1 Tesalonika

Paulus 'ai Surata ma Mulaingi

toma Jama'ata Tesalonika

Demo ma mulaingi

'Au wali Limau Tesalonika, rema ḏe-ḏegoro toma pamarenta propinsi Makedonia. Ngowa'a ga'a 'aḏi tegoro toma limau nena-ne, ḏa nga cala latu ḏiḏi, mamuni'a ngowa'a Yahudi, mada'a repe ngowa'a Yahudi ua, re ngowa'a ga'a silamo'o jou'ongu ma somoara. Paulus, Timotius re 'a Silas ananga 'aḏi sigasa Habari Roanga toma ngowa'a Tesalonika, singadolo tamanga sigolona 'age ananga ga'a raḏi dadi ngowa'a ngaku Yesus. (Som. 17:1-4) Mada'a ti'ara ua, ananga 'aḏi tegoro toma limau Tesalonika, sababu ngowa'a ngaku Yesus ua, ya'u 'a'a cira ananga (Som. 17:5-10). Palisi'i i'a ma di'ara ino Paulus mau ya'u tutumu ananga ioronongoḏu ngo-ngaku rimoi toma limau Tesalonika. Sababu gena-ge, 'a Paulus 'o soma'a Timotius tagi tutumu ananga re ya'u oḏi'i ananga awa-awa manga ngo-ngaku ra Yesus lai te'e moju bolo ua (1Tes. 3:1-2). Togumu i'a, Timotius maḏibo toma Tesalonika, Paulus 'a lefo surata nena-ne.

Paulus 'a lefo surata nena-ne 'ai maksudu fara muḏuo i'a. Unanga 'o si'elingi ngowa-ngowa'a Tesalonika ananga manga 'ahu ma duhu wakutu Paulus mamete'e ra ananga 'au nga'ene (2:1-2). Paulus ya'u hiburu ananga re pula'a duga re domolo tamanga 'ahu, sababu manga ngo-ngaku (3:3-5). Unanga 'o doto'o ananga mangale manga de'oso re ḏegoro ga'a 'i patasa di'a ngowa'a ngaku Yesus (4:1-10). Unanga 'o pula'a duga re domolo mangale awa 'aḏi pamalasa 'a'a munara wange moi-wange moi (4:11-12). Unanga 'o doto'o ananga mangale 'oru ga'a 'i dadi toma ngowa'a ngaku Yesus ga'a sengene ḏua reo ngowa'a ngaku Yesus ga'a 'aḏi 'ahu-'ahu moju toma 'orasa Ma Jou Yesus dadunu 'o sapolo moju. (4:13-17). Balangu moi-balangu moi toma surata nena-ne 'i silefo mangale Ma Jou Yesus 'ai ta-sapolo (1:9-10, 2:19-20, 3:14, 4:13-17, 5:1-2, 5:23-24).

Ma dara:

1. Demo ma mulaingi. (1:1)

2. Paulus re ngowa'a Tesalonika manga jarita. (1:2-3:13)

a. Paulus pula'a murasa ma la ra Ma Jou'ongu Madutu, sababu ngowa'a Tesalonika, re 'o sitoro ananga manga de'oso re ḏegoro. (1:1-10)

b. Paulus 'o kanau 'o riono 'ai diri: Unanga 'a sijarita 'ai munara 'au nga'ene toma limau Tesalonika, re unanga ya'u si'elingi ananga mangale 'ai de'oso re ḏegoro 'i la-la ra ananga. (2:1-12)

c. Paulus 'o kanau, Unanga 'o mau masala di'a 'o tutumu ananga. (2:13-3:13)

3. Paulus 'o pula'a duga re domolo re 'o doto'o ngowa'a Tesalonika. (4:1-5:24).

a. Paulus, 'o pula'a duga re domolo, la manga de'oso re ḏegoro 'i patasa sa'olo Yesus 'ai me-mete'e. (4:1-12)

b. Paulus 'o doto'o ananga mangale 'oru ga'a 'i dadi wakutu Ma Jou Yesus dadunu 'o sapolo. (4:13-5:11)

c. Paulus 'o pula'a duga re domolo mangale 'ahu dame toma ngowa-ngowa'a ngo-ngaku rimoi. (5:12-24)

4. Tabea re demo ma ḏo-ḏogumu. (5:25-28)