1 Petrus

Petrus

'ai Surata ma Mulaingi

Demo ma mulaingi

Surata nena-ne 'a Petrus 'a lefo, unanga 'o osama nyo-nyoimi ra Yesus 'ai me-mete'e nga nyagi moi re nga muḏiḏi. Unanga 'o siḏingoto surata nena-ne di'a ngowa'a ngaku Yesus ga'a ngowa'a Yahudi ua, ga'a tegoro toma daeraha Asia ma ngowa. Ngowa'a gena-ge ya'u sisikisa sababu ananga raḏi dadi ngowa'a ngaku Yesus. Tamanga sigolona 'age ngowa'a ya'u fitana ananga gena-ge (2:11-12, 2:15, 3:16, 4:4), re tamanga sigolona rema budaka ananga gena-ge manga tuanga masiretene ya'u sisikisa (2:18-20). Re ḏi'i tamanga sigolona 'age ananga gena-ge manga nau'u sisikisa were'a sababu manga nau'u 'aḏi ngaku Yesus nyangu (3:16).

Ma sababu gena-ge Petrus 'o siḏingoto surata di'a site'e ananga manga ngo-ngaku, la ananga nga'unu tahana toma sikisa gena-ge ma dara. Petrus 'o siajele mangale sangisara ga'a ngene wa basono, la disa waro nanga ngo-ngaku 'i mode-mode'e, bolo ua. Kalaha ngene sanga sangisara sababu ngene nanga ngo-ngaku ra Yesus, ngene balasu ta'aloko ra Ma Jou'ongu Madutu. Re nanga de'oso re ḏegoro balasu 'i la-la. Petrus 'o pula'a duga re domolo ma repe di'a sibabata, la ananga manga 'akala re sinyingara 'aḏi masinganono pa'i ra Ma Jou'ongu Madutu ḇato, 'aḏi 'a'a la-la re tahana toma sangisara ma dara.

Ma dara:

1. Surata ma mulaingi. (1:1-2)

2. Ngene sanga 'ahu su-sungi ra Ma Jou'ongu Madutu nanga Ḇaḇa re 'Ai Ngowa'a Nau'u, re Ma Ngagara 'Ofi-'Ofi. (1:3-12)

3. Duga re domolo, la nanga de'oso re ḏegoro balasu la-la sababu ngene rewo dadi Ma Jou'ongu Madutu 'ai ngowa-ngowa'a. (1:13-2:10)

4. Duga re domolo, la ngene wo ta'aloko toma pamarenta; duga re domolo di'a budaka, nau'u re were'a re di'a ngowa'a mo-moini. (2:11-3:12)

5. Duga re domolo di'a ngowa'a ga'a sanga sangisara sababu ananga ngowa'a ngaku Yesus. (3:13-4:19)

6. Duga re domolo di'a 'agama ma bi-biri'i re di'a 'a guna ḇato. ḇato. (5:1-11)

7. Surata ma ḏo-ḏogumu. (5:12-14)