Mat 4

O kedeya Yeso

(Mar 1:12-13; Luk 4:1-13)

1Na Obere Ashili tare kaa Yeso a ale owake ka ogomo o bere o buru kedeya kai. 2Aka meke ongmǝ o tomore tuuru naaze, lelyaare ka letereme, na ekomo meke kai. 3Na ogomo obere o buru deya kai awa bekaana, “Boa baaya Kena ka Ashili, ote lecale leena ka le itǝ oborode.”

4Na Yeso kabare na, “Angmǝ Ashili a bekaana, “Epaolya belle ta ongtaza oromo ne, seena ka koonang angmǝ ka susi ongmǝ Ashili.”1

5Na ogomo o bere oburu, ale ka kai a Urushalima apeng a odera madinǝ, nawa zalara kai araa o kala bezaati a akwilǝ Ashili. 6Na wa bena, “Bo kena ka Ashili kaaza, cangko ka otaru a deze, obena a wele na,

‘Wayo ote atoma wai a kazo o,

kane woboo ka taara tene

nangka oto jukǝ tobona to ocale ne.”2

7Na Yeso kabare wai na, “A wele na, ‘Tana okedeya Ateokora Ashili au ne.’ ”3

8Kangza na ogomo obere oburu ale ka kai oyara o zaati awa wore kai pate togomo te lerambo leena ka o gongha te. 9Awa kang bena, “Pate tenna eyang nyau, ba girwǝ a begeshe beng o ezeng makili ma Ashili.”

10Na Yeso bekaa wai na, “Era arakaana, Shetan! A wele na, ‘Eza Ashili Ateokora au makili ma ai, kangza aiya belle oyo saba.’ ”4

11Na ogomo obere o buru ale awa baya kai, na atoma Ashili o dera lepung de nane kangkama kai.

Obora ogole o Yeso aa Galili

(Mar 1:14-15; Luk 4:14-15)

12Nangka Yeso ka kone obena a meke Yohana na apate akwilǝ andaleme, naka ere naka ale a Galili. 13Ko baya Nazarat, naka ale a Kaparnahum ka ocikǝ, apeng amea aya bengmǝ bo beno, a bekazo be makeke ma Zebulung ka Naptali, 14adorana a panza epaaka ondo obeya angmǝ ka mawo ma Ashili Ishaya wa beke,

15“A makeke ma Zebulung ka ma Naptali,

orona o alea obeno ogong a alea bekazo be obeno Urdung,

a makeke ma Galili araaka a worme acake cikǝ ne,

16aromo kane cikǝ amaring,

ne laka masanto ma gong,

ana ocikǝ makeke ma o ululu o gbwǝ kangza5,

masanto ma tara ane.”

17O era were name, na Yeso bore ozoola aka beyaana, “Kurǝ na Ashili aza obena togomo te shili te amara.”

Yeso ka rare atoma kai o bora

(Mar 1:16-20; Luk 5:1-11)

18Yeso kaya yenga edǝki o beno gong o Galili naname, naka laka arone a leere, Siman ka a rare wai na Biturusu ka orone owai Andarawus. Neya tara majara ma o meese ekwala obeno, obena ogole one o meese ekwala waze. 19Na Yeso bekaane na, “Deyana ka etareng, eyang ote ying ka e itǝ ana o deesa ka aromo a mi.” 20A saseya nane baya majara mane aa ne tare kai.

21Ko lya izi a baate, naka laka arone leere kangza, Yakubu kena ka Zabadi, ka orone kai Yohana. Neya nyimi o onggo o manyi ka ate ane Zabadi, aneya babara majara mane ma o meese ekwala. Na Yeso rare ne. 22A saseya nane baya o onggo o manyi mame ka ate ane, aa ne tare kai.

Yeso ka womza ana makono

(Luk 6:17-19)

23Yeso ka ringgari pate makeke ma Galili, aka baale a nyimi odandaro o gwarzanang maYahuda, aka zoole aa ne aza angmǝ a lebo a togomo te Ashili. Kangza aaka womza pate makono ka odera o kona zake ka aromo ya zitǝ ka mai. 24Na orooka azaa kai ale a kurǝwǝ a nyimi makeke ma Suriya pate. Na aromo casa kai pate andaaka neya kono ka andaaka neya zitǝ ka kombela makono, ka ana o kona o poba a jǝng, andaaka obere o buru wa taba ne, ana letaranggi, andaaka apung ane aa gbwǝ a sara yende, pate naka womza ne. 25Na aromo a cake ne tare kai, kane suri a Galili, ka ana o surǝ a Dekapolis6, ka Urushalima, ka makeke ma Yahudiya, a ale cakate obeno Urdung.