2 Vakolindo

Baluva ya kavili ya Mutumi Pawulo kwa

VAKOLINDO

Wulongolo

Ndongwa tsotsili mu chitabu chino

Tun'wona kuta! Chitabu chino cha kavili cha Vakolindo chandikwe na mutumi Pawulo ha mwaka gwa 55 na 56 hoavaga mwanga aleliche Chilisito mu sula ya 1:1. Yino yo baluva ya kavili hagati ha tsila tso tunatso tso tsandikwe na Pawulo kwa chikundi cha vanu wo vamutumbye Chilisito cha Vakolindo. Vasomi vantumba kuta lwavaga lulutye luvala ludodo hela luhuma hala Pawulo hoavaga avandichilye Vakolindo baluva nalamu ya kuvang'anulila. Tulihela nambe hono hohave ho handikwe ha baluva iyo yo anguyitambula mutumi Pawulo mu sula ya 2:3-4, ila tunhotsa kuta yikuva avandichilye hala hoavaga ku Machedoniya, lave mu sula ya 2:13.

Baluva ya Vakolindo va kavili yo baluva ya wiyeka, kwasawuli yinlonga ndongwa tsa mwene Pawulo hamwe na hila fyo aganaga mwene. Pawulo anlonga hila wuhechelelo wake fyowuli kwasawuli ya ndongwa tsa chikundi cha vanu wo vamutumbye Chilisito cha Vakolindo tso avaga atsihuliche kuhuma kwa Tito. Mugati mwa baluva yino tungugapata madahitso ganya mugati ga ndongwa tsa wutawulaji kota mahotso ga Lilagano Lipya, hono iho Pawulo anguvalajitsa vanu vasoje finu kwasawuli ya vayawo wovali ku Yelusalemu, lave mu sula ya 8, 9. Kaha yinhotswa kuta vamwe va vatumi va wudesi wo vavaga siyo va chikundi cha vanu wo vamutumbye Chilisito cha Vakolindo vavadisile vanu vamuvipile Pawulo, ili vene vave vatambulwa. Vaganaga kuvadita vanu valeche kumutumba Pawulo na vamuwone Pawulo kuta siyo mutumi va Chilisito. Lulongwa ulo lwamudisile Pawulo andiche kuwudugo wa baluva yino bila kuvafiha kuta mwene anago mamulaka makomi ga chitume mugati mwa Chilisito.

Fyofili mu baluva yino

Pawulo ankwantsa baluva yake kwa kuchilamusa chikundi cha vanu wo vamutumbye Chilisito mu sula ya 1:1-7.

Pawulo anguvalonjela hila fyo abadilise mipanjo jake ja lujendo, anguvalonjela hila fyo anuchye ndongwa tsawo na kuta atselite kuta vanuchilye yila baluva yake ndongola mu sula ya 1:8-7:16.

Hambele Pawulo anlajitsa kuta, chikundi cha vanu wo vamutumbye Chilisito cha Vakolindo chin'ganika chisoje magobole ili kuvatanga vayawo va ku Yelusalemu mu sula ya 8:1-9:15.

Muwudugo Pawulo angipamana kwa kuvalonjela kuta mwene mutumi, kaha anguvalonjela lula lujendo lwake lwa habehi lo akujenda mu sula ya 10:1-13:10.