Kolose

Paulus 'ai Surata

toma Jama'ata Kolose

Demo ma mulaingi

Limau Kolose toma daeraha propinsi Asia ma ngowa. Limau Kolose 'i ma'u kiḏanga ua reo limau Epesus. Paulus 'o munara gasa Habari Roanga toma Epesus musungu romoḏiḏi pai'i. Togumu i'a 'age ngowa'a Epesus raḏi dadi ngowa'a ngaku Yesus kara ananga 'aḏi tagi toma limau Kolose di'a gasa habari Roanga. Dadi ngowa'a Kolose 'age ḏi'i 'aḏi dadi ngowa'a ngaku Yesus. Togumu i'a ḏa musungu muḏuo i'a wakutu Paulus osama bui, sababu 'o munara sigasa Habari Roanga, unanga 'o lefo surata nena-ne 'a siḏingoto toma ngowa-ngowa'a Kolose.

Tai surata toma ngowa'a Kolose nena-ne, Paulus 'o si'elingi ananga mangale guru-guru 'agama ga'a 'aḏi gasa do-doto'o ma rapu. Guru-guru 'agama gena-ge 'aḏi kanau, “Na'o ngene wo mau sanga salamata ra Ma Jou'ongu Madutu, cukupu ua na'o ngene pa'i wo ngaku ra Yesus ḇato. Ngene balasu wo puji re silamo'o ḏi'i makhluk ga'a rema kuasa toma diwanga re dungia, sa'olo mala'ekata. Re ngene balasu wo masuna ḏi'i mete'e 'agama ma 'atoranga re wo mete'e 'oru ga'a 'i wosono.” Paulus 'o si'elingi ngowa'a Kolose, la awa ananga 'aḏi ngaku do-doto'o ma rapu gena-ge. Unanga 'o siajele ra ananga so'o ne: Na'o ngene rewo ngaku Yesus gena-ge cukupu ḏua, sababu pa'i Yesus ḇato nyengara sigasa manusia toma salamata. Do-doto'o ga'a guru-guru sa-sakala ya singadolo gena ga'a 'i sijira ngene ḇato. Sababu ananga manga do-doto'o gena ga'a si'u'ua Yesus.

Ma dara:

1. Demo ma mulaingi. (1:1-2)

2. Paulus 'o pula'a murasa ma la ra Ma Jou'ongu Madutu re 'o manyiata di'a ngowa-ngowa'a Kolose. (1:3-14)

3. Kristus lebe la-lamo'o reo 'oru ḇato. (1:15-23)

4. Paulus 'o munara di'a gasa Habari Roanga. (1:24-2:5)

5. Demo ma la-lamo'o ma re'u i'a: Ngene nanga de'oso re ḏegoro balasu 'i patasa di'a ngowa'a ngaku Yesus. (2:6-7)

6. Awa ni ngaku do-doto'o ga'a 'i ma'u rapu re ninga ngo-ngaku ra Yesus. (2:8-23)

7. Upa'a 'ahu ma siḏa, dawongo 'ahu ma su-sungi. (3:1-17)

8. Duga re domolo toma nau'u re were'a (ngowa'a raḏi molo'ara) toma ngowa 'olo re ḇaḇa re ngina, toma budaka re tuanga (3:18-4:1)

9. Duga re domolo mangale manyiata re nanga 'ahu ma duhu toma ngowa-ngowa'a ga'a ngaku Yesus nyangu. (4:2-6)

10. Tabea ma ḏo-ḏogumu (4:7-18)