1 Yohanes

Yohanes

'ai Surata ma Mulaingi

Demo ma mulaingi

Mete'e ngowa-ngowa'a ngaku Yesus 'au wali manga demo, Yohanes 'o lefo surata ma mulaingi nena-ne toma limau Efesus re 'o siḏingoto toma ngowa-ngowa'a daeraha Asia. Toma 'orasa gena-ge, unanga ro piri'i.

Wakutu Yohanes 'o lefo surata nena-ne, 'age rema guru 'agama ga'a gasa do-doto'o ma rapu. Guru 'agama gena-ge 'aḏi kanau so'o ne: Kristus manusia mode-mode'e ua, pa'i 'ai rupa re ngare sa'olo manusia. Ananga 'aḏi kanau ḏi'i so'o ne: Kalaha ngene nanga 'ahu ma duhu enanga 'i cira; 'oru ua, sababu nanga lese ḇato enanga 'i cira. Mada'a Yohanes 'o kanau: Ananga manga do-doto'o mo-moini 'i rapu. Yohanes 'o kanau ra ananga ḏi'i: Yesus, Unanga gena-ge Ma Jou'ongu Madutu 'ai Ngowa'a Nau'u 'o dadi manusia. Na'o ngene wo nana'o Ma Jou'ongu Madutu, tantu ḏua ngene nanga 'ahu ma duhu sa'olo Unanga. Gena-ge ma ngale: Ngene wo matogumu wo 'a'a ḏosa, wa mete'e Unanga 'ai parenta re ma'u dadalara matengo re matengo.

Yohanes 'ai maksudu ma lelegu, ngene baca toma 5:13: “Ngoi to lefo surata nena-ne ra ngini ga'a rini ngaku ḏua Unanga, Ma Jou'ongu Madutu 'ai Ngowa'a Nau'u, la ngini na waro mangale ngini reni sanga 'ahu kasingado-ngadolo i'a.” Toma surata nena-ne ngene baca nana'o fara muḏuo i'a bolo bukiti ga'a site'e ngene nanga 'akala re sinyingara, la ngene wa waro ngene rewo sanga 'ahu kasingado-ngadolo i'a ra Ma Jou'ongu Madutu ino. (2:3, 5-6, 3:10, 14, 24, 5:11-12, 18-20). Na'o ngene ngaku Ma Jou Yesus, ngene wo mojongo Ma Jou'ongu Madutu ua. (2:28, 3:19-22, 4:16a, 17-18, 5:14)

Ma dara:

Demo ma mulaingi (1:1-4)

Bu-bula'a rimoi: Ngene ra Ma Jou'ongu Madutu 'ai tarangi ma dara. (1:5-2:27)

a. Na'o ngene wo nana'o Ma Jou'ongu Madutu, ngene rewo matogumu nanga de'oso re ḏegoro toma hafu-hafu re ngene rewa mete'e 'ai parenta. (1:5-2:17)

b. Ngene wo ngaku mangale Yesus, gena-ge Mesias. (2:28-4:6)

Bu-bula'a romoḏiḏi: Ngene rewo dadi Ma Jou'ongu Madutu 'ai ngowa-ngowa'a. (2:28-4:6)

a. Ngene nanga de'oso re ḏegoro 'i ma'u rapu reo ananga ga'a 'aḏi dadi roh ma jira ma ngowa-ngowa'a. (2:28-3:24)

b. Ngene wo ngaku mangale Yesus 'o dadi manusia. (4:1-6)

Bu-bula'a ro'ange: Dadalara re ngo-ngaku (4:7-5:12)

a. Ngene balasu ma'u dadalara matengo re matengo. (4:7-5:5)

b. Ngene wo ngaku mangale Yesus Ma Jou'ongu Madutu 'ai ngowa'a ga'a sengene di'a pula'a ngene 'ahu kasingado-ngadolo i'a. (5:6-12)

Surata nena-ne maksudu. (5:13)

Demo ma ḏo-ḏogumu. (5:14-21)