Filemon

Paulus 'ai Surata

ra Filemon

Demo ma mulaingi

Paulus 'o lefo surata nena-ne di'a 'ai ḏagilomu ga'a si'aro'o Filemon. Filemon gena-ge, ngowa'a ngaku Yesus ga'a 'o tegoro toma limau Kolose. Unanga rai ngowa'a budaka matengo 'ai lomanga Onesimus. Onesimus 'o wiḏi sisoi'i tala Filemon 'ai tuanga, 'o tagi toma limau Roma. Toma 'orasa gena-ge, Paulus 'o osama bui sababu 'o munara singadolo Habari Roanga. Ngene wa waro ua ma duhu sa'olo enanga 'i dadi mada'a Onesimus ma'u sanga ra Paulus toma limau Roma. Sababu Paulus 'ai do-doto'o, unanga ḏi'i 'o dadi ngowa'a ngaku Yesus.

Pasala i'a, Paulus 'o fikiri jobilaha Onesimus no maḏibo i'a ra Filemon 'ai tuanga. Mada'a Onesimus mojongo 'a Filemon, unanga 'o fikiri unanga ḏuanga i'a sanga hukumu, sababu unanga ro wiḏi. Dadi Paulus 'o lefo surata, kara 'a siḏingoto ra Filemon. Toma surata gena-ge ma dara, unanga 'o golo'o ra Filemon di'a 'o si'apongo Onesimus. Paulus 'o golo'o ḏi'i ra Filemon di'a dadunu 'o dawongo 'a Onesimus toma la-la ma dara. Awa 'oro ino sa'olo budaka moju, mada'a sa'olo gia nongoḏu ga'a nanga ngo-ngaku 'i ma tero.

Toma demo Yunani, lomanga Onesimus, ma ngale: “Rema faeda”. Paulus 'o kanau, ma siḏa Onesimus 'ai faeda 'i cua, mada'a 'orasa nange-ne unanga rai faeda. Sababu unanga ro ngaku Ma Jou Yesus Kristus (bu-bula'a 11).

Ma dara:

1. Demo ma mulaingi (1-3)

2. Paulus 'o puji re silamo'o 'a Filemon di'a 'ai ngo-ngaku re 'ai dadalara (4-7)

3. Paulus golo'o ra Filemon di'a 'o si'apongo Onesimus (8-22)

4. Tabea ma ḏo-ḏogumu (23-25)