Dadunu

DADUNU

DEMO MA MULAINGI

Boku Dadunu ma dara silefo 'a Musa 'ai bobita-bobita ga'a 'a sikanau toma ngowa'a Israel manga biono wakutu ananga 'aḏi ngadolo toma Moab. Ananga 'aḏi matogumu 'age wakutu 'aḏi siḏo-ḏogumu manga ḏo-ḏagi ma giḏanga mete'e daeraha baulaco osama daeraha Kanaan nyangu di'a ḏegoro daeraha gena-ge.

Toma boku nena-ne ma dara 'age rema fara muḏuo i'a gena-ge:

1. 'A Musa 'o si'elingi bangsa Israel mangale 'ori i'a ga'a 'i dadi ḏua toma musungu nyagi rata ma dara. Unanga 'o golo'o toma bangsa Israel la ananga ya 'elingi mangale ma duhu sa'olo Ma Jou'ongu Madutu 'O de-de'oso ananga toma daeraha baulaco sababu gena ananga balasu 'aḏi setia ra Ma Jou'ongu Madutu.

2. 'A Musa dadunu si'elingi Ma Jou'ongu Madutu 'Ai Hukumu nyagi moi, re unanga 'a site'e mangale parenta ma mulaingi gena-ge. Unanga 'o golo'o mode-mode'e ra ananga la bangsa Israel pa'i 'aḏi puji re silamo'o ra Ma JOU ḇato. Gena ḏua unanga dadunu si'elingi hukumu muḏuo i'a re parenta ga'a si'aturu bangsa Israel manga 'ahu toma tana'a ga'a sijaji pasala ḏua.

3. 'A Musa si'elingi bangsa Israel mangale Ma JOU 'Ai jaji ra ananga. 'A Musa 'o babata bangsa gena-ge la ananga ya si'a'a ti-tiai manga parenta gena-ge.

4. 'A Yosua sanga cumutu ngali Musa di'a de-de'oso Ma Jou'ongu Madutu 'Ai 'umata. Sinyanyi ma nyanyi pujiana rimoi di'a Ma JOU 'Ai setia togumu i'a, re sibarakati suku-suku Israel, 'a Musa 'o sengene toma Moab, papolo ḇanyo Yordan ma wangere ma la'o.

Boku nena-ne ma poko gena-ge mangale Ma Jou'ongu Madutu ro sisalamata re sibarakati 'Ai 'umata, bangsa ga'a Unanga ya'u dadalara. Dadi bangsa Israel ya sidaioranga yoḏu'u gena-ge. Ananga balasu 'aḏi mete'e Ma Jou'ongu Madutu 'ai iḏingi tau-taunu, la ananga 'aḏi tatapu 'ahu re sanga sibarakati.

Ma bu-bula'a ga'a 'i paralu madutu gena-ge 6:4-6. Bu-bula'a—bu-bula'a nena-ne 'i silefo demo-demo ga'a Yesus 'a silomanga hukum ma la-lamo'o ma re'u i'a, <<Ma JOU Ma Jou'ongu Madutu, ga'a ngini ni silamo'o re siḏubuso, Unanga gena-ge ngini Nu dadalara reninga 'akala re sinyingara mo-moini, reninga fikirana mo-moini, reninga de-de'e mo-moini.>>

Ma dara

'A Musa 'ai bobita ma mulaingi 1:1-4:49

'A Musa 'ai bobita ma soi ḏiḏi 5:1-26:19

Ma Jou'ongu Madutu 'ai parenta nyagi moi 5:1-10:22

Huku-hukumu, 'atoranga-'atoranga, re duga re domolo 11:1-26:19

'Atoranga-'atoranga wakutu osama nagara Kanaan 27:1-28:68

'A Musa 'ai bobita ma soi ro'ange 29:1-30:20

'A Musa 'ai bobita ma ḏo-ḏogumu 31:1-33:29

'A Musa 'ai se-sengene 34:1-12