2 Korintus

Paulus 'ai Surata ma Soi Ḏiḏi

toma Jama'ata Korintus

Demo ma mulaingi

Paulus masiretene ga'a 'o gasa Habari Roanga ma mulaingi toma limau Korintus (18:1-17 oḏi'i ḏi'i demo ma mulaingi toma I Korintus). Nange-ne Paulus toma limau lelegu mada'a 'age rema ngowa-ngowa'a toma Korintus ga'a 'aḏi itomo unanga. Ananga 'aḏi kanau unanga Yesus 'ai so-soma'a ua. Dadi Paulus 'o 'utusu 'a Titus tagi toma limau Korintus. Titus 'o gasa 'a Paulus 'ai demo-demo lai kasara di'a ḇangata ngowa'a Korintus ga'a 'aḏi itomo Paulus 'ai kuasa. Wakutu Titus 'o maḏibo toma Korintus ino, unanga ma'u sanga ra Paulus toma Makedonia, re 'o kanau ra Paulus, “ 'Age ngowa'a repe 'aḏi sisupu tamanga sigolona ngowa'a ngaku Yesus ga'a 'aḏi itomo Paulus, re ananga gena-ge 'aḏi nyanyaḏi ngana. Kalaha so'o gena, 'age ḏi'i ananga ga'a manga 'akala lai te'e 'aḏi itomo ngana 'ani kuasa moju.”

Wakutu Paulus 'o 'isene habari so'o gena-ge, unanga 'o lefo surata ga'a ngene ḏuanga i'a wa baca nena-ne si'aro'o

Ma dara:

1. Demo ma mulaingi: Ma Jou'ongu Madutu 'a site'e manga 'akala re sinyingara wakutu ngene toma susa ma dara. (1:1-11)

2. Paulus 'o kanau ma sababu 'oru unanga 'a ngali 'ai maksudu 'o tutumu ananga, re unanga 'o siajele 'ai munara 'o singadolo Habari Roanga re 'o golo'o ananga 'aḏi ma'u 'aro'o la ino ra unanga. (1:12-7:16)

3. Ma'u 'aturu mangale pipisi di'a riono ga'a ḏuanga i'a ya siḏingoto toma daeraha Yudea. (8:9)

4. Paulus 'a riono 'ai diri re 'o kanau rai 'akala bo-boloto mangale unanga mode-mode'e Ma Jou Yesus 'ai so-soma'a re unanga 'o ḇangata ananga ga'a 'aḏi itomo unanga 'ai kuasa. (10:1-13:10)

5. Demo ma ḏo-ḏogumu. (13:11-13)