Vaefweso

Baluva ya mutumi Pawulo kwa

VAEFWESO

Wulongolo

Ndongwa tsotsili mu chitabu chino

Baluva yino ya Pawulo kwa Vaefweso yandikwe luvala lumwe na baluva yila ya Vakolosayi mu mwaka gwa sitini luhuma kuleleka kwa Chilisito. Mu sula ya 1:1. Tungumuwona Pawulo angitambutsa kuta mwene yo andiche baluva yino. Vasomi wolofu vangidichila kuta Pawulo yo andiche chitabu chino cha Vaefweso. Nayivaje baluva yino yilihela samuso tsa mwene Pawulo kota fyoyili mu baluva yila yo avandichilye Vakolosayi. Kwasawuli iyo, yifuluche kuta aganaga baluva iyo yipilime mu fikundi vitunga fya vanya litumbilo va mukova ugo luvala lo andikaga baluva iyo. Kaha mu sula ya 3:1 na 4:1 na 6:20, Pawulo anlonga kuta avaga mu nyumba ya vawopwa iho ho andikaga baluva yino. Mu sula ya 6:21,22, tun'wona kuta Pawulo ayitumile baluva yino kukolela kwa Tikiko yo avaga mu lujendo lwa kuchijendela chikundi cha vanya litumbilo lya Chilisito cha ku Efweso.

Muji gwa Efweso gwavaga mukomi na gwavaga muji gwa wutavala wa Valumi mu mukova gwa Asiya ndodo. Mu chitabu cha Ng'olwa 19:23-31 Tunsoma kuta muji gwa Efweso gwavaga mutambulwa. Kwasawuli ya nyumba ya lilungu lyo lyavaga litsentsilwe chang'ani kwa kulifugamila lilungu lidala va Chijilichi lyo lyachemwaga Alitemi. Mu sula 2:1-7, yin'woneka kuta, chikundi cha vanya litumbilo cha ku Efweso chavaga chantsitse kwa wuvetso wukomi, lechelelo hambele chikisemwaje.

Pawulo anlonga mu hono halongola na hono ha kavili ha baluva yino hila Mulungu fyo avahagwe vanu na kuvakulusa mu ndongwa ntsibi kukolela kwa Yesu Chilisito. Pawulo anguchihwanitsa chikundi cha vanya litumbilo lya Chilisito na muvili, kaha antambula kuta Chilisito yo mutwi gwake. Kaha anguchihwanitsa na nyumba, na anlonga kuta Chilisito yo liganga lya musinji awu liganga lyo linyamana lya kutsenjela lya nyumba iyo. Mu hono ha kavili ya baluva iyi, Pawulo anguvalajitsa na kuvalajila hila munu yo amutumbye Chilisito fyo an'ganika kikala.

Fyofili mu baluva yino

Pawulo angitambutsa na kuvasamusa vanu va ku Efweso mu sula ya 1:1-2.

Kahi anlonga hila vanu va chikundi cha vanya litumbilo fyo vihantsitse na Chilisito mu sula ya 1:3-3:21.

Pawulo ankwandika na kulajila hila vanu yo amutumbye Chilisito fyo an'ganika kikala mu sula ya 4:1-6:20.

Hawudugo tungumuwona Pawulo asindilitsa baluva yake mu sula ya 6:21-24.