍යං|
අනන්තරං පෘථිවීත උද්ගච්ඡන් අපර ඒකඃ පශු ර්මයා දෘෂ්ටඃ ස මේෂශාවකවත් ශෘඞ්ගද්වයවිශිෂ්ට ආසීත් නාගවච්චාභාෂත|
ස ප්‍රථමපශෝරන්තිකේ තස්‍ය සර්ව්වං පරාක්‍රමං ව්‍යවහරති විශේෂතෝ යස්‍ය ප්‍රථමපශෝරන්තිකක්‍ෂතං ප්‍රතීකාරං ගතං තස්‍ය පූජාං පෘථිවීං තන්නිවාසිනශ්ච කාරයති|
අපරං මානවානාං සාක්‍ෂාද් ආකාශතෝ භුවි වහ්නිවර්ෂණාදීනි මහාචිත්‍රාණි කරෝති|
තස්‍ය පශෝඃ සාක්‍ෂාද් යේෂාං චිත්‍රකර්ම්මණාං සාධනාය සාමර්ථ්‍යං තස්මෛ දත්තං තෛඃ ස පෘථිවීනිවාසිනෝ භ්‍රාමයති, විශේෂතෝ යඃ පශුඃ ඛඞ්ගේන ක්‍ෂතයුක්තෝ භූත්වාප්‍යජීවත් තස්‍ය ප්‍රතිමානිර්ම්මාණං පෘථිවීනිවාසින ආදිශති|
අපරං තස්‍ය පශෝඃ ප්‍රතිමා යථා භාෂතේ යාවන්තශ්ච මානවාස්තාං පශුප්‍රතිමාං න පූජයන්ති තේ යථා හන්‍යන්තේ තථා පශුප්‍රතිමායාඃ ප්‍රාණප්‍රතිෂ්ඨාර්ථං සාමර්ථ්‍යං තස්මා අදායි|
අපරං ක්‍ෂුද්‍රමහද්ධනිදරිද්‍රමුක්තදාසාන් සර්ව්වාන් දක්‍ෂිණකරේ භාලේ වා කලඞ්කං ග්‍රාහයති|
තස්මාද් යේ තං කලඞ්කමර්ථතඃ පශෝ ර්නාම තස්‍ය නාම්නඃ සංඛ්‍යාඞ්කං වා ධාරයන්ති තාන් විනා පරේණ කේනාපි ක්‍රයවික්‍රයේ කර්ත්තුං න ශක්‍යේතේ|
අත්‍ර ඥානේන ප්‍රකාශිතව්‍යං| යෝ බුද්ධිවිශිෂ්ටඃ ස පශෝඃ සංඛ්‍යාං ගණයතු යතඃ සා මානවස්‍ය සංඛ්‍යා භවති| සා ච සංඛ්‍යා ෂට්ෂෂ්ට්‍යධිකෂට්ශතානි|
Sanskrit Bible (NT) in Sinhala Script (සත්‍යවේදඃ।). Copyright © 2018 SanskritBible.in. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.