Filipi

Paulus 'ai Surata

toma Jama'ata Filipi

Demo ma mulaingi

Limau Filipi ma siḏa rema lomanga re habari toma daeraha Makedonia. Wakutu Paulus ro ngadolo toma daeraha Makedonia, unanga mulaingi 'ai munara 'o singadolo Habari Roanga toma limau Filipi. Ma ḏo-ḏogumu tala, kalaha ngowa'a manga repe 'aḏi lawana unanga 'age rema ngowa'a Filipi 'aḏi ngaku Ma Jou Yesus (Som. balangu 16). Paulus 'a sisoi'i tala Filipi pasala i'a, soi muḏuo i'a ngowa'a Filipi 'aḏi siḏingoto pipisi ra unanga di'a riono unanga tai munara ma dara.

Paulus 'a sirera re 'a siwalata Habari Roanga toma limau Filipi, togumu i'a ḏa musungu nyagi moi, Paulus 'o osama bui toma limau Roma. Ngowa'a Filipi ya 'isene Paulus 'o osama bui, ananga 'aḏi dadunu siḏingoto pipisi di'a sikare 'a Paulus. Pipisi gena-ge 'a Epafroditus 'a gasa. Wakutu 'a Epafroditus 'o ngadolo toma limau Roma, Paulus 'o soma'a unanga 'o maḏibo i'a toma Filipi, re Paulus 'o lefo surata nena-ne, la Epafroditus 'a gasa si'a toma Filipi.

Paulus 'ai maksudu wakutu unanga 'o lefo surata nena-ne: Unanga mau 'o pula'a duga re domolo toma ngowa'a Filipi, la ananga 'aḏi 'ahu toma dame re awa ngowa'a ya'u sisala ananga mangale 'ahu ma duhu, la lebe repe ngowa'a 'aḏi ngaku Habari Roanga (1:27-2:18, 4:2-4). Paulus 'o lefo surata nena-ne wakutu unanga 'o osama bui, sababu 'o munara sirera re siwalata Habari Roanga (1:12-26). Unanga 'o kanau ra ananga, ma sababu unanga soma'a Epafroditus 'o maḏibo i'a toma Filipi re dadunu 'o siajele ra ananga 'ai rancana ḏuanga i'a 'o soma'a Timotius tagi ḏi'i toma limau Filipi (2:19-30). Unanga kanau ra ananga mangale ananga balasu ma'istiari toma ngowa-ngowa'a ga'a gasa do-doto'o ma rapu re manga 'akala re sinyingara ma jira. (3:1b-2, 17-19) Re ḏi'i 'o pula'a murasa ma la toma ngowa'a Filipi sababu 'aḏi siḏingoto pipisi di'a sikare ngoi ga'a Epafroditus 'a gasa. (4:10-18).

Ma dara:

1. Demo ma mulaingi. (1:1-2)

2. Paulus 'o pula'a murasa ma la ra Ma Jou'ongu Madutu, sababu ngowa'a Filipi, re ḏi'i unanga manyiata di'a ananga. (1:3-11)

3. Kalaha unanga osama bui, ngowa'a lebe repe 'aḏi mau 'isene Habari Roanga. (1:12-26)

4. Unanga 'o pula'a duga re domolo, la 'aḏi 'ahu toma dame ma dara re ninga 'ahu ma duhu kama rapu ua, la lebe repe ngowa'a 'aḏi ngaku Habari Roanga. (1:27-2:18)

5. Unanga 'o sitoro 'a Timotius re 'a Epafroditus sababu ananga 'aḏi munara ra Ma Jou. (2:19-3:1a)

6. Unanga 'o kanau ra ananga, balasu ma'istiari toma ngowa-ngowa'a ga'a gasa do-doto'o ma rapu. (3:1b-4:1)

7. Unanga 'o pula'a duga re domolo, la manga 'ahu 'i dame re lebe cufala i'a mete'e Ma Jou Yesus. (4:2-9)

8. Unanga 'o kanau mangale unanga ro dawongo pipisi ga'a ananga 'aḏi siḏingoto di'a unanga re unanga pula'a murasa ma la. (4:10-20)

9. Tabea ma ḏo-ḏogumu (4:21-23)