Pathien Lekhabu Inthieng Chongtung Thar

Chongphuong 15

Vântîrtonngei leh anûktak ripuingei

Hanchu invâna misîrtheiloi neinun dang, roiipuitak le kamâmom ku mua. Mahan vântîrtonngei sari leh ripuingei sari an oma, maha anûktakna ania, Pathien taksina misîrna mongnatak ngei an ni zoi sikin.

Hanchu mei leh ânpol lîm-en tuikhanglien phuozek ku mua. Sarâng menepu ngei rimil le riming number dônpu ngei khom ku mu ngei sa. Anni ngei hah Pathien'n a pêk ngei serândangei chôiin lîm-en tuikhanglien kôla an indinga male Pathien tîrlâm, Moses lâ, le Belrite lâ hah an thoa:1

“Pumapa Pathien Râtinchung,

ni sinthongei chu idôra roiinpui le kamâmom mo ani zoi!

Namtinngei Rêngpa,2

na lampuingei chu adikin asa tatak!

Pumapa tumo nang rin loia ânding loi rang?3

Tumo no roiinpuina phuong nuomloi rang?

Nangma vai ke ânthieng ni ni.

Namtinngei hong an ta

male chubai nang mûk an tih,

ni sintho adik ngei hah mi murdi'n an mu sikin.”

Masuole han invâna biekin ân-ong ku mua, asûnga han Puon In Inthieng aoma.4 Vântîrtonngei sari ripuingei sari chôi ngei hah biekin renga an hong jôka, puoninnêm ânthieng ântêrdap leh invôn an rôpngei han rângkachak kongrûingei an khita. Hanchu iring parân minli ngei lâia inkhat han vântîrton sari ngei kôm han Pathien tuonsôt tuonsôta ring titpu taksina sip, rângkachak khuriâingei sari a pêka. Biekin hah Pathien roiinpuina leh sinthotheina meikhûn asip zoia, male vântîrton sari ngeiin ripuingei sari an hongchôi hah ahek mâka chu Pathien biekina han tute lût thei mak ngei.5

Source notes (5)

Cross-reference Jôk 15:1
Footnote namtinngei; miziek senkhat ngei an dôn chu kumngei.
Cross-reference Jer 10:7; Lap 86:9
Cross-reference Jôk 38:21
Cross-reference Jôk 40:34; 1 Rêng 8:10-11; 2 Rich 5:13-14; Isa 6:4

Pathien Lekhabu Inthieng Chongtung Thar. Copyright © 2017 The Word for the World International. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY 4.0 · SourceEdition imported 2026-10-25.