2 Timotius

Paulus 'ai Surata ma Soi Ḏiḏi

ra Timotius

Demo ma mulaingi

Paulus 'ai surata ga'a 'a lefo toma boku 'Ofi-'Ofi nena-ne, surata nena-ne enanga ma ḏo-ḏogumu. Unanga 'a lefo surata nena-ne wakutu unanga 'o osama bui toma limau Roma (1:8, 16:29) Paulus 'a sibasono tala unanga sanga hukumu sengene (4:6). Sababu gena-ge, unanga 'a lefo surata nena-ne 'a siḏingoto ra Timotius. Timotius unanga 'o tubaie moju ga'a Paulus 'ai ḏagilomu munara. Timotius 'o dadi jama'ata ma bi-biri'i toma limau Efesus.

Surata nena-ne ma tero sa'olo Paulus 'ai go-golo'o ma ḏo-ḏogumu ra Timotius, la Timotius capati tutumu (4:9, 21), sababu unanga 'o 'elingi 'a Timotius (1:3-5). Paulus 'o pula'a duga re domolo, la Timotius 'ai 'akala re sinyingara namoto (1:6-7) re 'o doto'o jama'ata reo 'ori i'a ba-banari (1:1-13, 22; 3:14) Re 'o simaha ua ngowa'a ga'a 'aḏi gasa do-doto'o 'ori i'a ma rapu (2:14, 16-18); re Timotius balasu cufala singadolo Habari Roanga rai 'akala re sinyingara mode-mode'e re 'o siḏagi Ma Jou'ongu Madutu 'ai munara mo-moini (4:1-2).

Toma surata ma dara nena-ne, Paulus 'a silefo 'age ngowa'a nga muḏiḏi 'aḏi gasa do-doto'o banari ua, manga do-doto'o ma betongo so'o ne: “Ngowa'a ga'a dadunu 'ahu moju toma ngowa'a senge-sengene ma sigolona, gena-ge 'i cua ḏua” (2:17-18). Gena-ge ma ngale: Ma Jou'ongu Madutu ro pula'a ananga 'ahu Rohani ma su-sungi toma dungia nena-ne, mada'a ḏuanga i'a unanga na si'ahu ua ngene moju. Dadi ananga manga do-doto'o gena-ge 'i banari ua. Toma Kiamata ma Wangere Ma Jou'ongu Madutu dadunu 'o si'ahu ngowa'a toma senge-sengene manga sigolona. (Oḏi'i ḏi'i 1Kor. 15:12; 19:23; 1Tes. 4:16-17)

Ma dara:

1. Demo ma mulaingi (1:1-2)

2. Paulus 'o sibere 'ai murasa ma la ra Ma Jou'ongu Madutu sababu 'a Timotius 'ai ngo-ngaku. (1:3-5)

3. Paulus pula'a duga re domolo, la Timotius cufala munara ra Ma Jou'ongu Madutu. (1:6-4:8)

4. Paulus golo'o 'a Timotius capati tutumu unanga. (4:9-15)

5. Kalaha Paulus sa'i ro sanga hukumu sengene, unanga 'o masinganono taunu ra Ma Jou'ongu Madutu. (4:16-18)

6. Tabea ma ḏo-ḏogumu (4:19-22)